ރައްޔިތުން މަޖިލީހުގެ ށ.ކޮމަންޑޫ ދާއިރާއަށް ކުރިމަތިލާފައި ތިބި ތިން ކެންޑިޑޭޓުން ވެސް އެންޓި ކެމްޕެއިން ކުރާކަން ފާހަގަކުރެވިފައިވާ ކަމަށް ބުނެ، އެކަން އެގޮތަސް ނުކުރެއްވުމަށް އިލެކްޝަން ކޮމިޝަން (އީސީ) އިން އިލްތިމާސް ކޮށްފި އެވެ.
އީސީގެ ރައީސް ފުރާދު ތައުފީގު "އަދަދު"އަށް ވިދާޅުވީ ނަން ސީދާ ހާމަނުކޮށް ވާދަވެރި ދެ ކެންޑިޑޭޓަށް ނިސްބަތްކޮށް މި އިންތިހާބުގައި ވާދަކުރާ ތިން ކެންޑިޑޭޓުން ވެސް އެންޓި ކެމްޕެއިން ކުރާކަން މީޑިއާގެ ޒަރިއްޔާއިން އެ ކޮމިޝަނަށް ފާހަގަކުރެވިފައިވާ ކަމަށެވެ.
ނަމަވެސް އެފަދަ ޝަކުވާއެއް މިހާތަށް ލިބިފައި ނުވާތީ، އެ ކޮމިޝަނުގެ އަމިއްލަ އިސްނެގުމުގެ ދަށުން އެންޓި ކެމްޕެއިން ކުރާ މައްސަލަތައް ނުބަލާނެ ކަމަށް އޭނާ ވިދާޅުވި އެވެ.
"އަޅުގަނޑުމެންނަށްވެސް ހަބަރުތަކުންނާއި، ސޯޝަލް މީޑިއާގެ ތެރެއިންވެސް އެބަ ފެނޭ އޭގެ އެންމެ ރަނގަޅު ގޮތަށް ނޫން ގޮތަށް އެ ކެމްޕެއިންގައި މަސައްކަތް ކުރައްވަމުން ގެންދާކަން," ފުއާދު ވިދާޅުވި އެވެ.
ފުއާދު ވަނީ އިންތިހާބާ ގުޅިގެން ހުރި ހުރިހާ ކަންބޮޑުވުމެއް މީޑިއާގައި ހާމަކުރުމުގެ ބަދަލުގައި އެ ކޮމިޝަންގެ ޝަކުވާ ބިއުރޯއަށް މައްސަލަ ހުށަހެޅުމަށް ހުރިހާ ރައްޔިތުންނަށާއި، ސިޔާސީ ޕާޓީތަކަށް އިލްތިމާސްކުރައްވާފަ އެވެ. އަދި އެހެން މީހުންނަށް ސިޔާސީ ގޮތުން ބަހުގެ ހަމަަލާތައް އަމާޒުނުކޮށް، ޕޮޒިޓިވްކޮށް ކެމްޕެއިން ކުރުމަށް އެދިވަޑައިގެންނެވި އެވެ.
"އަޅުގަނޑުމެންގެ އިލްތިމާސްއަކީ ޕޮޒިޓިވްކޮށް ކެމްޕެއިން ކުރައްވާށޭ, މީސްމީހުންނަށް ނެގެޓިވް ކެމްޕެއިން ނުކުރައްވާށޭ މި ދަންނަވަނީ," ފުއާދު ވިދާޅުވި އެވެ.
އަންނަ މަހުގެ ފަސްވަނަ ދުވަހުގެ ބާއްވާ ކޮމަންޑޫ ދާއިރާގެ އިންތިހާބު ފެންނަނީ ވަރަށް ފޯރިގަދަކޮށެވެ. ތިން ކެންޑިޑޭޓުން ތަމްސީލުކުރާ ޕާޓީތަކުން އަންނަނީ އެއް ބަޔަކު އަނެއް ބަޔަކަށް ބަހުގެ ހަމަލާތައް އަމާޒުކުރަމުންނެވެ.
