މާލޭގެ މަގެއްމަތިން ހިނގާފައި ދިޔަ އަންހެނަކަށް ޖިންސީ ފުރައްސާރަ ކުރި މައްސަލައެއް ފުލުހުން ބަލަން ފަށައިފި އެވެ.
އެ މައްސަަލައާ ގުޅިގެން ފުލުހުން ބުނީ މިއަދު ހެނދުނު 11:00 ހާއިރު މަގުމަތިން ހިނގާފައި ދިޔަ އަންހެނަކަށް ޖިންސީ ފުރައްސާރަކުރި މައްސަލައެއްގެ ރިޕޯޓު ލިބިފައިވާ ކަމަށެވެ.
އަދި އެ މައްސަލައާ ގުޅިގެން 20 އަހަރުގެ ދިވެހި ފިރިހެނަކު މިހާރު ފުލުހުން ހައްޔަރުކޮށްފައިވާކަމަށް ވެސް ފުލުހުން ބުނެ އެވެ.
އެ މައްސަލައިގައި ފުރައްސާރައިގެ ޝިކާރައަކަށްވި އަންހެން މީހާ ވަނީ އެ ހާދިސާ ހިނގައިދިޔަ ގޮތް ސޯޝަލް މީޑިއާގައި އާންމުކޮށްފަ އެވެ.
އޭނާ އާންމު ކުރި ޕޯސްޓެއްގައި ބުނީ އޭނާއަށް ފުރައްސާރަކުރީ އޭނާ ވަޒީފާއަށް ދަނިކޮށް، މަގުމަތިން ދިޔަ މީހެއް ކަމަށެވެ. އަދި ފުރައްސާރަކުރުމަށްފަހު އެމީހާ ފިލަން މަސައްކަތް ކުރި ކަމަށް އޭނާ އެ ޕޯސްޓުގައި ބުނެ އެވެ.
އަންހެން މީހާ ކުރި ޕޯސްޓުގައި ބުނެފައިވަނީ އޭނާއަށް ފުރައްސާރަކުރި މީހާ ހިފެހެއްޓީ މަގުމަތީގައި ތިބި އެހެން ބައެއް ކަމަށެވެ. އަދި އެވަގުތު މަގުމަތީގައި ހަރަކާތްތެރިވަމުންދިޔަ ފުލުހުންގެ ބަޔަކާ އެމީހާ ހަވާލުކުރިކަމަށް އެ އަންހެން މީހާ ބުނެ އެވެ.
އެ މައްސަލަ މިހާރު ފުލުހުން ދަނީ ތަހުގީގުކުރަމުންނެވެ.
