ކޮވިޑް-19 އިން ދިފާއުވުމަށް ޖަހާ ވެކްސިންގެ ތިން ވަނަ ޑޯޒު ރާއްޖޭގައި އާންމުކޮށް ހުޅުވާލައިގެން ޖަހަން ފެށީ އިއްޔެ އެވެ.
ތިން ވަނަ ޑޯޒަކަށް ރާއްޖޭގައި ޖަހަނީ ފައިޒާ ވެކްސިނެވެ. ރާއްޖޭގައި ކޮވިޝީލްޑާއި ސައިނޮފާމް ވެކްސިން ވެސް ޖަހާފައިވެ އެވެ. ނަމަވެސް އެ ވެކްސިންތައް ޖަހާފައިވާ މީހުންނަށް ވެސް ބޫސްޓާ ޑޯޒުގެ ގޮތުގައި ދޭނީ ފައިޒާ އެވެ.
ކޮވިޑް-19 ވެކްސިންގެ ބޫސްޓާ ޑޯޒް އާންމުންނަށް ޖަހަން ފެށިއިރު، އުމުރުން ދުވަސްވީ މީހުންނާއި އެހެން ނުރައްކާތެރި ބަލިތައް ހުންނަ މީހުންނަށް މިދިޔަ އަހަރުގެ ތެރޭގައި ތިން ވަނަ ޑޯޒު ޖަހަން ވަނީ ފަށައިފަ އެވެ.
ރާއްޖޭގައި އިއްޔެ ތިން ވަނަ ޑޯޒު ޖަހަންފެށިއިރު، ރާއްޖޭގެ އެންމެނަށް ވެކްސިން ޖެހޭ ވަރަށް ވެކްސިން ލިބިފައިވާ ކަމަށް ސަރުކާރުން ކުރިން ވަނީ ބުނެފަ އެވެ.
އިއްޔެ ވެކްސިން ޖަހަންފެށުމާއެކު ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ވިދާޅުވީ "ކޮވިޑް-19 ގެ އޮމިކްރޯން ވޭރިއަންޓާ ދެކޮޅަށް ބޭނުން ކުރުން އެންމެ ރަނގަޅީ ވެކްސިން" ކަމަށެވެ.
ރާއްޖޭގައި ބޫސްޓާ ޑޯޒު އާންމުކޮށް ޖަހަންފެށިއިރު 397،123 އަށް ވުރެ ގިނަ މީހުން ވަނީ ވެކްސިންގެ ފުރަތަމަ ޑޯޒު ޖަހައިފަ އެވެ. ދެ ވަނަ ޑޯޒު ޖެހީ 368،622 މީހުންނެވެ. އަދި ތިން ވަނަ ޑޯޒު 29،082 މީހުން ވަނީ ޖަހައިފަ އެވެ. މިއީ މިދިޔަ ބުރާސްފަތި ދުވަހާ ހަމައަށް ފެންނަން ހުރި ތަފާސްހިސާބެވެ.
އެޗްޕީއޭގެ ފަރާޠުން އިއްޔެ އާންމު ކުރި ބަލިޖެހުނު މީހުންގެ ތަފާސްހިސާބަށް ބަލާއިރު މުޅި ރާއްޖެއިން 102،371 މީހުންނަށް ވަނީ ކޮވިޑް ބަލި ޖެހިފަ އެވެ. އޭގެ ތެރެއިން 265 މީހުން ވަނީ މަރުވެފަ އެވެ.
މުހިންމު ބައެއް ހަބަރުތައް
- ރައްޔިތުންގެ މަޖިލީހުގެ ރައީސް އަދި ކުރީގެ ރައީސް މުހައްމަދު ނަޝީދު ރަސްމީ ދަތުރުފުޅެއްގައި ސްރީ ލަންކާއަށް ވަޑައިގެންނެވީ އިއްޔެ އެވެ. އެމަނިކުފާނުގެ ދަތުރުފުޅުގެ ބޭނުމަކީ ސްރީ ލަންކާގެ ޔޫތު ޕާލަމެންޓް އިފްތިތާހުކޮށްދެއްވުން ކަމަށް ރައްޔިތުންގެ މަޖިލީހުން ބުންޏެވެ.
- ޝަރީއަތަށް ފިލައިގެން އިނގިރޭސިވިލާތުގައި އުޅުއްވާ ކުރީގެ ޓުއަރިޒަމް މިނިސްޓަރު އަލީ ވަހީދު ރާއްޖެ ނުގެނެވިގެން އުޅެނީ އޭނާ ހައްޔަރުކުރަން ނެރުނު އަމުރުގެ އިނގިރޭސި ކޮޕީއެއް ނުލިބިގެން ކަމަށް ފުލުހުން ބުނި ނަމަވެސް އެފަދަ ލިޔުމަށް މިހާތަނަށް ފުލުހުން އެދިފައިނުވާ ކަމަށް ކްރިމިނަލް ކޯޓުން ބުނީ އިއްޔެ އެވެ.
- އިސްލާމިކް މިނިސްޓަރު ޑރ. އަހުމަދު ޒާހިރު، ވެރިކަން ހިންގާ އެމްޑީޕީގެ ފަރާތުން ކޮމަންޑޫ ދާއިރާއަށް ވާދަ ކުރައްވާ މުހައްމަދު ރާޝިދުގެ ކެމްޕެއިނުގައި އިއްޔެ ބައިވެރިވެވަޑައިގެންފި އެވެ. ޒާހިރަކީ އެ ދާއިރާގެ މަރޮއްޓަށް ނިސްބަތްވާ ބޭފުޅެވެ.
ދުވަހުގެ ކަލަންޑަރު
"އަފްނާން ރަޝީދު ބެޑްމިންޓަން އެކަޑަމީ" ގެ ފަރާތުން އަންހެނުންނަށް ހާއްސަކޮށްގެން ބާއްވާ ބެޑްމިންޓަން މުބާރާތުގައި ބައިވެރިވުމުގެ އެންމެ ފަހު ދުވަހަކީ މިއަދެވެ. އައިޝަތު އަފްނާން ރަޝީދަކީ ރާއްޖޭގެ ކުރީގެ ބެޑްމިންޓަން ޗެމްޕިއަނެކެވެ.
ދުވަހުގެ ކޯޓޭޝަން
އއ. މަންދޫ ކައިރިއަށް ފުޅި އަޅައިގެން ފީނަން ފޭބި އިނގިރޭސިވިލާތުގެ އުމުރަން ދުވަސްވެފައިހުރި އަންހެން ފަތުރުވެރިޔަކު ގެއްލުމުން އެކަމާ ގުޅިގެން ވާހަކަ ދައްކަމުން ސިފައިންގެ މީޑިއާ އޮފިޝަލަކު ބުނީ:
"ގެއްލުނު މީހާ ހޯދުމަށް އެ ސަރަޙައްދުގައި އެމްއެންޑީއެފް ކޯސްޓްގާޑުގެ ކަނޑުގެ އުޅަނދުފަހަރު މިހާރު ދަނީ ހަރަކާތްތެރިވަމުން. އަދި މިއަދު އެ ސަރަހައްދުން ދަތުރުކުރި ސީޕްލޭންތައް މެދުވެރިކޮށްވެސް އެ ސަރަޙަހައްދު ވަނީ ބަލާފައި."
ދުވަހުގެ ފޮޓޯ
މާލޭގެ ފާރެއްގައި ކުރަހާފައިހުރި ގްރެފިޓީތަކެއް މާލޭ ސިޓީ ކައުންސިލުގެ މުވައްޒަފަކު ފުހޭއިރު ފުލުހުން ބަލަހައްޓައިގެން: އިއްޔެ ފެށި އެ ހަރަކާތުގައި ގޭންގުތަކުން މާލޭގެ ފާރުގައި ލިޔެފައި ހުރި އެކި ކަހަލަ ނިޝާންތައް ވަނީ ފުހެލައިފަ -- ފޮޓޯ: މާލޭ ސިޓީ ކައުންސިލް
ދިރާސާތަކުން ކިޔާލުމަށް
"އިމްޕެކްޓް އޮފް ކޮވިޑް-19 އޮން ޕާސަންސް ވިތު ޑިސެބިލިޓީސް އިން މޯލްޑިވްސް"
އެ ދިރާސާ ޝާއިއުކޮށްފައި ވަނީ އޮކްޓޯބަރު 31، 2020 ގަ އެވެ. ދިރާސާ ލިޔުއްވާފައި ވަނީ ޑރ. ޝީނާ މޫސާ އާއި ފާތިމަތު ރިޔާޒާ އާއި ސަފޫރާ ކައުސަރު އުސްމާން އެވެ. އެ ދިރާސާއަކީ ނެޝަނަލް ހެލްތު ރިސާޗް ކައުންސިލުން ފާސްކޮށްފައިވާ ދިރާސާއެކެވެ.
އެ ދިރާސާކޮށްފައި ވަނީ ނުޅުދަދުންތެރިކަން ހުންނަ މީހުންނާއި ކޮވިޑް-19 ގެ ފަސްޓް ރެސްޕޮންޑާސް އަދި ޑޭޓާތަކަށް ބަލައިގެނެވެ. ކޮވިޑްގެ ސަބަބުން އައި ލޮކްޑައުންގައި ނުކުޅަދުންތެރިކަން ހުންނަ މީހުންނަށް ކުރިމަތިވި އުނދަގޫތަކާއި ވަޒީފާގެ ދާއިރާއިން ލިބުނު ގެއްލުމާއި ކޮވިޑްގެ ސަބަބުން ނުކުޅަދުންތެރިކަން ހުންނަ މީހުންނަށް ލިބުނު ނަފްސާނީ ގެއްލުންތަކަށް އެ ދިރާސާގައި ބަލާފައިވެ އެވެ.
