ކުރީގެ ރައީސް އަބްދުﷲ ޔާމީނަށް ދައުވާކޮށް ކްރިމިނަލް ކޯޓަށް ހުށަހަޅާފައިވާ މައްސަލަ ހިމެނޭ ގޮތުން، ޖިނާއީ މައްސަލަތައް ކޯޓްތަކުގެ ތާވަލާ އެއްގޮތަށް ކުރިއަށް ނުދާކަމުގެ ކަންބޮޑުވުން ފާޅުކޮށް، ކަމާ ބެހޭ މުއައްސަސާތަކާ ސުވާލުކުރަން ރައްޔިތުންގެ މަޖިލީހުގެ ޖުޑިޝަރީ ކޮމިޓީން މިއަދު ފާސްކޮށްފި އެވެ.
މަޖިލިސް ޗުއްޓީގައި އޮއްވައި، ޖުޑިޝަރީ ކޮމިޓީން މިއަދު ބައްދަލުވުމެއް ބޭއްވީ އެ ކޮމިޓީގެ މުގައްރިރު އަދި މާފަންނު އުތުރު ދާއިރާގެ އެމްޑީޕީ މެމްބަރު އިމްތިޔާޒް ފަހުމީ (އިންތި) ވިދާޅުވި ގޮތުގައި، ކޯޓްތަކުގެ ތާވަލާ އެއްގޮތަށް ޖިނާއީ މައްސަލަތައް ކުރިއަށް ނުދާ ކަމުގެ ޝަކުވާ ވަރަށް ގިނަ ފަރާތްތަކުން އުފުލަމުން ދާތީ އެވެ. ކޮމިޓީގެ މެމްބަރުން ވެސް އެ ޝަކުވާ އޭނާއަށް ހުށަހަޅުއްވާފައިވާ ކަމަށް އިންތި ވިދާޅުވި އެވެ.
"މެމްބަރުންގެ އެދިވަޑައިގަތުމަކަށް އަޅުގަނޑު މިއަދު މި ބައްދަލުވުން މި ބޭއްވީ،" ބައްދަލުވުން ފައްޓަވަމުން އޭނާ ވިދާޅުވި އެވެ.
ޖިނާއީ މައްސަލަތައް ތާވާލާ އެއްގޮތަށް ކުރިއަށް ނުދާ މައްސަލައިގައި މުއައްސަސާތަކުގެ ބޭފުޅުން ހާޒިރުކޮށް ސުވާލުުކުރަން ހުށަހެޅުއްވީ މާފަންނު ހުޅަނގު ދާއިރާގެ މެމްބަރު އަދި އެމްޑީޕީގެ ޗެއާޕާސަން ހަސަން ލަތީފެވެ. އެ ހުށަހެޅުއްވުމަށް ތާއީދުކުރެއްވީ ހެންވޭރު އުތުރު ދާއިރާގެ އެމްޑީޕީ މެމްބަރު އިބްރާހީމް މުއިއްޒެވެ.
ކޮމިޓީން ސުވާލުކުރާ މުއައްސަސާތައް
- ފުލުހުންގެ އިދާރާ
- ޕްރޮސެކިއުޓާ ޖެނެރަލްގެ އޮފީސް
- ޕޮލިސް ބޯޑް
- ޑިޕާޓްމެންޓް އޮފް ޖުޑިޝަލް އެޑްމިނިސްޓްރޭޝަން (ޑީޖޭއޭ)
- ޖުޑިޝަލް ސާވިސް ކޮމިޝަން (ޖޭއެސްސީ)
ހަސަން ލަތީފު ވިދާޅުވި ގޮތުގައި ކޮމިޓީން ފުލުހުންނާ ސުވާލުކުރަން އޭނާ އެދިވަޑައިގެންނެވީ މައްސަލައެއް އުފެދޭ ހިސާބުން އަމަލުކުރަން އޮންނަ އުސޫލުތަކަށް ފުލުހުން އަމަލު ކުރަމުންދޭތޯ ބެލުމަށާއި އެގޮތަށް އަމަލު ނުކުރެވޭ ނަމަ ނުކުރެވޭ ސަބަބުތައް އޮޅުން ފިލުވުމަށެވެ. ޕީޖީ އޮފީހުގެ ބޭފުޅުންނާ ސުވާލުކުރަން އެދިވަޑައިގެންނެވީ އޭނާ ވިދާޅުވި ގޮތުގައި، މައްސަލަތަކުގައި ދައުވާކުރަން ފޮނުވުމުގައި އެ އޮފީހަށް ދަތިވަނީ ކޮން ކަމެއްތޯ ބެލުމަށެވެ.
ތިންވަނަ މުއައްސަސާއެއްގެ ގޮތުގައި ޕޮލިސް ބޯޑްގެ މެމްބަރުންނާ ސުވާލުކުރަން އެދިވަޑައިގެންނެވީ އެ ބޯޑްގެ މަސައްކަތަށް ދަތިވާ ކަންތައްތަކެއް ހުންނަ ކަމަށް މެމްބަރުންގެ ފަރާތުން އަޑުއިވިވަޑައިގެންފައި ވާތީ އެވެ. އެ ބޯޑްގެ ކަންތައްތައް ބެލެހެއްޓުމަކީ އާއްމު އުސޫލުގައި މަޖިލީހުގެ ސަލާމަތީ ހިދުމަތްތަކާ ބެހޭ ކޮމިޓީ (241 ކޮމިޓީ) ގެ ކަމެކެވެ. އެކަމަކު ހަސަން ވިދާޅުވީ ބަލަމުން އަންނަ ވަކި މައްސަލައެއްގައި ސުވާލުކުރުމުގެ އިހުތިޔާރު ޖުޑިޝަރީ ކޮމިޓީއަށް ވެސް އޮންނާނެ އެވެ.
އޭނާ ވިދާޅުވި ގޮތުގައި ޑީޖޭއޭ އާއި ޖޭއެސްސީއާ ސުވާލުކުރަން ޖެހެނީ ޖިނާއީ އިޖުރާއަތުގެ ގާނޫނާ އެއްގޮތަށް ކޯޓުން އަމަލު ކުރަމުންދޭތޯ ބެލުމަށެވެ.
"އަޅުގަނޑު ކައިރީގައި ވެސް އަދި އަޅުގަނޑު ހިތުން ތިޔަ ހުރިހާ ރައްޔިތުންގެ ކައިރީގައި ވެސް ރައްޔިތުން ދައްކަމުންދާ ވާހަކައެއް އެއީ ރައީސް [އަބްދުﷲ] ޔާމީނުގެ ޝަރީއަތާ ގުޅޭ ގޮތުން، އަޅުގަނޑު މި ދަންނަވާ ވާހަކައަކީ ކްރިމިނަލް ކޯޓަށް މިހާރު ހުށަހަޅާފައި އޮތް ޝަރީއަތާ ގުޅޭ ގޮތުން [މައުލޫމާތު ސާފުކުރަން]،" ހަސަން ވިދާޅުވި އެވެ.
އޭނާ ވިދާޅުވި ގޮތުގައި އެ މައްސަލަ ގޮސްފައި އޮތީ ކޮން ހިސާބަކަށް ތޯ އާއި އެ މައްސަލައާ ގުޅޭ ކަންކަމުގައި، ޖިނާއީ އިޖުރާއަތުގެ ގާނޫނުގައިވާ އުސޫލުތަކާ އެއްގޮތަށް ކޯޓުން އަމަލުކުރަމުންދޭތޯ ބަަލަން ވެސް މީހުން އޭނާ އަރިހު އެދޭ ކަމަށެވެ.
