މި އަހަރުގެ އޮކްޓޯބަރު މަހުގެ ނިޔަލަށް ޖުމްލަ 28،000 އަށްވުރެ ގިން ކުށުގެ މައްސަލަ ރިޕޯޓުކޮށްފައިވާ ކަމަށާއި އޭގެ ތެރެއިން ޕްރޮސިކިއުޓާ ޖެނެރަލް އޮފީހަށް (ޕީޖީ) އަށް ހުށަހެޅީ 755 މައްސަލަ ކަމަށް ފުލުހުންގެ ތަފާސްހިސާބުތަކުން ދައްކައިފި އެވެ.
މި އަހަރު ފުލުހުންނަށް ހުށަހެޅި މައްސަލަތަކުގެ ޖުމްލަ އަދަދު 28،410 އަށް އަރާއިރު ފުލުހުން އޭގެ ތެރެއިން ތަހުގީގު ކުރަން ފަށާފައި ވަނީ 11،727 މައްސަލަ އެކެވެ. ޖުމްލަ 7،249 މައްސަލަ ފައިލް ކޮށްފައި ވާއިރު، ޕީޖީއަށް ފޮނުވާފައި ވަނީ ބެލި މައްސަލަތަކުގެ ތެރެއިން 755 މައްސަލަ އެވެ.
ފުލުހުން ބަލަން ފެށި މައްސަލަތަކުގެ ތެރެއިން އެންމެ ގިނައީ މަސްތުވާތަކެތީގެ މައްސަލަތަކެވެ.
1. ވައްކަން
ތަފާސް ހިސާބުތައް ދައްކާ ގޮތުން މި އަހަރުގެ ފުރަތަމަ 10 މަސް ދުވަހުގެ ތެރޭގައި އެންމެ ގިނައިން ހުށަހަޅާފައި އޮތީ ވައްކަމުގެ މައްސަލަތަކެވެ. ވައްކަމުގެ 8،466 މައްސަލައެއް ހުށަހަޅާފައި ވާއިރު އޭގެ ތެރެއިން 3846 މައްސަލަ ވަނީ ކޭސްކޮށްފަ އެވެ. 2644 މައްސަލަ ފައިލް ކޮށްފައިވާއިރު ވައްކަމުގެ މައްސަލައިގެ ތެރެއިން ޕީޖީއަށް ފޮނުވީ 166 މައްސަލައެކެވެ.
2. މަސްތުވާތަކެތި
މަސްތުވާތަކެތީގެ ޖުމްލަ 3،489 މައްސަލަ ހުށަހެޅި ކަމަށް ފުލުހުންގެ ހިސާބުތަކުން ދައްކަ އެވެ. އޭގެ ތެރޭގައި ހިމެނެނީ ބަނގުރަލުގެ 1،159 މައްސަލައަކާއި ނާކޮޓިކް ޑްރަގްސްގެ 2،322 މައްސަލައެކެވެ.
ޖުމްލަ 1،257 މައްސަލަ ބަނީ ބަލަން ފަށާފަ އެވެ. އެއީ ބަނގުރަލުގެ 119 މައްސަލައަކާއި ނާކޮޓިކް ޑްރަގްސްގެ 1،136 މައްސަލައެކެވެ. މަސްތުވާތަކެތީގެ 911 މައްސަލަ ފައިލް ކޮށްފައިވެ އެވެ. އެއީ ބަނގުރަލުގެ 92 މައްސަލަ އާއި 818 ނާކޮޓިކް ޑްރަގްސްގެ މައްސަލައެކެވެ.
3. ޓްރެފިކް އެކްސިޑެންޓް
ދެވަނައަށް މި އަހަރު އެންމެ ގިނަ މައްސަލަ ހުށަހަޅާފައި ވަނީ ޓްރެފިކް އެކްސިޑެންޓުތަކުގެ މައްސަލަތަކެވެ. އެ ބާވަތުގެ ޖުމްލަ 2009 މައްސަލައެއް ހުށަހަޅާފައި ވާއިރު، ބަލަން ފަށާފައި ވަނީ 1،288 މައްސަލަ އެވެ. އޭގެ ތެރެއިން 1،016 މައްސަލަ ފައިލް ކޮށްފައި ވާއިރު ޕީޖީއަށް ފޮނުވާފައި ވަނީ އެންމެ މައްސަލައެކެވެ.
4. ގެއްލޭ ތަކެތި
މި އަހަރު ގެއްލުނު ތަކެތި ހޯދުމަށް ފުލުހުންނަށް ވަނީ 1،485 މައްސަލަ ހުށަހަޅާފަ އެވެ. އޭގެ ތެރެއިން 739 މައްސަލަ ބަލަން ފަށާފައި ވާއިރު 541 މައްސަލަ ވަނީ ފައިލް ކޮށްފަ އެވެ. ޕީޖީއަށް ފޮނުވާފައި ވަނީ ފަސް މައްސަލަ އެވެ.
5. މާރާމާރީ
މާރާމާރީގެ މައްސަކަތަކަކީ ވެސް ރާއްޖޭގައި ނުރައްކާވަމުން އަންނަ މައްސަލައެކެވެ. އެގޮތުން ގްރޫޕް މާރާމާރީތައް އިތުރުވަމުން އަންނަކަން ކަމާބެހޭ އިދާރާތަކުން ވެސް މީގެ ކުރިން ފާހަގަ ކޮށްފައިވެ އެވެ.
މި އަހަރު ހުށަހެޅުނު މާރާމާރީގެ މައްސަލަތަކުގެ އަދަދު 1395އަށް އަރާއިރު ބަލަންފަށާފައި ވަނީ 523 މައްސަލަ އެވެ. އޭގެ ތެރެއިން 288 މައްސަލަ ފައިލް ކޮށްފައި ވާއިރު ޕީޖީއަށް 39 މައްސަލަ ފޮނުވާފައިވެ އެވެ.
ތަފާސްހިސާބުތަކުން ދައްކާގޮތުން ހުށަހެޅުނު މައްސަލަ އެންމެ ގިނައީ މިދިޔަ މަހުގަ އެވެ. އެގޮތުން މިދިޔަ މަހު 3182 މައްސަލަ ހުށަހަޅާފައިވެ އެވެ. އޭގެ ތެރޭގައި އެންމެ ގިނައީވެސް ވައްކަމުގެ މައްސަލަތަކެވެ. ޖުމްލަ 1001 މައްސަލަ ހުށަހަޅާފައިވެ އެވެ.
ޖެނުއަރީ މަހު 3168 މައްސަލަ ހުށަހަޅާފައި ވާއިރު ތިން ވަނަ އަށް އެންމެ ގިނައީ ސެޕްޓެމްބަރު މަހު ހުށަހެޅި މައްސަލަތަކެވެ. އެއީ 3173 މައްސަލަ އެވެ.
