މިހާތަނަށް އެންމެ ގިނައިން ޓޫރިސްޓުން އައި 2019 ވަނަ އަހަރުގެ ޓޫރިސްޓުން ރާއްޖޭގައި ހޭދަކޮށްފައިވާ ރޭގެ އަދަދުގެ ރެކޯޑު (ބެޑްނައިޓްސް ރެކޯޑު) މުގުރާލައި، އަހަރު ނިމެންވާއިރަށް 11 މިލިއަން ބެޑްނައިޓަށް އަރާނޭ ކަމަށް ޓޫރިޒަމް މިނިސްޓްރީން ބުނެފި އެވެ.
ޓޫރިޒަމް މިނިސްޓްރީން ބުނި ގޮތުގައި ޑިސެމްބަރު 15 އާ ހަމައަށް 10.7 މިލިއަން ބެޑްނައިޓް ވަނީ ހަމަވެފަ އެވެ. މި ރެކޯޑު ކުރިން ހެދި 2019 ވަނަ އަހަރު ހަމަވީ 10.6 މިލިއަން ބެޑްނައިޓެވެ.
މި އަހަރު ފެށުނުއިރު އަމާޒުކުރީ 10 މިލިއަން ބެޑްނައިޓަށެވެ.
ފާހަގަކޮށްލަން ޖެހޭ ކަމަކީ، މި ރެކޯޑު ހެދި އަހަރު ރާއްޖެއަށް 1.7 މިލިއަން ޓޫރިސްޓުން އައި ނަމަވެސް، މި އަހަރުގެ ނިޔަލަށް ގިނަވެގެން އަންނާނެ ކަމަށް ބެލެވެނީ 1.3 މިލިއަން ޓޫރިސްޓުންނެވެ.
މަދުން ޓޫރިސްޓުން އައި ނަމަވެސް މި އަހަރު ރެކޯޑު ހެދީ ކޮވިޑު ބަލިމަޑުކަމަށް ފަހު ބޯޑަރު ހުޅުވާލި ފަހުން، ޓޫރިސްޓުން ޗުއްޓީ ހޭދަކުރާ މުއްދަތު އިތުރުވުމާ ގުޅިގެންނެވެ. މިހާރު ޓޫރިސްޓުން އެވަރެޖުކޮށް 8.7 ދުވަސް ހޭދަކުރި ނަމަވެސް 2019 ވަނަ އަހަރު ހޭދަކުރީ 6.3 ދުވަހެވެ.
ބަލިމަޑުކަމާ ގުޅިގެން ގޮންޖެހުންތައް ދިމާވި ނަމަވެސް، ފަހު ދެ ކުއާޓާގައި ރާއްޖޭގެ ޓޫރިޒަމުގެ ހަަރަކާތްތެރިކަން ވަނީ ދަރަޖައެއް ކުރިޔަށް ޖައްސާލާފަ އެވެ.
ޓޫރިޒަމް މިނިސްޓްރީގެ ތަފާސްހިސާބުތައް ދައްކާ ގޮތުގައި، ޖުލައިން ފެށިގެން ކޮންމެ މަހަކު އެއް ލައްކައަށް ވުރެ ގިނަ ޓޫރިސްޓުން އައިސްފައިވާއިރު، މަހުން މަހަށް ޓޫރިސްޓުން އަންނަ އަދަދުތައް ދަނީ އިތުރުވަމުންނެވެ.
އެގޮތުން ނިމުނު އޮކްޓޫބަރާއި ނޮވެމްބަރަށް ބަލާނަަމަ، ބަލިމަޑުކަމުގެ ކުރީ އަހަރަށް ވުރެ ޓޫރިސްޓުންގެ އަދަދުތައް އިތުރެވެ. މި މަހުގެ މިހާތަނަށް އާންމުކުރި އަދަދުތައް ދައްކާ ގޮތުން، ޑިސެމްބަރު މަހު ވެސް ރެކޯޑު އަދަދަކަށް ޓޫރިސްޓުން އަންނާނެ އެވެ.
