ދިވެހި ރައްޔިތުންގެ މަދަނީ އަދި ސިޔާސީ ހައްގުތަކާ ގުޅޭ ޝަކުވާ ހުށަހަޅަން ސަރުކާރުން އުފެއްދި އޮފީސް ފޯ ސިވިލް ރައިޓްސް އަށް މިދިޔަ އަހަރު ހުށަހެޅީ އެންމެ ތިން މައްސަލަ ކަމަށް ބަންޑާރަނައިބުގެ އޮފީހުން ބުނެފި އެވެ.
ބަންޑާރަނައިބުގެ އޮފީހުގެ ދަށުން ހިންގާ ސިވިލް ރައިޓްސް އޮފީސް އުފެއްދީ، ނޮވެމްބަރު، 2023، ގަ އެވެ. އޭގެ ފަހުން 2023 އަދި އަދި 2024 ވަނަ އަހަރު އެ އޮފީހަށް 28 މައްސަލަ ހުށަހެޅި އެވެ.
އެކަމަކު، ސިވިލް ރައިޓްސް އޮފީހަށް މިދިޔަ އަހަރު ހުށަހެޅި މައްސަލަތައް ވަނީ ވަރަށް ބޮޑަށް މަދުވެފަ އެވެ. ބަންޑާރަނައިބުގެ އޮފީހުގެ އަހަރީ ރިޕޯޓުގައި ބުނެފައި ވަނީ ސިވިލް ރައިޓްސް އޮފީހަށް މިދިޔަ އަހަރު ހުށަހެޅީ އެންމެ ތިން މައްސަލަ ކަމަށެވެ. ނަމަވެސް އެއީ ކޮން ބާވަތްތަކެއްގެ މައްސަލަތަކެއް ކަމެއް ބަންޑާރަނައިބުގެ އޮފީހަކުން ނުބުނެ އެވެ.
ބަންޑާރަނައިބުގެ އޮފީހުގެ އަހަރީ ރިޕޯޓުތަކުން ދައްކާ ގޮތުގައި 2024 ވަނަ އަހަރު ހުށަހެޅި 28 މައްސަލައިގެ ތެރެއިން ޖަވާބު ދެވުނީ އެންމެ 13 މައްސަލައަކަށެވެ. މިދިޔަ އަހަރު ހަ މައްސަލައަކަށް ޖަވާބު ފޮނުވި އެވެ. އެއީ 2024 ގައި ހުށަހެޅި ބައެއް މައްސަލަތަކަށް ފޮނުވި ޖަވާބު ވެސް ހިމެނޭ ގޮތަށެވެ.
ސިވިލް ރައިޓްސް އޮފީސް އުފެއްދުމަށްފަހު މައިގަނޑު ހަތަރު މެންޑޭޓެއް ސަރުކާރުން އެ އޮފީހާ ހަވާލު ކުރި އެވެ. އެއީ:
- ގާނޫނު އަސާސީއާއި ގާނޫނުތަކުން ކަށަވަރުކޮށްދޭ މަދަނީ ހައްގުތައް ރައްކާތެރިކޮށް، އެ ހައްގުތައް ރައްޔިތުންނަށް ލިބިދޭކަން ކަށަވަރު ކުރުމާ ގުޅޭ ސަރުކާރުގެ ސިޔާސަތު ވިލަރެސް ކުރުން
- މަދަނީ ހައްގުތައް ލިބިދިނުމުގައި ކުރެވޭ ތަފާތުކުރުންތަކާ ގުޅޭ ޝަކުވާތަކާއި މަދަނީ ހައްގުތައް ލިބިނުދީ ހިފަހައްޓާ ޝަކުވާތައް ސަރުކާރަށް ހުށަހަޅާނެ ރަސްމީ ނިޒާމެއް ގާއިމުކުރުން
- މުއައްސަސާތަކުން ހިދުމަތްތައް ފޯރުކޮށްދިނުމުގައި މަދަނީ ހައްގުތައް ހިމާޔަތްކޮށް ކަށަވަރުކޮށްދެވެނޭ ގޮތަށް ކަންކަން ކުރަމުންދޭތޯ ބެލުން
- މަދަނީ ހައްގުތައް ހިމާޔަތް ކުރަން ސަރުކާރުގެ އިދާރާތަކުން ކުރާ މަސައްކަތްތައް މުރާޖާކޮށް، ކަމާ ގުޅޭ މަޝްވަރާއާއި ލަފާ ދިނުން
މި ނޫހަށް ދެއްވި އިންޓަވިއުއެއްގައި ބަންޑާރަނައިބު އަހުމަދު އުޝާމް ކުރިން ވިދާޅުވެފައި ވަނީ، ސިވިލް ރައީސް އޮފީހުން އެއްވެސް މައްސަލައެއް ތަހުގީގެއް ނުކުރާނެ ކަމަށެވެ. އެކަމަކު، ކޮންމެ މައްސަލައަކަށް ވެސް އެ އޮފީހުން ޖަވާބެއް ފޮނުވާނެ ކަމަށް އުޝާމް ވިދާޅުވި އެވެ.
"އެ އޮފީހަކީ ތަހުގީގު ކުރުމުގެ ބާރެއް އޮތް ތަނެއް ނޫން، [އެއްވެސް ކަމެއް] ތަހުގީގެއް ނުވެސް ކުރާނެ،" އުޝާމް ވިދާޅުވެފައިވެ އެވެ.
