މެލްބަން، އޮސްޓްރޭލިއާ (ޖެނުއަރީ 10) - އޮސްޓްރޭލިއަން އޯޕަންގައި ވާދަކުރަން ދުނިޔޭގެ އެއް ވަނަ ފިރިހެން ޓެނިސް ކުޅުންތެރިޔާ ނޮވަކް ޖޮކޮވިޗްގެ ވިސާ ކެންސަލްކޮށްލި މައްސަލައިގައި އޭނާ ކޯޓަށް ހުށަހެޅި މައްސަލަ ކާމިޔާބުކޮށްފި އެވެ.
ކޮވިޑް-19ގެ ވެކްސިން މައުލޫމާތު ނުދޭތީ އޮސްޓްރޭލިއާ އިމިގްރޭޝަނުން ޖޮކޮވިޗްގެ ވިސާ ކެންސަލްކޮށްލި މައްސަލަ އޭނާ ކޯޓުގައި ކުރިއަށް ގެންދިޔައިރު، ގިނަ ފިއްތުންތަކާ ކުރިމަތިލާން ޖެހުނެވެ. އެކަމަކު، މިއަދު ކޯޓުން ނިންމީ އޮސްޓްރޭލިއާގެ އިމިގްރޭޝަނުގެ ޑިޓެންޝަނުގައި ހުރި ޖޮކޮވިޗް ދޫކޮށްލާށެވެ. ކޯޓުން ވަނީ ޑިޓެންޝަނުގައި ޖޮކޮވިޗް ބެހެއްޓިއިރު، އޭނާ އަތުން ދިޔަ ހަރަދުގެ ބަދަލުދޭން އޮސްޓްރޭލިއާ ސަރުކާރަށް އަންގައިފަ އެވެ.
ޖޮކޮވިޗަށް އެންމެ ފުރަތަމަ އޮސްޓްރޭލިއަން އޯޕަންގައި ވާދަކުރުމުގެ ފުރުސަތު ދީފައިވަނިކޮށް، އޭނާގެ ވިސާ ކެންސަލްކޮށްލައި، އަނބުރާ ގައުމަށް ފޮނުވާލަން ނިންމި އެވެ. އެކަމަކު، ޖޮކޮވިޗް އަލުން ވިސާ ހޯދަން ކުރާ މަސައްކަތުގައި އޮސްޓްރޭލިއާ ކޯޓަށް ހުށަހަޅަން ނިންމީ އެވެ. މިހާރު އެ މައްސަލަ ކޯޓުން ޖޮކޮވިޗަށް ކާމިޔާބުވެފައިވާއިރު، މުބާރާތުގައި އޭނާ ފެނުމުގެ ފުރުސަތު އެބައޮތެވެ.
މިދިޔަ ހަފްތާގައި ދުބާއީ މަގުން ޖޮކޮވިޗް އޮސްޓްރޭލިއާ އަށް ދަތުރުކުރީ ސައްހަ ވިސާއެއް ހިފައިގެން ކަމަށާއި އެކަމަކު، މެލްބަން އަށް އައުމާ އެކު އޭނާ ވިސާ ކެންސަލްކޮށްލީ ޖަވާބުދާރީވާން ފުރުސަތު ދޭން ޖެހޭ މަރުހަލާތައް ފުރިހަމަ ނުކޮށް ކަަމަށް ކޯޓުން ވަނީ ކަނޑައަޅައިފަ އެވެ. އެކަމަކު، ޖޮކޮވިޗަށް އޮސްޓްރޭލިއަން އޯޕަންގައި ކުޅެވޭނެތޯ ގޮތެއް ނިންމޭނީ އޮސްޓްރޭލިއާ އިމިގްރޭޝަނުން ވިސާއާ މެދު ކަނޑައަޅާ ގޮތަކުންނެވެ.
އޮސްޓްރޭލިއަން އޯޕަންގެ ސިއްހީ ގައިޑްލައިންތަކުގައި އޮތް ގޮތުން މުބާރާތުގައި ކުޅޭ ހުރިހާ ކުޅުންތެރިންނާއި އޮފިޝަލުން ކޮވިޑް ވެކްސިން ފުރިހަމަ ކޮށްފައިވާކަން މުބާރާތް އިންތިޒާމްކުރާ ފަރާތަށް ކަށަވަރުކޮށްދޭން ޖެހޭނެ އެވެ. އަދި ކޮވިޑް ވެކްސިން ނުޖަހާނަމަ މުބާރާތުގައި ބައިވެރިވެވޭނީ ވެކްސިން ނުޖަހަނީ ބަލި ހާލަތެއްގެ ސަަބަބުން ނޫނީ އެހެނިހެން މަގުބޫލު ސަބަބަކާ ހެދިކަން ސާބިތުކޮށްދީގެންނެވެ. އެކަން ކުރެވެން އޮތީ ސިއްހީ މާހިރެއްގެ ލަފާގެ މަތިން "މެޑިކަލް އެގްޒެމްޕްޝަން" ލިޔެކިޔުން ހުށަަހަޅައިގެންނެވެ.
ޖޮކޮވިޗަށް މެޑިކަލް އެގްޒެމްޕްޝަން ދޭން ނިންމީ މިދިޔަ މަހު ކޮވިޑަށް ޕޮޒިޓިވްވެފައިވާކަމުގެ ލިޔެކިޔުންތައް ހުށަހެޅުމުންނެެވެ. އެކަމަކު، ކޮވިޑް-19 ވެކްސިން މައްސަލައިގައި ޖޮކޮވިޗަށް އޮސްޓްރޭލިއާ އިމިގްރޭޝަނުން ފިޔަވަޅު އެޅުމުގެ ފުރުސަތު އެބައޮތެވެ. ޖޮކޮވިޗް ވަނީ އޭނާ ވެކްސިން ޖެހިކަން ސާބިތުކޮށްދޭން ކުރާ ސުވާލުތަކަށް ސީދާ ޖަވާބުދޭން ދެކޮޅު ހަދައިފަ އެވެ.
