އައްޑޫގައި ހިނގި ހާދިސާއެއްގައި ބޮލަށް ސީރިއަސް އަނިޔާއެއް ލިބުނު މީހަކަށް ޑޮކްޓަރު ލިޔެދިން ބޭސް މުޅި އައްޑޫއިން ވެސް ނުލިބިގެން އެކަމުގެ ކަންބޮޑުވުން އައްޑޫ މީދޫ ދާއިރާގެ މެންބަރު، އަބްދުއްރަހުމާން އިއްޔެ ފާޅުކުރެއްވި އެވެ.
އަބްދުއްރަހުމާން ވިދާޅުވީ އައްޑޫ ގަރާޖެއްގައި އާދީއްތަ ދުވަހުގެ ރޭ ހިނގި ހާދިސާގައި އަނިޔާވި މީހާގެ ބޮލަށް ސީރިއަސް ޒަހަމެއްވެފައިވާ ކަމަށާއި، އެ ޒަހަމުގެ ސަބަބުން އެ މީހާގެ ސިކުނޑި ދުޅަވަމުންދިޔަ ކަމަށެވެ. އައްޑޫއިން ނުލިބުނު ބޭހަކީ އެ މީހާގެ ސިކުނޑީގެ ދުޅަ ތިރިކުރަން ދީފައި ހުރި ބޭހެއް ކަމަށް އަބްދުއްރަހްމާން ވިދާޅުވި އެވެ.
"ސިކުނޑި ދުޅާ ވާތީ ދުޅަ ތިރިކުރަން ދީފައި ހުރި ބޭހެއް އެއީ، ގަންނާކަށް ނުލިބުނު، މުޅި އައްޑޫގެ ހުރިހާ ފާމަސީއެއް ބެލިން، ގަންނާކަށް ނުލިބުނު،" އަބްދުއްރަހްމާން ވިދާޅުވި އެވެ.
އެ މީހާއަށް ޑޮކްޓަރު ލިޔެދީފައި ހުރީ ސިކުނޑިއަށް ލިބޭ ގެއްލުމެއްގެ ސަބަބުން ކުރިމަތިވާ ގެއްލުންތައް ކުޑަކޮށްދޭ ނިމޮޑިޕިނީން 30 އެމްޖީ އެވެ. އެ ބޭހަކީ ސިކުނޑި ތެރެއަށް ލޭ އެޅުން ފަދަ ނުރައްކާ ހާލަތްތައް ކުރިމަތިވެފައި ތިބޭ މީހުންނަށް ދޭ ބޭހެކެވެ.
އަބްދުއްރަހްމާން ވިދާޅުވީ އެ ހާދިސާ ހިނގީ، އަނިޔާ ލިބުނު މީހާ، އާދީއްތަ ދުވަހުގެ ރޭ 12:30 ހާއިރު ގަރާޖެއްގައި މަސައްކަތް ކުރަމުން ދަނިކޮށް ވިއްސައިގެން އައި އިސްކުރެއް އޭނާގެ ލޮލުގައި ޖެހުމުގެ ސަބަބުން ކުއްލިއަކަށް ބިންމައްޗަށް ވެއްޓުނު ވަގުތު ކޮންކްރީޓުގަނޑެއްގައި އޭނާގެ ބޯ ޖެހިގެން ކަމަށެވެ. އެ ގަރާޖަކީ ކާރު ދޮވެ، މެރިން އިންޖީނު މަރާމާރުކުރުން ފަދަ މަސައްކަތްތައް ކުރާ ތަނެއް ކަމަށް އަބްދުއްރަހްމާން ވިދާޅުވި އެވެ.
އެ ހާދިސާގައި އަނިޔާވި މީހާގެ ބޯ ފަޅައިގެންދިޔަ ނަމަވެސް، ބޮޑަށް އަނިޔާވެފައި ހުރީ ބޮލުގެ އެތެރެއަށް ކަމަށް އަބްދުއްރަހްމާން ވިދާޅުވި އެވެ. އެ ހާދިސާ ހިނގުމާއެކު އެ މީހާ ހޮސްޕިޓަލަށް ގެންދިޔަ ނަމަވެސް، އޭރު ވެސް އޭނާގެ ހޭ ނެތް ކަމަށް އަބްދުއްރަހްމާން ވިދާޅުވި އެވެ.
އެ މީހާއަށް އިތުރު ފަރުވާ ދިނުމަށް މިހާރު ވަނީ އެއާ އެމްބިއުލާންސްގައި މާލެ ގެނެސްފަ އެވެ.
އަބްދުއްރަހްމާން ވިދާޅުވީ ބޭސް ނުލިބުމުގެ މައްސަލަ އައްޑޫގައި ވަރަށް ބޮޑު ކަމަށެވެ. އެގޮތުން، އާންމު ބަލިތަކަށް ބޭނުންކުރާ ބޭސްތައް ވެސް އައްޑޫއިން ނުލިބޭ ކަމަށް އޭނާ ވިދާޅުވި އެވެ.
"އައްޑޫ އިކުއެޓޯރިއަލް ހޮސްޕިޓަލުގައި ހުންނަ އެސްޓީއޯ ފާމަސީން އުފަމޯލް ގުޅައެއް ވެސް ގަންނަން ނުލިބުނު، ބޭސް ނުލިބުމުގެ މައްސަލަ ވަރަށް ބޮޑު، ވަރަށް ގިނަ ބޭސް ނުލިބޭ، ފަނި ބޭސް ވެސް ނުލިބޭ، ބޭސް ނުލިބުމުގެ ޝަކުވާ އައްޑޫގެ ރައްޔިތުން ވަރަށް ބޮޑަށް ކުރޭ،" އަބްދުއްރަހްމާން ވިދާޅުވި އެވެ.
ބޭސް ނުލިބުމުގެ މައްސަލަ ބޮޑުވެފައިވާއިރު، ސަރުކާރުން ބުނަމުން ދަނީ ބޭސް ނުލިބުމުގެ މައްސަލައަށް ހައްލު ހޯދުމަށްޓަކައި މަސައްކަތް ކުރަމުންދާ ކަމަށެވެ.
އެގޮތުން ރައީސުލްޖުމްހޫރިއްޔާ މުހައްމަދު މުއިއްޒުއަށް ލިބިވަޑައިގަންނަވާ ބާރުގެ ދަށުން މިދިޔަ ސެޕްޓެމްބަރު މަހު އެމަނިކުފާނު ވަނީ ބޭސް އެތެރެކޮށް ވިއްކުމަށް ހާއްސަ ކުންފުންޏެއް އުފައްދަވައިފަ އެވެ. އަދި، އެސްޓީއޯގެ ދަށުން ހިންގަމުންދާ ހުރިހާ ބޭސް ފިހާރައެއް ވެސް އެ ކުންފުނީގެ ދަށަށް ބަދަލު ކުރުމުގެ މަސައްކަތް ސަރުކާރުން ވަނީ ފަށައިފަ އެވެ.
ސަރުކާރުން އަމާޒު ހިފާފައި ވަނީ ފެބްރުއަރީ 15، ގެ ކުރިން ހުރިހާ ފާމަސީތަކެއް އެ ކުންފުނީގެ ދަށަށް ބަދަލު ކުރުމަށެވެ.
ބޭހުގެ މައްސަލައަށް ހައްލެއް ހޯދުމަށް މަސައްކަތް ކުރަމުންދާ ކަމަށް ސަރުކާރުން ބުނި ނަމަވެސް، ބޭސް ނުލިބުމުގެ ޝަކުވާތައް މަދެއް ނުވެ އެވެ. އެ މައްސަލައިގައި މިދިޔަ ނޮވެމްބަރު 26، ގައި އިދިކޮޅު އެމްޑީޕީގެ މެންބަރު، މުހައްމަދު އިބްރާހިމް (ކުޑޫ) މަޖިލީހަށް ހުށަހެޅުއްވި ކުއްލި މައްސަލަ ވެސް ޕީއެންސީ މެންބަރުން ވަނީ ބޭރުކޮށްލައިފަ އެވެ.
