ރައްޔިތުންގެ މެދުގައި ބިރުވެރިކަން އުފެދޭ ގޮތަށް، ކުށްތަކަށް އަރައިގަނެ، ފައިސާ ހޯދައިގެން މަސްތުވާތަކެތީގެ ވިޔަފާރީ ކުރަމުން އަންނަ ހުރިހާ ގޭންގްތަކެއް ހުއްޓުމަށްޓަކައި، އާ ގާނޫނީ އޮނިގަނޑަކާއި އެކު، ރައިސުލްޖުމްހޫރިއްޔާ ރިޔާސަތު ބަލަހައްޓަވާ ޓާސްކްފޯސްއެއް އެކުލަވާލުމުގެ މަސައްކަތް ފަށައިފި އެވެ.
އެކި އޮޕަރޭޝަންތަކުގައި އަތުލައިގެންފައިވާ 314.8 ކިލޯގެ މަސްތުވާތަކެތި ނައްތާލަން ފުލުހުން އިއްޔެ ދޫނިދޫގައި ބޭއްވި ހަރަކާތަށްފަހު, ދިން ނޫސްވެރިންގެ ބައްދަލުވުމުގައި ފުލުސް ކޮމިޝަނަރު ސީޕީ މުހައްމަދު ހަމީދު ވިދާޅުވީ މަސްތުވާތެކެއްޗާ ދެކޮޅަށް ގައުމީ ޓާސްކު ފޯސްއެއް އެކުލަވާލުމާ އެކު، އިތުރު އެހެން ގައުމީ ޓާސްކު ފޯސްއެއް އެކުލަވާލުމުގެ މަސައްކަތް ކުރަމުންދާ ކަމަށެވެ. ނަމަވެސް، އެ ދެ ޓާސްކް ފޯސްގެ ތަފްސީލެއް ކޮމިޝަނަރު ނުދެއްވަ އެވެ.
"އެއީ ރާއްޖޭގައި ޖަމާއަތެއްގެ ގޮތުގައި ހަރަކާތްތެރިވާ ނުވަތަ އާންމު ބަހުން ނަަމަ ގޭންގޭ މި ކިޔާ ކަލްޗާގެ ތެރެއިން އުފަންވެގެން ބޮޑުވެގެން، ފުޅާވެގެން، އޭގެ ތެރެއަށް ވިޔަފާރި ވަރަށް ބޮޑަށް ވައްދައިގެން، ކުށް ކޮށްގެން ފައިދާ ހޯދައިގެން، ކުށުގެ ބިރުވެރިކަން ރައްޔިތުންގެ މެދުގައި ފަތުރައިގެން، މަގުމަތީގައި އެންޓި ސޯޝަލް ބިހޭވިއާ، މީހުންގެ ހިތުގައި ބިރުވެރިކަން އުފެދޭ ގޮތަށް މިއުޅޭ ފަރާތްތައް. މި ފަރާތްތަކާ ދޭތެރޭ ފިޔަވަޅު އެޅުމަ ށްވެސް ޓާސްކް ފޯހެއް ވަނީ އެކުލަވާލާފައި،" ސީޕީ ވިދާޅުވި އެވެ.
ސީޕީ ވިދާޅުވި ގޮތުގައި ފަހަކަށް އައިސް މާރާމާރީތައްވެސް ހިނގަނީ މަސްތުވާތަކެތި ވިއްކުމުގައި ދެ ގްރޫޕެއްގެ މެދުގައި ޖެހޭ މައްސަލައަކާއި ގުޅިގެން ކަމަށެވެ. އެއީ އެއް ގްރޫޕަކުން ކޮންޓްރޯލް ކުރާ ސަރަހައްދެއްގައި އަނެއް ބަޔަކު މަސްތުވާތަކެތި ވިއްކުމުންކަން އޭނާ ފާހަގަކުރެއްވި އެވެ. އަދި ސަރަހައްދުގެ ބާރުވެރިކަން ނެނގެހެއްޓުމަށް އެ ގްރޫޕްތަކުން މަސައްކަތް ކުރަމުންދާ ކަމަށް ވިދާޅުވި އެވެ.
"މާލެތެރޭ ދޭތެރެެ ދޭތެރެ އިން މަގުމަތީގައި ގްރޫޕުތަކުން ސައިކަލުގައި ނުކުމެ، ފުރޯ ހިފައިގެން، ކަތިވަޅި ހިފައިގެން، މަރުތެޔޮ ހިފައިގެން މި ހިންގާ މާރާމާރީ އަކީ، އެ ގްރޫޕެއް ކޮންޓްރޯލުކުރާ ޓާފްގެ ތެރޭގައި ދެން އޮންނަ ގްރޫޕަކުން އައިސް ޑްރަގުގެ އެއްވެސް އެއްޗެއް އެ ތަނުގައި އޮންނަ މާކެޓަށް ވިއްކަން އުޅެފިއްޔާ އެކަމާ ގުޅިގެން ޖެހޭ މައްސަލަ." ސީޕީ ވިދާޅުވި އެވެ.
މި ދެ ޓާސްކްފޯސްއާއި އެކު އަންނަ އަހަރުގެ ފުރަތަމަ ކުއާޓާގައި މަސްތުވާތަކެއްޗާއި ދެކޮޅަށް ކުރެވޭ މަސައްކަތަކުގެ ނަތީޖާ ފެނިގެން ދާނެ ކަމަށް ސީޕީ ގަބޫލުކުރައްވަ އެވެ. އަދި މަސްތުވާތަކެއްޗާއި ބެހޭ ގާނޫނަށް އިސްލާހު ގެނައުމުގެ މަސައްކަތް އެޓާނީ ޖެނެރަލްއާއި ގުޅިގެން ކުރައްވާ ކަމަށްވެސް ކޮމިޝަނަރު ވިދާޅުވި އެވެ. އަދި އެ ބިލް ޑްރާފް ކުރުމަށްފަހު އަންނަ އަހަރުގެ ފުރަތަމަ ކުއާޓާގައި މަޖިލީހަށް ހުށަހަޅުއްވުމަށް މަސައްކަތް ކުރަމުންދާ ކަމަށް ވެސް ވިދާޅުވި އެވެ.
