ރ. އުނގޫފާރު ނެރު އެހެން ސަރަހައްދަކަށް ބަދަލުކުރަން އެމްޓީސީސީއާ މިއަދު ހަވާލުކޮށްފި އެވެ.
ނުރައްކާތެރި އެތައް ހާދިސާއެއް ހިނގާފައިވާ އުނގުފާރު ނެރުގެ މައްސަލައަކީ އެ ރަށުގެ ބަނދަރު ހެދި ފަހުން ދިމާވީ މައްސަލައެކެވެ.
މި ނެރު ހުންނަ ތަނުގެ ސަބަބުން އެ ރަށު ބަނދަރުން ވަދެނިކުމެ ހަދާ އުޅަނދުފަހަރު ނެރު ފައިކައްޓަށް އެރުމުގެ ހާދިސާތައް ހިނގާފައި އެބަހުއްޓެވެ.
މިފަދަަ ހާދިސާތަކުގައި ބައެއް އުޅަނދުފަހަރަށް ބޮޑެތި ގެއްލުންތަކެއް ލިބިފައިވާއިރު، ބައެއް ފަހަރު ބޭނުންނުކުރެވޭ ވަރަށް ހަލާކުވެފައި އެބަހުއްޓެވެ.
އުނގޫފާރު ނެރު ރީލޮކޭޓް ކުރަން ޕްލޭނިން މިނިސްޓްރީން އެމްޓީސީސީއާ ހަވާލުކުރީ 18.58 މިލިއަން ރުފިޔާއަށެވެ.
މި މަޝްރޫއުގެ ދަށުން ނެރު ހުންނަ ތަން ބަދަލުކުރަން 31،980 ކިއުބިކް މީޓަރުގެ ނެރު ފުންކުރުމާއި، 162 މީޓަރުގެ ސަރަހައްދެއްގައި ބޭރުތޮށި ލުމާއި، ނެރުބައްތި ހަރުކުރުމުގެ މަސައްކަތް ހިމެނެ އެވެ.
މި މަސައްކަތް ނިންމުމަށް ހަމަޖެހިފައިވަނީ ހަތް މަސް ދުވަހުގެ ތެރޭގަ އެވެ.
