ރައްޔިތުން މަޖިލީހުގެ ހުސްވެފައިވާ ކޮމަންޑޫ ދާއިރާގެ ގޮނޑިއަށް ސިޔާސީ ތިން ޕާޓީއަކުން ވާދަކުރާނެކަން ހާމަކޮށްފި އެވެ.
އެ ދާއިރާގެ މަޖިލީހުގެ ގޮނޑި ހުސްވީ، މަޖިލީހުގައި އެ ދާއިރާ ތަމްސީލް ކުރައްވަމުން ގެންދެވި މެމްބަރު ހުސައިން ވަހީދު އަވަހާރަވުމާ ގުޅިގެންނެވެ.
ކެންސަރުގެ އާލާސްކަންފުޅެއްގައި ފަރުވާ ހޯއްދަވަމުން ގެންދަވާތާ ގިނަ ދުވަސްތަކެއް ވެފައިވަނިކޮށް ހުސެއިން އަވަހާރަވީ އުމުރުން 53 އަހަރުގެ މާލޭ އޭޑީކޭ ހޮސްޕިޓަލުގަ އެވެ.
ކޮމަންޑޫ ދާއިރާގެ ބައި-އިލެކްޝަނަށް ކުރިމަތިލުމަށް އެދޭ މީހުންނަށް އެ ފުރުސަތު މި މަހުގެ 30 ގެ ނިޔަލަށް ވަނީ ހުޅުވާލައިފައިވާއިރު، މިހާތަނަށް އެއްވެސް ކެންޑިޑޭޓެއްގެ ފޯމެއް އިލެކްޝަންސް ކޮމިޝަން (އީސީ) އަށް ލިބިފައެއް ނުވެ އެވެ. ނަމަވެސް ތިން ޕާޓީއެއްގެ ކެންޑިޑޭޓް އެ ދާއިރާގެ ގޮނޑިއަށް ވާދަކުރާނެކަން މި ނޫހަށް ވަނީ ކަށަވަރުވެފައި އެވެ.
އެގޮތުން އެމްއެންޕީގެ ތަރުޖަމާން އަސްރާ އަހުމަދު ވިދާޅުވީ އެ ޕާޓީގެ ކެންޑިޑޭޓެއް ކޮމަންޑޫ ދާއިރާއަށް ޔަގީނުންވެސް ކުރިމަތި ލާނެ ކަމަށެވެ. އެއީ ކޮން ކެންޑިޑޭޓެއްކަން ނިންމާނީ، ޕާޓީގެ އެތެރޭގައި ބޭއްވޭ އިންތިހާބަށްފަހުގައި ކަމަށް އޭނާ ވިދާޅުވި އެވެ. މިކަމާ ގުޅޭ ގޮތުން މީޑިޔާތަކަށް މައުލޫމާތު ދިނުމަށް މިއަދު މެންދުރު ނޫސްވެރިންގެ ބައްދަލުވުމެއް ބާއްވާނެ ކަމަށާއި، އެ ބައްދަލުވުމުގައި، އެމްއެންޕީގެ އެތެރޭގެ އިންތިހާބާ ގުޅޭ މައުލޫމާތުތައް ވެސް ހިސާކުރައްވާނެކަން އަސްރާ ފާހަގަކުރެއްވި އެވެ.
އެމްއެންޕީ ވުޖޫދުވިތާ ކުޑަދުވަސްކޮޅެއްގެ ތެރޭ އެޕާޓީއަށް 10،000 މެމްބަރުން ވަނީ ހަމަކޮށްފަ އެވެ.
ދެން މި ގޮނޑިއަށް ވާދަކުރަން ނިންމާފައި ވަނީ ޕީޕީއެމްއިންނެވެ. އެ ޕާޓީގެ ތަރުޖަމާން ހީނާ ވަލީދު މިނޫހާ ވާހަަކަ ދައްކަވަމުން ވިދާޅުވީ އިދިކޮޅު ކެންޑިޑޭޓެއް އެ ގޮނޑިއަށް ވާދަކުރާނެ ކަމަށެވެ. ނަމަވެސް އެ ކެންޑިޑޭޓް ހޮވުމަށްޓަކައި، ޕާޓީ އެތެރޭގެ އިންތިހާބެއް ބޭއްވުމަށް އަދި ނުނިންމާކަން ފާހަގަކުރެއްވި އެވެ. ހީނާ ވިދާޅުވި ގޮތުގައި އެކަމާ މިހާރު އެ ޕާޓީގެ ކައުންސިލް މެމްބަރުންގެ މެދުގައި މިހާރު އަންނަނީ މަޝްވަރާ ކުރަމުންނެވެ.
ކޮމަންޑޫ ގޮނޑިއަށް ވާދަކުރާނެ އެއް ޕާޓީއަކީ މިވަގުތު ސަރުކާރު ހިންގުމުގައި އިސްކޮށް އޮތް އެމްޑީޕީ އެވެ. އެ ޕާޓީގެ ބޮޑު އަގުލަބިއްޔަތެއް މިހާރު ވެސް މަޖިލީހުގައި އޮވެ އެވެ. އަދި ހުސްވި ކޮމަންޑޫ ދާއިރާގެ ގޮނޑި ތަމްސީލު ކުރަމުން ދިޔައީ ވެސް އެމްޑީޕީއިންނެވެ. އެހެންވެ, އެ ގޮނޑި ދިފާއު ކުރަން އެ ޕާޓީން ބޭނުންވެ އެވެ.
އެމްޑީޕީން ބުނީ އެ ބައި އިލެކްޝަންގައި ވާދަކުރަން ބޭނުންވާ އެ ޕާޓީގެ މެމްބަރުން ފޯމް ފުރިހަމަކޮށް އެފޯމާއި އެކު ހުށައަޅަންޖެހޭ ހުރިހާ ލިޔެކިޔުން ތަކާއިއެކު، މި މަހުގެ 21 ވަނަ ދުވަހުގެ ހަވީރު 4:00ގެ ކުރިން elections@mdp.org.mv އަށް އީމެއިލް ކުރުމަށް އެދޭ ކަމަށެވެ.
އަދާލަތު ޕާޓީގެ ތަރުޖަމާން އަލީ ނަޒީރު ވިދާޅުވި ގޮތުގައި ހުސްވެފައިވާ ގޮނޑިއަށް އެ ޕާޓީގެ މެމްބަރަކު ނެރުމަށް އަދި ނުނިންމަ އެވެ. އެކަމާ މަޝްވަރާ ކުރަމުންދާ ކަމަށް އޭނާ ވިދާޅުވި އެވެ.
މޯލްޑިވްސް ތާޑްވޭ ޑިމޮކްރޭޓްސް (އެމްޓީޑީ) ކައުންސިލްގެ މެމްބަރުކަން ކުރައްވާ އަހުމަދު އަޝްރަފު (ޝުމްބާ) ބުނީ އެ ޕާޓީގެ ކެންޑިޑޭޓަކު ވެސް ކޮމަންޑޫ ދާއިރާގެ ކޮނޑިއަށް ނެރެން ނިންމާފައިނުވާ ކަމަށެވެ.
އެމްޑީއޭގެ ނައިބު ލީޑަރު ޑރ. އައިޝަތު ރަފިއްޔާ ހާމަކުރެއްވި ގޮތުގައި އެ ޕާޓީގެ ކެންޑިޑޭޓެއް ނެރުމަށް ވެސް ނިންމާފައެއް ނުވެ އެވެ. މިވަގުތު މަޖިލީހުގައި އެމްޑީއޭއަށް ނިސްބަތްވާ ދެ މެމްބަރުން އެބަތިބި އެވެ.
ރައީސް މައުމޫން އަބްދުލްގައްޔޫމް އިސްވެ ހިންގަވާ އެމްއާރުއެމުންވެސް އަދި ކޮމަންޑޫ ދާއިރާއަށް ކެންޑިޑޭޓެއް ނެރެން ނުނިންމަ އެވެ. ނަމަވެސް, އެ ޕާޓީގެ ތަރުޖަމާން އަލީމް ވިދާޅުވީ އެކަމާ މަޝްވަރާ ކުރަމުންދާ ކަމަށެވެ.
އިލެކްޝަންގެ ދަފްތަރުގައި ތިންވަނައަށް އޮތް ގާސިމް އިބްރާހިމްގެ ޖުމްހޫރީ ޕާޓީއިން ވެސް އަދި މި ގޮނޑިއަށް ކެންޑިޑޭޓަކު ނެރުމަށް ނުނިންމަ އެވެ.
titledesc
