ކޮވިޑާ ގުޅިގެން ސަރުކާރުން ގެންނަން ހަވާލުކުރި ވެންޓިލޭޓަރުތައް ނުލިބުމުން، އެ ފައިސާ އަނބުރާ ހޯދުމަށްޓަކައި އެ މައްސަލަ ބައިނަލްއަގުވާމީ އާބިޓްރޭޝަނަށް ހުށަހެޅުމަށް ހެލްތު މިނިސްޓްރީން އަދިވެސް ހުށަހަޅާފައި ނުވާ ކަމަށް އެޓާނީ ޖެނެރަލް އޮފީސް (އޭޖީ) އިން ބުނެފި އެވެ.
ގާތްގަނޑަކަށް މީގެ ދެ އަހަރު ކުރިން އެޕްރީލް 2، 2020 ގައި ދުބާއީގެ އެގްޒެކިއުޓާސް ޖެނެރަލް ޓްރޭޑިންއާ 30.91 މިލިއަން ރުފިޔާ ހަވާލުކުރީ 75 ވެންޓިލޭޓަރު ހޯދުމަށެވެ. ނަމަވެސް، މިހާތަނަށް ރާއްޖެ ފޮނުވީ ޖުމްލަ 15 ވެންޓިލޭޓަރެވެ. އެކަމާއި ގުޅިގެން އެތައް މުއާމަލާތްތަކެއް ކުރުމަށް ފަހު ވެސް ބާކީ 60 ވެންޓިލޭޓަރު އެ ކުންފުނިން ނުފޮނުވަ އެވެ.
އެހެންވެ، މިދިޔަ އަހަރުގެ އޭޕްރީލް މަހު ސަރުކާރުން ނިންމީ އެ ފައިސާ އަނބުރާ ހޯދުމުގެ އިތުރުން އެ މައްސަލާގައި ޖިނާއީ ކުށެއް ވާނަމަ އެކަން ބަލައި ފިޔަވަޅު އެޅުމަށް ވަކާލާތު ކުރުމަށެވެ. އެއީ މައްސަލަ ދިވެހި ސަރުކާރާ އެއްކޮޅަށް ނިމިއްޖެނަމަ ބައިނަލްއަގުވާމީ ޓްރީޓީތަކުން މަސައްކަތްތަކެއް ކުރެވޭނެތީ އެވެ.
އެގޮތުގެ މަތިން މިދިޔަ އަހަރުގެ އެ ކުންފުންޏާއެކު ވީ އެއްބަސްވުން ބާތިލްކުރަން، ސަރުކާރުން ވަނީ ނޯޓިސް ފޮނުވައިފަ އެވެ. ނަމަވެސް، ހެލްތު މިނިސްޓްރީން ފުރިހަމަ ކުރަން ޖެހޭ އިޖުރާއަތްތައް ފުރިހަމަ ކުރުމަށްފަހު، އެ މައްސަލާގައި އާބިޓްރޭޝަނަށް ދާން އެ މިނިސްޓްރީން އޭޖީ އޮފީހަށް ހުށަހަޅާފައި ނުވާ ކަމަށް އޭޖީ އޮފީހުގެ ކޮމިއުނިކޭޝަންސް ޑިރެކްޓަރު، ހުސެއިން ހަސަން "އަދަދު" އަށް ވިދާޅުވި އެވެ.
"ވެންޓިލޭޓަރު މައްސަލަ އާބިޓްރޭޝަނަށް ހުށަހެޅުމުގެ ކުރިން ފައިސާ ހޯދުމަށް މަސައްކަތްކޮށް، އާބިޓްރޭޝަނަށް ހުށަހެޅުމުގެ ކުރިން ފުރިހަމަކުރަންޖެހޭ ކަންކަން ނިންމައި، މައްސަލަ އާބިޓްރޭޝަނަށް ހުށަހެޅުމަށް ހެލްތު މިނިސްޓްރީން މި އޮފީހަށް އަދި ހުށަހަޅާފައެއް ނުވޭ،" ހުސެއިން ވިދާޅުވި އެވެ.
ހެލްތު މިނިސްޓްރީއިން ބުނާ ގޮތުގައި އެގްޒެކިއުޓާސްއާއެކު ވެފައިވާ އެއްބަސްވުން ނިމުމަކަށް ގެނައުމަށްފަހު ވެސް އަމަލު ކުރަން ޖެހޭ ގޮތްތަކެއް ހުރެ އެވެ. އެގޮތުން، އެ މައްސަލާގައި ވާހަކަ ދެއްކުމަށް އެ ކުންފުންޏާ އެކު ބައްދަލުވުމެއް ނުބޭއްވިގެން އުޅޭ ކަމަށް ހެލްތުން ބުންޏެވެ.
އެ މައްސަލާގައި ހެލްތު މިނިސްޓްރީގެ ޑެޕިއުޓީ ޑިރެކްޓާ ޖެނެރަލް ތަސްލީމާ އުސްމާން ވާހަކަ ދައްކަވަން ބޭނުން ނުވި އެވެ. ވެންޓިލޭޓަރު މައްސަލަ ކުރިއަށްދަނީ އޭނާގެ ބެއްލެވުމުގެ ދަށުންނެވެ.
އެއްބަސްވީ 29 ދުވަހުގެ ތެރޭގައި ވެންޓިލޭޓަރުތައް ފޮނުވަން
އެގްޒެކިއުޓާސް އާއި ހެލްތު މިނިސްޓްރީއާ ދެމެދު އެއްބަސްވެފައި އޮތީ އެޑްވާންސް ޕޭމަންޓް ދައްކާތާ 29 ދުވަހުގެ ތެރޭގައި މުދާ ފޯރުކޮށްދޭށެވެ. އެ މުއްދަތުގައި ވެންޓިލޭޓަރުތައް ފޯރުކޮށްނުދީފި ނަަމަ ބާތިލްކުރެވޭނެ ކަމަށް އެއްބަސްވުމުގައި ބަޔާންކޮށްފައި ވެއެވެ.
އެގްޒެކިއުޓާސް އަށް އެޑްވާންސްކޮށް ދެއްކި ފައިސާ އާއި ވެފައިވާ އެއްބަސްވުމާ އެއްގޮތަށް މުދާ ފޯރުކޮށްނުދިނުމުން ލިބިފައިވާ ގެއްލުމުގެ ބަދަލު ނުދައްކައިފި ނަމަ އާބިޓްރޭޝަނަށް ދާން ސަރުކާރުން ނިންމި އެވެ.
ރާއްޖެ އާއި ޔޫއޭއީ އަކީ "ކޮންވެންޝަން އޮން ދަ ރިކޮގްނިޝަން އެންޑް އެންފޯސްމަންޓް އޮފް ފޮރިން އާބިޓްރަލް އެވޯޑްސް،" ނިއުޔޯކް ކޮންވެންޝަންގެ ބައިވެރިން ކަމުގައި ވާތީ، އެ އާބިޓްރޭޝަން ހިންގަން ނިންމާފައި ވަނީ މޯލްޑިވްސް އިންޓަނޭޝަނަލް އާބިޓްރޭޝަން ސެންޓަރުގަ އެވެ.
އެއީ އެ މުއާހަދާގައި ބައިވެރިވެފައިވާ 168 ގައުމުގެ ތެރެއިން ކޮންމެ ގައުމެއްގައި ހިންގާ އާބިޓްރޭޝަނަކުން ނިންމާ ނިންމުމެއް ވެސް އެ މުއާހަދާގެ އެހެން މެމްބަރު ގައުމެއްގައި ތަންފީޒުކުރެވޭނެތީ އެވެ.
ވެންޓިލޭޓަރު މައްސަލާގައި އަދިވެސް ދައުވާ ނުކުރެވޭ
ވެންޓިލޭޓަރުތައް ނުލިބި އެއްބަސްވުން ބާތިލްކުރަން ޖެހުނުއިރު، މިކަމުގައި ހިޔާނާތް ހިންގި ކަމުގެ ތުހުމަތުގައި އޭސީސީން ދައުވާކުރަން ފޮނުވީ ކުރީގެ ހެލްތު މިނިސްޓަރު އަބްދުﷲ އަމީން ހިމެނިވަޑައިގަންނަވާ ގޮތުން އެ މިނިސްޓްރީގެ 10 މީހެއްގެ މައްޗަށެވެ.
އޭސީސީން ބުނެފައިވާ ގޮތުގައި، ދައުވާ ކުރަން ފޮނުވީ، ދައުލަތުގެ މާލިއްޔަތުގެ ގަވާއިދާ ހިލާފުވެ، ވަކި ފަރާތަކަށް ނާޖާއިޒު މަންފާއެއް ހޯދައިދިން ކަމަށް އެކަށީގެންވާ މިންވަރަށް ހެއްކާއި ގަރީނާ ހުރި ކަމަށް ތަހުގީގަށް ސާބިތުވާތީ އެވެ.
އެކަމަކު އެ މައްސަލައަކީ ކަންހިނގާފައިވާ ގޮތަށް ބަލާއިރު ޖިނާއީ ކުށެއްގެ އުންސުރުތައް ހަމަވާ މައްސަލައެއް ކަމަށް ނުފެންނާތީ އެ މައްސަލައިގައި ޕީޖީ އޮފީހުން ފުރަތަމަ ނިންމީ ދައުވާ ނުކުރުމަށެވެ. ނަމަވެސް, އޭސީސީން އެ މައްސަލަ އިތުރަށް ތަހުގީގުކޮށް ބައެއް ކަންކަން އިތުރު ކުރުމަށްފަހު ދައުވާކޮށް ދިނުމަށް އެދި ޕީޖީ އޮފީހަށް ފޮނުވުމުން ބައެއް ކަންކަން އިސްލާހު ކުރުމަށް އަނެއްކާވެސް ފޮނުވާލި އެވެ.
އެގޮތަށް އެ މައްސަލަ އަނބުރާ އޭސީސީއަށް ތަފާތު ތިން ފަހަރެއްގެ މަތިން ފޮނުވާލި އެވެ.
އެ ކުންފުނިން ވެންޓިލޭޓަރުތައް ފޮނުވުމަށް 34 މިލިއަން ރުފިޔާގެ ބިޑެއް ހުށަހެޅުމުން މާލިއްޔަތު ގާވައިދާ ހިލާފަށް އެއްބަސްވުމުގައި ސޮއިނުކޮށް 30 މިލިއަން ރުފިޔާ، އެ ކުންފުންޏަށް ދޫކުރި އެވެ. އެ ކުންފުންޏާ އެ މަސައްކަތް ހަވާލުކޮށްފައި ވަނީ ޑަބްލިއުއެޗްއޯގެ ލަފާގެ މަތިން ކަމަށް ހެލްތު މިނިސްޓްރީއިން ބުނެފައިވާއިރު އެފަދަ ލަފައެއް ދީފައިނުވާނެ ކަމަށް ޑަބްލިއުއެޗްއޯއިން ވަނީ ބުނެފަ އެވެ.
