ށ. މިލަންދޫ ޒުވާނުންތަކެއްގެ އަމިއްލައަށް އިސްނަގައިގެން އެ ރަށު "ސިކުނޑި ކުޅީ"ގައި ނޭޗާ ޕާކެއް ހެދުމުގެ މަސައްކަތް ފަށައިގެން އުޅެނިކޮށް އެންވަޔަރަމެންޓަލް ޕްރޮޓެކްޝަން އެޖެންސީ (އީޕީއޭ)އިން އަންގައިގެން މަސައްކަތްތައް ހުއްޓާލައިފި އެވެ.
އެނގިފައިވާ ގޮތުގައި ނޭޗާ ޕާކު ތަރައްގީ ކުރުމުގެ މަސައްކަތް ހުއްޓާލަން އީޕީއޭއިން އެންގީ އެ އިދާރާގެ ހުއްދަ ނުނަގާ މަސައްކަތް ފެށުމުންނެވެ. އެކަމަކު މަސައްކަތް ހުއްޓުވިއިރު ކުޅީގެ އެކި ސަރަހައްދުތަކުގައި ޕީވީސީ ހޮޅި ފައްތާ، ޖުންގު ހަރުކޮށްގެން ކުޑަ ފާލަމެއް އަޅާ ނިމިއްޖެ އެވެ.
މިލަންދޫ ކައުންސިލު ރައީސް އަބްދުﷲ އާތިފް "އަދަދު"އަށް ވިދާޅުވީ، ނޭޗާ ޕާކެއް ތަރައްގީ ކުރަން ޒުވާނުންގެ ބަޔަކު ހުށަހެޅުމުން, ކައުންސިލުން ނިންމީ އެ ހުށަހެޅުމާ އެއްގޮތަށް ކުރެހުންތައް ލިބިގެން އެކަމަށް ހުއްދަ ދޭން ކަމަށެވެ.
ނަމަވެސް، ހުއްދަ ނުދެނީސް އަމިއްލައަށް މަސައްކަތް ފެށީ ކަމަށް އޭނާ ވިދާޅުވި އެވެ.
"މަސައްކަތް ފަށައިގެން އުޅެނިކޮށް އީޕީއޭއަށް ކޮންމެވެސް ގޮތަކުން އެނގިގެން އެބޭފުޅުން އެ މަސައްކަތް ހުއްޓުވީ" އާތިފް ވިދާޅުވި އެވެ.
ށ. މިލަންދޫ ސިކުނޑި ކުޅި: ފޮޓޮއިން ތިފެންނަނީ މަސައްކަތް ހުއްޓުވިއިރު ކޮށްނިމިފައިހުރި މަސައްކަތްތައް. --
މަސައްކަތް ހުއްޓުވުމަށް ފަހު، އީޕީއޭ އިން ވަނީ އެ އިދާރާއަށް ކުރެހުންތައް ހުށަހަޅައިގެން ހުއްދަ ހޯދަން އަންގައިފަ އެވެ.
އާތިފް ވިދާޅުވީ މިހާރު އެ މަސައްކަތުގައި އިސްކޮށް އުޅޭ ޒުވާނުންނާ ވާހަކަ ދެކެވި، ކުރެހުންތައް ކައުންސިލު މެދުވެރިވެގެން އީޕީއޭ އަށް ހުށަހަޅަން ނިންމާފައިވާ ކަމަށެވެ.
"ވަރަށް އަވަހަށް ކުރެހުންތައް ލިބޭނެ ކަމަށް ބުނީ" އޭނާ ވިދާޅުވި އެވެ.
ގުދުރަތީ ގޮތުން ތަފާތު ސިފަތަކެއް ލިބިފައިވާ ސިކުނޑި ކުޅި، ނޭޗާ ޕާކަކަށް ހަދަން ޒުވާނުން މަސައްކަތްކުރަނީ އަމިއްލަ އަށް ހަރަދުކުރާ ގޮތަށެވެ. މި މަސައްކަތަށް އެއްބާރުލުން ދިނުމުގެ ގޮތުން ކައުންސިލުން ވަނީ އަހަރީ ބަޖެޓުގައި މިތަނަށް އިންވެސްޓުކުރަން ފައިސާ ކަނޑައަޅާފަ އެވެ.
ސިކުނޑި ކުޅިޔަށް ނަން ދެވުނީ، އެ ކުޅީގައި އާދަޔާ ހިލާފަށް ގިނައިން އުޅޭ ޑިނގާތަކަށް ނިސްބަތްކޮށެވެ. ސިކުނޑިއޭ ކިޔަނީ ދެފުށްފެންނަ (ޓްރާންސްޕޭރެންޓް) މި ޖަނަވާރުތަކުގެ ސިކުނޑި ފެންނަން ހުންނާތީ އެވެ. ފަރުމަހުގެ މަސްވެރިކަމުގައި އެމަކަށް ބޭނުންކުރާ ސިކުނޑި، ށ. އަތޮޅުން ލިބެނީ މިރަށުން އެކަންޏެވެ.
