ގިނަ ފާޑުކިޔުން އަމާޒުވި، އާންމު ތަންތަނުގައި މީހުން ކާފަރުކޮށް ވާހަކަ ދެއްކުމާއި އަގީދާއާ ގުޅުވައިގެން ފާޑުކިޔުން މަނާ ކުރުމުގެ ބިލު މިއަދު ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ތަސްދީގު ކުރައްވައި، ގެޒެޓު ޝާއިއުކޮށްފި އެވެ.
ރައްޔިތުންގެ މަޖިލީހުގެ ރައީސް މުހައްމަދު ނަޝީދު އަވަހާރަކޮށްލުމަށް މެއި 6، ގައި ދިން ޓެރަރިސްޓު ހަމަލާއަށްފަހު ރައްޔިތުންގެ މަޖިލީހުން ގާނޫނުލް އުގޫބާތަށް ގެނައި އިސްލާހުގައި، އާންމު ތަންތަނުގައި މީހަކު ލާދީނީ ކަމަށް ލޭބަލް ކުރުމުގެ އިތުރުން އެމީހަކު ކާފަރު ކުރުން ވެސް މަނާ ކުރެ އެވެ.
ގާނޫނުލް އުގޫބާތަށް މިއަދު އިތުރު ކުރި އެ ގާނޫނުގެ 124 ވަނަ މާއްދާގައި ބުނަނީ "ދީނީ އިލްމުވެރިންގެ މެދުގައި ރައުޔު ތަފާތުވެފައިވާ މައްސަލައެއްގައި، އޭގެ ތެރެއިން އަހްލުއްސުންނަތި ވަލް ޖަމާއަތުގެ މުއުތަބަރު ރައުޔަކާ ހިލާފުނުވާގޮތަށް މީހަކު ފާޅުކުރި ޝުއޫރަކުން، ނުވަތަ ކުރި އަމަލަކުން، އެމީހަކީ އިސްލާމްދީނާ ހިލާފަށް އުޅޭ ނުވަތަ އިސްލާމްދީނާ އިދިކޮޅު މީހެއްކަމަށް، އާންމު ތަނެއްގައި ތުހުމަތުކުރުން ނުވަތަ ސިފަކުރުން" މަނާ ކަމަށެވެ.
އޭގެ އިތުރުން، އެ މާއްދާގައި ބުނަނީ "މުސްލިމަކު ކަނޑައެޅިގެން ކުފުރުގެ ޢަމަލެއް ނުކުރާހާ ހިނދަކު ނުވަތަ ކުފުރުގެ ބަހެއް ފާޅުނުކުރާހާ ހިނދަކު، ނުވަތަ ފާޅުގައި ދީނުން ބޭރުވެ މުރުތައްދުނުވާހާ ހިނދަކު، އާންމު ތަނެއްގައި، އެމީހަކީ ކާފަރެއްގެ ގޮތުގައި ނުވަތަ މުރުތައްދުވެފައިވާ މީހެއްގެ ގޮތުގައި ތު ހުމަތުކުރުން ނުވަތަ ސިފަކުރުން" ވެސް މަނާވާނެ ކަމަށެވެ.
މީހުންގެ ލާދީނީ ލޭބަލް އަޅުވައި، ކާފަރު ކުރުމުގެ އިތުރުން އެފަދަ އަމަލެއް ކުރުމާއެކު މީހަކަށް އަނިޔާއެއް ދިނުން ނުވަތަ އަނިޔާއެއް ދިނުމަށް ގޮވާލުން ވެސް ގާނޫނުލް އުގޫބާތައް މިއަދު ގެނައި އިސްލާހުން ވަނީ މަނާކޮށްފަ އެވެ.
މީހުން ކާފަރު ކުރުމާއި ލާދީނީ ޓެގު އެޅުވުން މަނާ ކުރަން އުޅުމުން ވަރަށް ގިނަ އިލްމުވެރިން ވަނީ އެކަމާ ދެކޮޅު ހަދައިފަ އެވެ. އެއާއެކު ސަރުކާރަށް ކުރިމަތި ކުރުވި ޕްރެޝަތުތަކާއެކު އިސްލާމީ އަގީދާއާ ހިލާފް އަމަލު ކުރާ މީހުންނަށް ފިޔަވަޅު އެޅުމަށް ވެސް އިސްލާހެއް ތައްޔާރު ކުރަމުންދާ ކަމަށް ބަންޑާރަ ނައިބުގެ އޮފީހުން އޮތީ ބުނެފަ އެވެ.
