ސްޕެނިޝް ލަލީގާގައި ލަސް ޕަލްމާސް އަށް ކުޅެފައިވާ ހުނަރުވެރި މިޑްފީލްޑަރު ޓަނާ ޑޮމިންގޭޒް، ރާއްޖޭގެ ލީގު ޗެމްޕިއަން، މާޒިޔާ ސްޕޯޓްސް އެންޑް ރެކްރިއޭޝަން އަށް މިއަދު ސޮއިކޮށްފި އެވެ.
ޓަނާ، 31، މާޒިޔާ އަށް ސޮއިކުރިކަން އިއުލާނުކުރީ މިއަދު ހެނދުނު ގަލޮޅު ދަނޑުގައި ބޭއްވި ހާއްސަ އިވެންޓެއްގަ އެވެ. މިދިޔަ ބުރާސްފަތި ދުވަހު މާޒިޔާ އިން ވަނީ ޔޫރަޕާއި އެފްރިކާ އަދި އޭޝިއާގެ މަތީ ފަންތީގައި މަސައްކަތްކޮށްފައިވާ ކޯޗެއް ކަމަށްވާ ސާބިއާގެ މަޔޮޑްރަގް ޖެސިކް ގެނެސްފަ އެވެ. އަދި އޭނާއާ އެކު ޓްރެއިނަރު/ފިޓްނަސް ކޯޗު ގޯރާން ގުޒިޖާން ވެސް މާޒިޔާއާ ގުޅުނެވެ.
މާޒިޔާ އިން މިއަދު ސޮއިކުރި ޓަނާ ވަނީ ޔޫތު ކެރިއަރުގައި ލަސް ޕަލްމާސް އާއި ވަލޮޑޮލިޑަށް ކުޅެފަ އެވެ. ސީނިއާ ކެރިއަރު ފެށީ 2009 ވަނަ އަހަރު ސްޕެއިނުގެ ކްލަބެއް ކަމަށްވާ ވިލަ ސަންޓާ ބްރިގިޑާ އިންނެވެ.
އޭގެ ފަހުން ވެސިންޑާރިއޯ ބީ ޓީމާއި ސީނިއާ ޓީމަށް 2010 އިން 2012 އަށް ކުޅެފައި، ޓަނާ ދެން ގުޅުނީ ލަސް ޕަލްމާސް ސީ ޓީމަށެވެ.
ބާސެލޯނާއާ ދެކޮޅަށް ސްޕެނިޝް ލީގުގައި ކުޅުނު މެޗެއްގެ ތެެރެއިން ޓަނާ (ކ) ލިއޮނަލް މެސީ އަތުން ބޯޅަ ހޯދަން މަސައްކަތްކުރަނީ.
ލަސް ޕަލްމާސް ސީނިއާ ޓީމަށް 2013 ވަނަ އަހަރު ޕްރޮމޯޓްވެ، ގަވާއިދުން އެ ޓީމަށް ކުޅެފައިވެ އެވެ. ލަސް ޕަލްމާސްއާ އެކު ލަލީގާގައި ގިނަ މެޗުތަކެއްގައި ކުޅުނު ޓަނާ ވަނީ 2020 އާ ހަމައަށް އެ ޓީމަށް 139 މެޗުން 13 ގޯލު ޖަހައި 13 ގޯލު ޖަހަން ފުރުސަތު ތަނަވަސްކޮށްދީފަ އެވެ.
ލަސް ޕަލްމާސް އަށް ކުޅެމުން ޓަނާ ވަނީ 2019 ވަނަ އަހަރު ލޯން ޑީލެއްގައި ޗައިނާގެ ޒެޝިއާން ގްރީންޓައުން އަށް ކުޅެފަ އެވެ. އެންމެ ފަހުން ޓަނާ ކުޅުނީ ސްޕެއިންގެ ތިން ވަނަ ޑިވިޝަންގެ އަލްބަސޭޓޭ އަށެވެ.
ދުނިޔޭގެ ނިސްބަތުން ވެސް މަޝްހޫރު ގިނަ ކުޅުންތެރިންތަކެއް ކުޅޭ ލީގެއް ކަމަށްވާ ލަލީގާގައި ޓަނާ ކުޅެފައިވަނީ 2015 އިން 2018 އަށެވެ. ޖުމްލަ ތިން ސީޒަން ލަލީގާގައި ކުޅުނު ޓަނާ ވަނީ އެ ލީގުގައި 83 މެޗުން 10 ގޯލު ޖަހައި 10 ގޯލު ޖަހަން ފުރުސަތު ތަނަވަސްކޮށްދިނެވެ.
ޓަނާ، ލަލީގާގައި ގޯލު ޖެހި ޓީމުތަކަށް ބަލާއިރު، ރެއާލް މެޑްރިޑް، ގްރަނާޑާ، އެތުލެޓިކް ބިލްބާއޯ، މަލާގާ، ގެޓަފޭ އަދި ރެއާލް ސޮސިއެޑާޑް ހިމެނެ އެވެ.
ލަލީގާގައި ޓަނާ ޖެހި މި ގޯލުތަކުގެ ތެެރެއިން އެންމެ ހާއްސަ ދެ ގޯލަކީ 2016 ވަނަ އަހަރު ލަސް ޕަލްމާސް ދަނޑުގައި ރެއާލް މެޑްރިޑް ކޮޅަށް ޖެހި ގޯލާއި 2017 ވަނަ އަހަރު ރެއާލް މެޑްރިޑް ދަނޑުގައި އެ ޓީމު ކޮޅަށް ޖެހި ގޯލެވެ. އެ ދެ މެޗުން ވެސް ލަސް ޕަލްމާސް ވަނީ ރެއާލާ އެއްވަރުކޮށްފަ އެވެ.
ރެއާލް ކޮޅަށް ގޯލު ޖެހުމަށް ފަހު ޓަނާ އުފާފާޅުކުރަނީ.-- ފޮޓޯ: ލަލީގާ
ފަސް ހާހަށް ވުރެ ގިނަ މިނިޓް ލަލީގާގެ މެޗުތަކުގައި ކުޅެފައިވާ ޓަނާ ވަނީ ސްޕެނިޝް ކަޕް, ކޮޕަ ޑެލްރޭގައި ވެސް 10 މެޗު ކުޅެފަ އެވެ. އަދި ޗައިނާ ޒެޝިއާން އަށް ލޯނަކަށް ކުޅުނުއިރު، ޗައިނީސް އެފްއޭ ކަޕްގައި ވެސް ކުޅުނެވެ.
ޓަނާ، މިއަދު މާޒިޔާ އަށް ސޮއިކުރިއިރު، އޭނާ ވެގެންދާނީ ކައިރި މުސްތަގުބަލެއްގައި ޔޫރަޕްގެ އެންމެ މަތީ ފަންތީގެ ލީގެއްގައި ކުޅުމަށް ފަހު ރާއްޖޭގެ ކްލަބަކަށް ގެނައި ފުރަތަމަ ކުޅުންތެރިޔާ އަށެވެ.
މީގެ ކުރިން ޗެލްސީ އާއި ލިވަޕޫލްގެ ޔޫތު ޓީމުތަކަށް ކުޅެފައިވާ ކުޅުންތެރިން ނިއު ރޭޑިއަންޓަށް ކުޅެފައިވެ އެވެ.
މާޒިޔާ އިން ސާބިއާގެ ކޯޗު ޖެސިކާއި ސްޕެއިނުގެ މިޑްފީލްޑަރު ޓަނާ ގެނެސް، ބޮޑު އިންވެސްޓްމަންޓެއް ކޮށްފައި މިވަނީ މި ފަހަރުގެ ދިވެހި ޕްރިމިއާ ލީގާއި އޭއެފްސީ ކަޕްގައި ރަނގަޅު ނަތީޖާތަކެއް ނެރުމުގެ ޓާގެޓްގަ އެވެ.
ސްޕެނިޝް ލީގުގެ މެޗެއްގެ ތެރެއިން ޓަނާ (ވ) ރެއާލްގެ ޓޯނީ ކްރޫސް ކައިރިން ބޯޅަ ހިފައިގެންދަނީ.-- ފޮޓޯ: ގެޓީއިމޭޖަސް
ސީޒަނުގެ ފުރަތަމަ މުބާރާތް ޕްރެޒިޑެންޓްސް ކަޕްގެ ފައިނަލް މެޗު ހިމެނޭހެން މާޒިޔާ ވަނީ ޖެހިޖެހިގެން ތިން މެޗުން ބަލިވެފަ އެވެ. އެ ނަތީޖާތަކަށް ފަހު މާޒިޔާގެ ކޯޗަކަށް ހުރި މުހައްމަދު ޝިޔާޒް (މޯހަން) ވަކިކޮށް އެ މަގާމަށް ސާބިއާގެ ކޯޗު ޖެސިކް ގެނައީ އެވެ.
ރާއްޖޭގެ ލީގު، ދިވެހި ޕްރިމިއާ ލީގު މި މަހު 16 ވަނަ ދުވަހު ފަށަން ނިންމާފައިވާއިރު، އޭއެފްސީ ކަޕްގައި މާޒިޔާ ކުޅޭ ދެކުނު އޭޝިއާގެ ގްރޫޕް މެޗުތައް އޮތީ އަންނަ މެއި މަހު އެވެ.
