ދިވެހިރާއްޖޭގައި އިމިގްރޭޝަން މައްސަލަތަކުގައި ބިދޭސީން ހައްޔަރުކޮށްގެން ގެންގުޅެނީ ވަރަށް އަސާސީ ހައްގުތަކުން ވެސް އެކަހެރިކޮށްގެން ކަމަށާއި ނުރަސްމީ ބަންދު ސެންޓަރެއްގައި ސަރުކާރުގެ ކުންފުންޏަކުން ވެސް ގިނަ އަދަދެއްގެ ބިދޭސީން ބަންދުކޮށްގެން ގެންގުޅުނު ކަމަށް އދ. ގެ ވޯކިން ގްރޫޕް އޮން އާބިޓްރަރީ ޑިޓެންޝަނުން މިއަދު ބުނެފި އެވެ.
ސަރުކާރުގެ ދައުވަތަށް ރާއްޖެ އައިސް 10 ދުވަހުގެ ތަހުގީގަކަށްފަހު މިއަދު ބޭއްވި ނޫސްވެރިންގެ ބައްދަލުވުމެއްގައި، ވޯކިން ގްރޫޕްގެ މެމްބަރު ޕްރިޔާ ގޮޕަލާން ވިދާޅުވީ، ބަންދުގެ މުއްދަތު އިތުރުކުރުމާއި ގާނޫނީ އެހީތެރިކަން ހޯދުމުގެ ހައްގުން އިމިގްރޭޝަން ޑިޓެންޝަން ސެންޓަރުތަކުގައި ހައްޔަރު ކުރާ މީހުން އެކަހެރިކޮށްފައިވާ ކަމަށެވެ.
"މި މީހުންގެ ބަންދުކޮށްފައި ވަނީ ގާނޫނާ އެއްގޮތަށްތޯ ނުވަތަ ނޫންތޯ ކަނޑައެޅުމަށް ފަނޑިޔާރެއްގެ ކުރިމައްޗަކަށް ނުގެންދޭ. ގާނޫނީ އެހީތެރިކަމެއް ނުލިބޭ،" ޕްރިޔާ ވިދާޅުވި އެވެ.
"އެއް މައްސަލައިގައި، ރަށެއްގައި ޖެހުނު މައްސަލައަކާ ގުޅިގެން ސަރުކާރުގެ ކުންފުންޏަކުން، ވަރަށް ގިނަ އަދެއްގެ ބިދޭސީން، ނުރަސްމީ ބަންދު ސެންޓަރެއްގައި ވަނީ ހައްޔަރުކޮށްފައި."
ބައެއް ބިދޭސީން ހައްޔަރުކޮށްފައި ތިބި ހަމައެކަނި ސަބަބަކީ އެމީހުންނަކީ ކޯޓު މަރުހަލާފައި ހެކިބަސް ދިނުމަށް ހަމަޖެހިފައިވާ މީހުންނަށްވާތީ ކަމަށް ކަންބޮޑުވުމާއެކު އދ. އިން ފާހަގަ ކުރި އެވެ.
"އަޅުގަނޑުމެންނަށް ދިމާވި ބައެއް ބިދޭސީންނަކީ އެކިއެކި މައްސަލަތަކުގައި ހެކިން. އަދި އެމީހުން ބަންދުކޮށްފައި ހުރުމުގެ ސަބަބަކީ ވެސް ހަމަކަނި އެއީ. އޭގެ ތެރެއިން ބައެއް މީހުން ހައްޔަރުގައި ތިބޭތާ އެތައް އަހަރެއްވެއްޖެ،" ޕްރިޔާ ވިދާޅުވި އެވެ.
އޭގެ އިތުރުން، ތަރުޖަމާނުން ހޯދުމުގެ ދަތިކަމާއި ބިދޭސީން ބަންދުކުރާއިރު އެއް ހަމައަކުން އަމަލު ކުރުމުގެ ބަދަލުގައި ކޮންމެ ކޭސްއެއް ވެސް ވަކިވަކިން އެސެސް ކުރުމަށް އދ. އިން ވަނީ ގޮވާލައިފަ އެވެ.
ރާއްޖެއަށް ކުރި ދަތުރުގެ ރަސްމީ ރިޕޯޓެއް އަދި އދ. ގެ ވޯކިން ގްރޫޕުން އެކުލަވާލާނެ އެވެ. އަދި އެ ރިޕޯޓް އަންނަ އަހަރު އދ. ގެ ހިއުމަން ރައިޓްސް ކައުންސިލަށް ހުށަހަޅާނެ އެވެ.
