ރައްޔިތުންގެ ސަލާމަތާއި ރައްކާތެރިކަން ކަށަވަރުކުރުމަށް ކަމަށް ބުނެ ފުލުހުންނާއި ސިފައިން ގުޅިގެން މާލޭގައި ސަރަހައްދުގައި ހާއްސަ އޮޕަރޭޝަނެއް ފަށައިފި އެވެ.
ނަމަވެސް, އެ އޮޕަރޭޝަންގެ ތަފްސީލު ދެ އިދާރާއިން ވެސް ހާމައެއްނުކުރި އެވެ.
ފުލުހުން ބުނީ މާލޭގެ އަމާންކަމާއި ރައްކާތެރިކަން ޔަގީން ކުރުމުގެ ގޮތުން ގައުމީ ދިފާއީ ބާރުގެ އެހީއަށް އެ އިދާރާއިން އެދިފައިވާ ކަމަށެވެ. އަދި ސިފައިންގެ އެހީއާއެކު މާލޭގައި އޮޕަރޭޝަނެއް ފަށާފައިވާ ކަމަށް އެއިދާރާއިން ބުންޏެވެ.
މި އޮޕަރޭޝަން ކުރިއަށް ގެންދިއުމަށް އެމްއެންޑީއެފްގެ އެހީއަށް އެދުނީ ކީއްވެތޯ އަދި އެދުނީ ކޮން ބާވަތެއްގެ އެހީއަކަށްތޯ އެހުމުން ފުލުހުންގެ މީޑިއާ އޮފިޝަލް ވިދާޅުވީ އޮޕަރޭޝަނާ ގުޅޭ ގޮތުން އިތުރު އެއްވެސް މައުލޫމާތެއް ހާމަކުރެވެން ނެތް ކަމަށެވެ.
ރައްޔިތުންގެ ސަލާމަތާއި ރައްކާތެރިކަން ކަށަވަރުކުރުމަށް އޮޕަރޭޝަނެއް ހިންގާއިރު، ގައުމީ ސަލާމަތަށް ނުރައްކާވާފަދަ ހާލަތެއް އޮތްތޯ އެހުމުން އެ ސުވާލަށް ވެސް ޖަވާބު ދިނުމަށް ފުލުހުން އުޒުރުވެރިވި އެވެ.
"ބަޔާނުގައި އެވަނީ ހާމަކުރެވޭނެ އެންމެ ބޮޑަކަށް މައުލޫމާތު ހާމަކޮށްފައި، އިތުރު މައުލޫމާތެއް ދެވޭކަށް ނެތް." ފުލުހުންގެ މީޑިއާ އޮފިޝަލް ވިދާޅުވި އެވެ.
ރޭ މެންދަމު 12:22 ގައި ފުލުހުން ބަޔާން އާންމުކުރިތާ ކުޑަ އިރުކޮޅެއް ތެރޭ ގިނަ އަދަދެއްގެ ފުލުހުންނާއި ސިފައިން މާލޭގެ ބައެއް ސަރަހައްދުތަކުން ފެނިފައި ވެއެވެ. ނަމަވެސް މިއޮޕަރޭޝަންގައި އަދި މިހާތަނަށް އެއްވެސް ތަނެއް ފާސްކޮށް، އެއްވެސް މީހަކު ހައްޔަރު ކުރިކަމުގެ މައުލޫމާތެއް ލިބިފައެއް ނުވެ އެވެ.
