މިދިޔަ މަހު ސިފައިންގެ މީހަކަށް އަނިޔާކޮށް، އޭނާ ބްލެކްމެއިލް ކުރި ކަމަށް ބުނާ މައްސަލައެއްގައި ފުލުހުން ތިން މީހަކު މިއަދު ހައްޔަރުކޮށްފި އެވެ.
އެ މައްސަލައިގައި ކްރިމިނަލް ކޯޓުގެ އަމުރެއްގެ ދަށުން ހައްޔަރު ކުރީ 18 އަހަރާއި 21 އަހަރާއި 29 އަހަރުގެ ތިން ފިރިހެނުން ކަމަށް ފުލުހުން ބުންޏެވެ.
ތިން މީހަކު ހައްޔަރު ކުރުމުގެ އިތުރުން އެ މައްސަލައިގައި ވިލިމާލޭގެ ގެސްޓްހައުސްއެއް ބަލައިފާސްކޮށްފައިވާ ކަމަށް ވެސް ފުލުހުން ބުނެ އެވެ.
ކޯސްޓްގާޑުގައި މަސައްކަތް ކުރަމުން އައި ހަސަން ފަހީމް، 37، އެންމެ ފުރަތަމަ ބުނެފައި ވަނީ ބަޔަކު އޭނާ މަގުމަތިން ވަގަށް ނަގައި އަނިޔާ ކުރީ ކަމަށެވެ. ނަމަވެސް ފަހުން އެ މައްސަލައިގައި ފުލުހުން ބުނެފައި ވަނީ ފަހީމް ކިޑްނެޕްކޮށްފައިވާކަން ހެކިތަކުން ނުފެންނަ ކަމަށެވެ.
އެ މައްސަލައިގައި ފުލުހުން ކުރިން ބުނެފައި ވަނީ ފަހީމަށް އަނިޔާކޮށްފައި ވަނީ އޭނާ އަދާ ކުރާ ވަޒީފާއާ ގުޅުމެއް ނެތް ޒާތީ ކަމެއްގެ ތެރެއިން ކަމަށެވެ.
"މިކަން ހިނގާފައިވަނީ އޭނާގެ އަމިއްލަ ދިރިއުޅުމާ ގުޅުންހުރި ޒާތީ ކަމެއްގެ ތެރެއިންކަމަށް މިހާތަނާށް ލިބިފައިވާ މައުލޫމާތުން ބެލެވޭ،" ފުލުހުން ބުނެފައިވެ އެވެ.
ފަހީމު ކިޑްނެޕްކޮށް ހައެއްކަ ގަޑިއިރު ވަންދެން އަނިޔާ ކުރި ކަމަށް އޭނާ ބުނުމުން ސިފައިންގެ ވަރަށް އިސް ވަދުފެއް ވަނީ އޭނާ ކައިރިއަށް ހޮސްޕިޓަލަށް ޒިޔާރަތްކޮށްފަ އެވެ. އަދި ފަހީމު ވަގަށް ނެގި ކަމަށް ބުނާ މައްސަލަ ކުށްވެރިކޮށް އެމްއެންޑީއެފުން ބަޔާނެއް ވެސް ނެރުނެވެ.
އޭގެ އިތުރުން، ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހާއި ޑިފެންސް މިނިސްޓަރު މާރިޔާ އަހުމަދު ދީދީ ވަނީ ފަހީމުގެ ހާލު ބައްލަވައިފަ އެވެ. އަދި އޭނާގެ އާއިލާއަށް ވެސް މި ދަނޑިވަޅުގައި އެހީތެރިވެދެއްވާނެ ކަމަށް ސަރުކާރުން އޮތީ ބުނެފަ އެވެ.
