މެލްބާން، އޮސްޓްރޭލިއާ (ޖެނުއަރީ 28) - ސްޕެއިނުގެ މަޝްހޫރު ޓެނިސް ތަރި، ކާލޯސް އަލްކަރާޒް، މިހާރު ކުރިއަށްދާ ގްރޭންޑް ސްލޭމް ޓެނިސް މުބާރާތުގެ ސެމީ ފައިނަލަށް ދަތުރުކޮށް، މި މުބާރާތުގައި އަލަށް ގަދަ ހަތަރެއްގެ ތެރޭގައި ހިމެނިއްޖެ އެވެ.
ރޮޑް ލޭވާ އެރީނާގައި ކުޅުނު ކުއާޓާ ފައިނަލް މެޗުގައި، އުމުރުން 22 އަހަރުގެ އަލްކަރާޒް ވަނީ، އަލެކްސް ޑި މިނޯ އަތުން މޮޅުވެފަ އެވެ. އަލްކަރާޒް އަތުން މި ފަހަރުގެ އޮސްޓްރޭލިއަން އޯޕަންގައި މިހާތަނަށް ސެޓެއް ވެސް ގެއްލިފައިނުވާއިރު، ޑި މިނޯ އަތުން މޮޅުވެފައިވަނީ، 7-5 6-2 6-1 އިން ސެޓުތައް ގެންގޮސްގެންނެވެ.
އަލްކަރާޒްގެ ކެރިއަރުގައި މިހާތަނަށް ހަ ގްރޭންޑް ސްލޭމް ތަށި ވަނީ ހޯދައިފަ އެވެ. އެއީ، އޮސްޓްރޭލިއަން އޯޕަން ފިޔަވައި، ދެން އޮތް ތިން ގްރޭންޑް ސްލޭމް މުބާރާތް ކަމަށްވާ، ފްރެންޗް އޯޕަން، ވިމްބަލްޑަން އަދި ޔޫއެސް އޯޕަން، ކޮންމެ މުބާރާތެއް ދެ ފަަހަރު އެވެ.
މި ފަހަރުގެ އޮސްޓްރޭލިއަން އޯޕަންގެ ސެމީ ފައިނަލުން ޖާގަ ހޯދުމަށް ފަހު، އަލްކަރާޒް ބުނެފައިވަނީ، މިއީ ހަގީގަތުގައި އޭނާ އަށް ވަރަށް ރަނގަޅަށް ދާ މުބާރާތެއް ކަމަށާއި ފުރަތަމަ ބުރުން ފެށިގެން ކޮންމެ މެޗެއްގައި ވެސް ކުޅުން ރަނގަޅު ކުރެވެމުން އަންނަ ކަމަށެވެ.
ސެމީ ފައިނަލުގައި އަލްކަރާޒް ކުޅޭނީ ޖަރުމަނުގެ އަލެކްސަންޑަ ޒްވެރެވްއާ ދެކޮޅަށެެވެ. ތިން ވަނަ އަށް ސީޑްކޮށްފައިވާ ޒްވެރެވް ވަނީ ކުއާޓާ ފައިނަލުގައި އެމެރިކާގެ ލާނާ ޓީއާން އަތުން މޮޅުވެފަ އެވެ.
