ސިޑްނީ، އޮސްޓްރޭލިއާ (ފެބްރުއަރީ 7) - ފަތުރުވެރިންނަށް އޮސްޓްރޭލިއާގެ ބޯޑަރުތައް ހުޅުވާލާނީ ފެބްރުއަރީ 21 ވަނަ ދުވަހުގައި ކަމަށް ބޮޑު ވަޒީރު ސްކޮޓް މޮރިސަން އިއުލާނު ކުރައްވައިފި އެވެ.
"އޮސްޓްރޭލިއާގެ ބޯޑަރުތައް ބަންދު ކުރަން އަޅުގަނޑުމެން ނިންމިތާ ގާތްގަނޑަކަށް ދެ އަހަރުވީ،" ގައުމީ ސަލާމަތާ ގުޅޭ ކެބިނެޓް ބައްދަލުވުމަކަށް ފަހު މޮރިސަން ވިދާޅުވި އެވެ.
އެމަނިކުފާނު ވިދާޅުވީ ވިސާ އޮތް ހުރިހާ އެންމެންނަށް "މި އަހަރުގެ ފެބްރުއަރީ 21 ވަނަ ދުވަހު" އޮސްޓްރޭލިއާގެ ބޯޑަރުތައް ހުޅުވާލާނެ އެވެ. ނަމަވެސް އޮސްޓްރޭލިއާއަށް އެތެރެވެވޭނީ ކޮވިޑް ވެކްސިންގެ ދެ ޑޯޒް ފުރިހަމަކޮށްފައިވާ މީހުންނަށް އެކަންޏެވެ.
ކޮވިޑް ބަލިމަޑުކަމާ ގުޅިގެން އޮސްޓްރޭލިއާއިން ބޯޑަރުތައް ބަންދުކުރީ މާޗް 2020 ވަނަ އަހަރު އެވެ. އޭގެ ފަހުން އޮސްޓްރޭލިއާ ރައްޔިތުންނަށް ގައުމުން ބޭރަށް ދިޔުމަށް ވެސް ދަތިތަކެއް ކުރިމަތިވި އެވެ.
ހަރުކަށި ބޯޑަރު ސިޔާސަތުގެ ސަބަބުން އޮސްޓްރޭލިއާގެ ރައްޔިތުންނަށް އެނބުރި ގައުމަށް ނުދެވި އެހެން ގައުމުތަކުގައި ތާށިވެފައި ވެސް އެބަ ތިއްބެވެ. އޭގެ އިތުރުން މަލްޓި ބިލިއަން ޑޮލަރުގެ ފަތުރުވެރިކަމުގެ ސިނާއަތް ވެސް އޮތީ ހުއްޓިފަ އެވެ.
އޮސްޓްރޭލިއަން ޗެމްބާ އޮފް ކޮމާސް އެންޑް އިންޑަސްޓްރީން އަންދާޒާ ކުރާ ގޮތުގައި ބޯޑަރު ބަންދުކޮށްފައި ހުންނަ ކޮންމެ މަހަކު 2.6 ބިލިއަން ޑޮލަރުގެ ގެއްލުމެއް ލިބެ އެވެ.
އެހެންވެ، އޮސްޓްރޭލިއާގެ ރައްޔިތުންނަށް ބޯޑަރާ ގުޅޭ ލުއިތައް ދިނުމަށް ފަހު، ދިގު މުއްދަތަށް އޮސްޓްރޭލިއާގެ ދިރިއުޅޭ އެހެން ގައުމުތަކުގެ މީހުންނާއި ދަރިވަރުންނަށް ވެސް ދާދި ފަހުން ލުއި ދޭން ފެށި އެވެ.
ފަތުރުވެރިންނަށް ބޯޑަރު ހުޅުވާލަން ނިންމުމާ އެކު، ބޯޑަރާ ގުޅިގެން އެޅި ހުރިހާ ފިޔަވަޅުތަކެއް ގާތްގަނޑަކަށް އުވިގެން ދާނެ އެވެ. އޮސްޓްރޭލިއާއިން ވަނީ "ޒީރޯ ކޮވިޑް"ގެ ސިޔާސަތު ދޫކޮށްލައި، ވެކްސިން ޖެހުމަށް ބާރު އަޅައި، ކޮވިޑް ކޭސްތައް ޓްރޭސް ކުރުން ވެސް ހުއްޓާލާފަ އެވެ.
މިހާރު ފަތުރުވެރިންނަށް ބަންދުކޮށްފައި ހުރީ ވަރަށް މަދު ގައުމުތަކެކެވެ. އޭގެ ތެރޭގައި ޖަޕާން، ޗައިނާ، ނިއުޒީލޭންޑް އަދި ޕެސިފިކް ކަނޑުގެ ބައެއް ޖަޒީރާ ގައުމުތައް ފާހަގަކުރެވެ އެވެ.
