އދ. ދަނގެތީގައި އަނިޔާވެރި ގޮތަކަށް އެރަށު ވިޔަފާރިވެރިޔާ މަހްމޫދް އަބޫބަކުރުގެ މަރައިލި ކަމަށް ތުހުމަތު ކުރެވޭ ބަންގްލަދޭޝްގެ ޝާ އޮލަމް މިއާ (ސާލިމް) ގެ ޝަރީއަތް މާދަމާ ކްރިމިނަލް ކޯޓުގައި ފެށުމަށް ތާވަލްކޮށްފި އެވެ.
މަހްމޫދް، 57، މަރާލުމަށްފަހު ފަޅު ގޯއްޗެއްގެ ފެންވަޅު ތެރެއަށް އެއްލާލާފައި އޮއްވާ ފެނުނީ މިދިޔަ އޮކްޓޯބަރު 13، ގަ އެވެ. ފައިސާގެ ބޭނުމަށް މަހްމޫދް މަރާލީ އޭނާ ކަމަށް ފުލުހުންގެ ތަހުގީގުގައި ސާލިމް ވަނީ އެއްބަސްވެފަ އެވެ.
ސާލިމްގެ ޝަރީއަތް ފެށުމަށް ހަމަޖެހިފައި ވަނީ މާދަމާ ހެނދުނު 10:30 ގަ އެވެ. އޭނާގެ މައްޗަށް ދައުލަތުން ކުރަނީ ގަސްދުގައި މީހަކު މަރާލުމުގެ ދައުވާ އާއި މައްޔިތެއްގެ ބޭނުން ނަހަމަ ގޮތުގައި ހިފުމުގެ ކުށުގެ ދައުވާ އެވެ.
ސާލިމަކީ ދަނގެތީގައި ދިރިއުޅޭ އެރަށުގެ އުމުރުން ދުވަސްވީ މީހެއް ބެލުމަށް ގެނެސްފައި ހުރި މީހެކެވެ. މަހްމޫދު މަރާލީ އޭނާއަށް ގުޅައިގެން ސާލިމް ދިރިއުޅޭ ގެއަށް ގެންގޮސް ވަޅިން ހަމަލާދިނުމަށްފަހު އެވެ. އޭނާ މަރާލުމަށްފަހު ހަށިގަނޑު ގޯންޏަކަށް ލައިގެން ގެންދިޔައީ ފަޅު ގެއަކަށެވެ. އެއީ މަހްމޫދު އިމާރާތް ކުރަމުންދިޔަ ގެއެކެވެ.
މަހްމޫދުގެ ހަށިގަނޑު ފެނުމާއެކު ރަށު ރައްޔިތުން ނިކުމެ ދެ މީހަކު އަތުލައިގަނެ ފުލުހުންނާ ހަވާލު ކުރި އެވެ. އެއިރު އެއްވެސް މީހަކު ސާލިމަކަށް ތުހުމަތެއް ނުކުރެ އެވެ. މަހްމޫދުގެ ޖަނާޒާގައި ވެސް ސާލިމް ބައިވެރިވި އެވެ.
މަހްމޫދުގެ ގާތިލަކީ ސާލިމު ކަމަށް ބެލެވެން ފެށީ ފުލުހުންގެ ހާއްސަ ޓީމެއް ދަނގެއްޗަށް ގޮސް އެ ޓީމުގެ ތަހުގީގު ސީރިއަސްކޮށް ފެށުމާ ހަމައިންނެވެ. ސާލިމް ދިރިއުޅޭ ގެއިން އެ މައްސަލައާ ގުޅޭ ވަރުގަދަ ހެކިތަކެއް ވެސް ފުލުހުން ހޯދި އެވެ.
ރަށުގައި ކެފޭއެއް ހިންގަމުންދިޔަ މަހްމޫދު ނިޔާވިއިރު އޭނާގެ އަންބަކާއި ތިން ކުދިން ދުނިޔޭގައި އެބަތިއްބެވެ.
