މެލްބާން (ޖެނުއަރީ 29) - މިހާރު ކުރިއަށްދާ އޮސްޓްރޭލިއަން އޯޕަންގެ ސެމީ ފައިނަލުގެ ޖާގައެއް ސާބިއާގެ ޓެނިސް ތަރި، ނޮވަކް ޖޮކޮވިޗަށް ލިބުނު ކަމުގައި ވިޔަސް މާ ބޮޑު ހިތްހަމަޖެހުމެއް އެކަމުގައި ލިބެން ނެތް ކަމަށް ދޭހަވާ ގޮތަށް ވާހަކަ ދައްކައިފި އެވެ.
ސައުވީސް ގްރޭންޑް ސްލޭމް ޓެނިސް މުބާރާތުގެ ތަށި ހޯދާފައިވާ ޖޮކޮވިޗް، 38، ކުޅުނު ކުއާޓާ ފައިނަލް މެޗުގައި އިޓަލީގެ ލޮރެންޒޯ މުސެއްޓީ އޮތީ ފުރަތަމަ ދެ ސެޓު، 6-4، 6-3 އިން ކާމިޔާބުކޮށްފަ އެވެ. އެކަމަކު، ތިން ވަނަ ސެޓުގައި ލިބުނު އަނިޔާއަކާ ހެދި މުސެއްޓީ އަށް ޖެހުނީ މެޗު ދޫކޮށްލާށެވެ. އެއާ އެކު، ޖޮކޮވިޗަށް ސެމީ ފައިނަލުގައި، އިޓަލީގެ ޖަނިކް ސިނާއާ ކުޅެން ފުރުސަތު ލިބުނީ އެވެ.
ޖޮކޮވިޗް ބުނީ، ހަގީގަތުގައި އޭނާ އަކީ ދެއްކި ކުޅުމަށް ބަލާއިރު ގެއަށް ދާން ތައްޔާރުވެގެން ހުންނަން ޖެހޭ ކުޅުންތެރިޔާ ކަމަށެެވެ.
"އަހަންނަށް ވުރެން އެތައް ގުނައެއް މޮޅަށް އޭނަ (މުސެއްޓީ) ކުޅުނު. އަހަރެން ހުރީ އަމިއްލަ ގެ އަށް ދިއުމުގެ މަގުމަތީގައި. ޔަގީނުން ވެސް މި މެޗުން މޮޅުވާން ޖެހޭ ކުޅުންތެރިއަކީ އޭނަ، އަހަރެން އޭނަ އަށް ވަރަށް އަވަސް ޝިފާ އަކަށް އެދެން،" ގްރޭންޑް ސްލޭމް މުބާރާތަކަށް 2023 ވަނަ އަަހަރުގެ ޔޫއެސް އޯޕަން ތަށި އެންމެ ފަހުން ހޯދި، ޖޮކޮވިޗް ބުންޏެވެ.
މިއީ، މި ފަހަރުގެ އޮސްޓްރޭލިއަން އޯޕަންގައި ޖޮކޮވިޗަށް މެޗެއް ފުރިހަަމަަ ނުކޮށް މޮޅެއް ލިބުނު ފުރަތަމަ ފަހަރެވެ. ޖޮކޮވިޗަށް ކުއާޓާ ފައިނަލުން ފުރުސަތު ލިބުނީ، ގަދަ 16 ބުރުގައި އޭނާއާ ކުޅެން އޮތް ޗެކް ރިޕަބްލިކްގެ ޖަކޫބް މެންސިކްގެ ބަނޑުގައި ރިއްސާތީވެ، ސިއްހީ ހާލަތު ގޯސްވެގެން މެޗު ދޫކޮށްލަން ޖެހުމުންނެވެ. އެހެންކަމުން، ސެމީ ފައިނަލުގައި ސިނާއާ ދެކޮޅަށް ޖޮކޮވިޗް ނުކުންނައިރު، އޭނާ އަށް އެ ހިސާބަށް އެ އާދެވުނީ އެންމެ ފަހުން ކުޅުނު ދެ މެޗުގައި ދަނޑުމަތިން މޮޅެއް ނުލިބި އެވެ.
