ގާތްގަނޑަކަށް 175 މިލިއަން ރުފިޔާ ހަރަދުކޮށްގެން ތިން ރަށެއްގައި ހޮސްޕިޓަލުގެ އާ އިމާރާތްތަކެއް އެޅުމަށް ފައިނޭންސް މިނިސްޓްރީގެ ފަރާތުން އިއްޔެ ބީލަމަށް ހުޅުވާލައިފި އެވެ.
ހއ. އިހަވަންދޫ އާއި ނ. ކެނދިކުޅުދޫ އާއި ޅ. ހިންނަވަރުގައި ހޮސްޕިޓަލު އެޅުމަށް އިއްޔެ ބީލަމަށް ހުޅުވާލިއިރު، ސަރުކާރުން ބުނީ އެ ޕްރޮޖެކްޓުތަކަށް ފައިނޭންސް ކުރަންޖެހޭނީ ޕްރޮޖެކްޓުތައް ކާމިޔާބު ކުރާ ފަރާތްތަކުން ކަމަށެވެ.
އެކަމާ ގުޅިގެން ފިނޭންސުން ކޮށްފައިވާ އިއުލާނުގައިވާ ގޮތުން މިއަދުން ފެށިގެން އަންނަ ފެބްރުއަރީ 24، އާ ހަމަޔަށް ބީލަމުގައި ބައިވެރިވުމުގެ ފުރުސަތު ވަނީ ހުޅުވާލާފަ އެވެ. ބީލަން ހުޅުވާނީ ފެބުރުއަރީ 28، ގަ އެވެ.
މި ބީލަމުގައި ބައިވެރިވުމަށް ބިޑު ސެކިއުރިޓީގެ ގޮތުގައި 690،000ރ. ދައްކަން ޖެހެ އެވެ. މި އަދަދު ދިވެހި ރުފިޔާއިން ނުވަތަ ޔޫއެސް ޑޮލަރުން ދެއްކޭނެ ކަމަށާއި އަދި އޭގެ މުއްދަތަކީ ބިޑު ހުޅުވާ ތާރީހުން ފެށިގެން 148 ދުވަސް ކަމަށް އިއުލާނުގައިވެ އެވެ.
އިހަވަންދޫގައި ސަރުކާރުން އަޅާ ހޮސްޕިޓަލަށް ޖުމްލަ 71،114،130 މިލިއަން ރުފިޔާ ކުރިޔަށް އޮތް ތިން އަހަރު ތެރޭ ހޭދަވާނޭ ކަމަށް ލަފާކޮށްފައިވެ އެވެ. ކެނދިކުޅުދޫގައި އަޅާ ހޮސްޕިޓަލަށް ޖުމްލަ 52،113،132 މިލިއަން ރުފިޔާ ކުރިޔަށް އޮތް ތިން އަހަރު ތެރޭ ހަރަދުވާނެ ކަމަށް ލަފާކޮށްފައިވާއިރު ހިންނަވަރުގެ ހޮސްޕިޓަލަށް 52،113،132 ރުފިޔާ ކުރިޔަށް އޮތް ތިން އަހަރު ހޭދަވާނެ ކަމަށް މި އަހަރުގެ ބަޖެޓުގައި ވަނީ ލަފާކޮށްފަ އެވެ.
މި ރަށްތަކުގެ އާބާދީއަށް ބަލާލާއިރު، އެންމެ އާބާދީ ބޮޑު ރަށަކީ 5،000 އެއްހާ މީހުން ދިރިއުޅޭ ޅ. ހިންނަވަރެެވެ. އިހަވަންދޫގައި 3،000 އާއި 3،500 އާ ދެމެދުގެ އާބާދީއެއް އޮންނަ އިރު ކެނދިކުޅުދޫގައި 1،500 އާއި 2،000 ދެމެދު އަދަދެއްގެ މީހުންގެ އާބާދީއެއް އޮވެ އެވެ.
އެ ރަށްތަކުގެ ތެރެއިން އިހަވަންދޫއަކީ އުލިގަން، ހޯރަފުށި، ތުރާކުނު އަދި މޮޅަދޫ ހިމެނޭހެން ހއ. އަތޮޅާ ގުދުރަތީގޮތުން ވަކިން އޮންނަ އިހަވަންދިއްޕޮޅުގެ ރަށެކެވެ.
އިހަވަންދިއްޕޮޅަށް ނިސްބަތްވާ ގިނަ ރައްޔިތުންތަކެއްގެ ޝަކުވާ އަބަދު ވެސް ސިއްހީ ފަރުވާ ހޯދުމަށްޓަކައި އަތޮޅުން ނިކުމެގެން ދިއްދޫގައި ހުންނަ އަތޮޅު ހޮސްޕިޓަލަށް ކުރަން ޖެހޭ ދިގު ރާސްތާ ކަނޑު ދަތުރާ ހެދި އޮވެ އެވެ.
އިހަވަންދޫގައި އަޅާ ހޮސްޕިޓަލުގެ ފައިދާ އިހަވަންދިއްޕޮޅުގެ ފަސް ރަށުގައި ދިރިއުޅޭ ގާތްގަނޑަކަށް 6،000 އެއްހާ މީހުންނަށް ކުރާނެ ކަމަށް ބެލެވެ އެވެ. ކެނދިކުޅުދޫގައި އަޅާ ހޮސްޕިޓަލާއެކުގައި ވެސް އެރަށާއި ކައިރީގައި ދެން ހުރި ރަށްތައް ކަމުގައިވާ ހެނބަދޫ، މާޅެންދޫ، ކުޑަފަރީ އަދި ލަންދޫގައި ދިރިއުޅޭ 4،900 އެއްހާ މީހުންނަށް ފައިދާކުރާނޭ ކަމަށް ބެލެވެ އެވެ.
