ކޮވިޑު ބަލިމަޑުކަމުގެ ތެރޭގައި ރާއްޖޭގެ ބޯޑަރު ހުޅުވާލި ފަހުން އެއް ދުވަހުގެ ތެރޭގައި އެންމެ ގިނަ ޓޫރިސްޓުން އައުމުގެ ރެކޯޑް އަނެއްކާވެސް އާކޮށްފި އެވެ.
ޓޫރިޒަމް މިނިސްޓްރީން މިކަން ފާހަގަކޮށް ކުރި ޓްވީޓެއްގައި ބުނީ މިދިޔަ އާދިއްތަ ދުވަހު 6،269 ޓޫރިސްޓުން އައި ކަމަށެވެ. މީގެ ކުރިން އެންމެ ގިނަ ޓޫރިސްޓުން އައީ އޮކްޓޫބަރު 16 ގަ އެވެ. އެ ދުވަހު އައީ 6،172 ޓޫރިސްޓުންނެވެ.
ރެކޯޑުތަކުން ދައްކާ ގޮތުގައި ޓޫރިޒަމް ނަމްބަރުތައް ދަނީ މަހުން މަހަށް އުފުލެމުންނެވެ. އެގޮތުން ނިމުނު ނޮވެމްބަރު މަހުގެ ތެރޭގައި ރާއްޖެއަށް ޒިޔާރަތްކުރި ޓޫރިސްޓުންގެ އަދަދު ކޮވިޑުގެ ބަލިމަޑުކަމުގެ ކުރީ އަހަރަށް ވުރެ ފަސް ޕަސެންޓު އިތުރެވެ.
އިމިގްރޭޝަނުން އިއްޔެ އާންމުކުރި ތަފާސްހިސާބުތައް ދައްކާ ގޮތުން 144،725 ޓޫރިސްޓުން ވަނީ ރާއްޖެއަށް ޒިޔާރަތްކޮށްފަ އެވެ. ޓޫރިސްޓުން އެންމެ ގިނައިން އައީ އިންޑިއާ އާއި، ރަޝިއާ އާއި، އިނގިރޭސިވިލާތާއި، ޖަރުމަނުގެ އިތުރުން އެމެރިކާއިންނެވެ.
މިއާއެކު މި އަހަރު ރާއްޖެ އައި ޓޫރިސްޓުންގެ އަދަދު ވަނީ 1.1 މިލިއަނަށް އަރާފަ އެވެ. އަދި މިދިޔަ ނޮވެމްބަރު މަހުގެ ރެކޯޑްކުރި އަދަދަށް ޓޫރިސްޓުން އައިސްފިނަމަ، ސަރުކާރުން ލަފާކުރާ 1.3 މިލިއަން ޓޫރިސްޓުންގެ އަމާޒަށް ވާސިލުވެވޭނެ އެވެ.
ނަމަވެސް، ކޮވިޑުގެ އާ ވޭރިއަންޓް އޮމިކްރޯންގެ ސަބަބުން ހާލަތު ބަދަލުވެ، ޓޫރިޒަމަށް ނޭދެވޭ އަސަރު ކުރުމުގެ ފުރުސަތު ވެސް އެބަ އޮތެވެ.
