ސަރުކާރު ހިއްސާވާ ކުންފުނިތަކުގެ ބެލެނިވެރި ފަރާތް ކަމުގައިވާ ޕްރައިވެޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ)ގެ ރައީސްގެ މަގާމަށް އެ ބޯޑުގެ ނައިބު ރައީސްގެ އާސިމް މުހައްމަދު ރައީސް އޮފީހުން ހަމަޖައްސައިފި އެވެ.
ޕީސީބީއަށް ރައީސަކު ހަމަޖެއްސީ އެ މަގާމުގައި ހުންނެވި ހަސަން ވަހީދު އިސްތިއުފާ ދެއްވިތާ 440 ދުވަސް ފަހުން، މިދިޔަ ހޯމަ ދުވަހު އެވެ. ވަހީދު އިސްތިއުފާ ދެއްވީ މަސައްކަތަށް ނުފޫޒު ފޯރުވަމުންދާކަމަށް ތުހުމަތުކުރައްވައި، މިނިވަންކަމާއެކު މަސައްކަތް ކުރާނެ މާހައުލެއް ނެތް ކަމަށް ވިދާޅުވެފަ އެވެ.
އިސްތިއުފާ ދެއްވުމުގެ ދުވަސްތަކެއް ކުރިން ޕީސީބީގެ މެމްބަރުން މަސްއޫލިއްޔަތު އަދާނުކުރާ ކަމަށް ބުނެ ރައްޔިތުންގެ މަޖިލީހުގެ އެސްއޯއީ ކޮމިޓީއަށް ހާޒިރު ކުރި އެވެ.
އޭގެ ފަހުން އެ ބޯޑު ހިންގެވުމުގެ އެންމެ އިސް ޒިންމާ އަދާކުރައްވަމުން ގެންދެވީ އާސިމް އެވެ.
ޕީސީބީގެ މެމްބަރުން
- އަހުމަދު އާސިމް - ރައީސް
- އައިޝަތު ޝާޒްލީ - ނަން އެގްޒެކެޓިވް މެމްބާ
- ރުޝާހާ އަހުމަދު ޝަރީފް - ނަން އެގްޒެކެޓިވް މެމްބާ
- އަލީ ޝަފީއު - ނަން އެގްޒެކެޓިވް މެމްބާ
- އަލީ ޝުޖާއު - ނަން އެގްޒެކެޓިވް މެމްބާ
- އަހުމަދު ޝަރީފް ޔޫސުފް - ނަން އެގްޒެކެޓިވް މެމްބާ
ޕީސީބީއަކީ 2013 ވަނަ އަހަރު ވުޖޫދަށް އައި ދައުލަތުގެ ވިޔަފާރި ތަންތަން ޕްރައިވަޓައިޒްކުރުމާއި ކޯޕަރަޓައިޒްކުރުމާއި އަދި މޮނިޓާކޮށް އިވެލުއޭޓްކުރުުމުގެ ގާނޫނުގެ ދަށުން އުފެއްދި ބޯޑެކެވެ.
އެ ގާނޫނުގައި އޮންނަނީ ބޯޑުގައި ހަތް މެމްބަރުން ތިބެން ޖެހޭނެ ކަމަށެވެ. އެކަމަކު މިހާރު ޕީސީބީގައި ތިއްބަވަނީ ރައީސް އާސިމާއެކު ހަ މެމްބަރުންނެވެ.
އެ ބޯޑަށް މެމްބަރުންނާއި، އެ ބޯޑުގެ ރައީސް އާއި ނައިބު ރައީސް އައްޔަން ކުރައްވަނީ ރައްޔިތުންގެ މަޖިލީހުގެ ރުހުމާއެކު ރައީސުލްޖުމްހޫރިއްޔާ އެވެ.
ޕީސީބީއަކީ ސަރުކާރު ހިއްސާވާ ކުންފުނިތައް ހިންގުމުގައި މުހިންމު ދައުރެއް އަދާކުރާ ބޯޑެކެވެ. މި ބޯޑުގެ ޒިންމާތަކުގެ ތެރޭގައި ސަރުކާރު ކުންފުނިތަކުގެ ހިންގުން ހަރުދަނާކުރަން ކުންފުނިތަކުގެ ބޯޑުތަކުން މަސްއޫލިއްޔަތު އަދާކުރޭތޯ ބެލުމާއި، ކުންފުނިތަކުގެ ހިއްސާ ވިއްކުމާ ގުޅޭ ކަންކަން ކުރުން ހިމެނެ އެވެ.
އެހެންކަމުން އަންނަ އަހަރު ސަރުކާރުން ރާވާފައިވާ ކުންފުނިތަކުގެ ޕްރައިވެޓައިޒޭޝަން މަސައްކަތުގައި އެންމެ އިސް ދައުރެއް އަދާކުރާނީ ޕީސީބީންނެވެ.
