ސުޕްރީމް ކޯޓުގެ ފަނޑިޔާރު ހުސްނުއްސުއޫދު ލިޔުއްވާފައިވާ ފޮތް "އިސްލާމީ ޝަރީއާގެ ހެއްކާބެހޭ އުސޫލުތައް ދިވެހިރާއްޖޭގައި ތަރުތީބު ކުރަމުންދާ ގޮތް" ޗާޕްކޮށްފި އެވެ.
ކުރިން ރާއްޖޭގެ ބަންޑާރަނައިބުކަން ވެސް ކުރެއްވި ސުއޫދު ލިޔުއްވި މި ލިޔުން، ފޮތެއްގެ ސިފައިގައި ޗާޕްކޮށްފައި ވަނީ މޯލްޑިވްސް ލޯ އިންސްޓިޓިއުޓުން އެވެ. އެއީ ސުއޫދު އެންޑް އަންވަރު އެލްއެލްޕީ އިން ކުރަމުން ދިޔަ ގާނޫނީ ފަންނުގެ މަސައްކަތުން އިންސްޕަޔާ ވެގެން އެ މަސައްކަތް ފުޅާ ކުރުމަށްޓަކައި 2004 ވަނަ އަހަރު އުފެއްދި ހިލޭ ސާބަހަށް މަސައްކަތް ކުރާ ޖަމިއްޔާއެކެވެ.
ގާނޫނާ ގުޅުންހުރި އިލްމީ ލިޔުންތައް ޝާއިއުކުރަމުން އަންނަ މި ޖަމިއްޔާއިން ބުނި ގޮތުގައި މިއީ އިސްލާމީ ޝަރިއަތުގައި ބަޔާންކޮށްފައިވާ ހެކިބަހާ ބެހޭ އުސޫލުތައް ދިވެހިރާއްޖޭގެ ކޯޓުތަކުން ތަންފީޒުކުރަމުންގެންދާ ގޮތް ބަޔާންކުރުމަށް ލިޔެވިފައިވާ އެންމެ ތަފްސީލީ ފޮތެވެ. 406 ސަފްހާގެ މައްޗަށް އެކުލެވޭ މިފޮތް ބަހާލެވިފައިވަނީ 15 ޗެޕްޓަރުގެ މައްޗަށެެވެ.
މި ފޮތުގެ އިތުރުން ދިވެހިރާއްޖޭގެ ގާނޫނާބެހޭ ގޮތުން ހުސްނުއްސޫދު ލިޔުއްވާފައިވާ 15 ފޮތެއް މޯލްޑިވްސް ލޯ އިންސްޓިޓިއުޓުން ޝާއިއުކޮށްފައި ވެއެވެ. އޭގެ ތެރޭގައި ދިވެހިރާއްޖޭގެ ބިމާ ބެހޭ ތަރުތީބު، ދިވެހިރާއްޖޭގެ ގާނޫނީ ނިޒާމު، ކޮންޓްރެކްޓާބެހޭ ގާނޫނު، ކުންފުންޏާބެހޭ ގާނޫނު، އިސްލާމީ ޝަރިއަތުގައި ތަރިކަ މުދާބެހުން ފަދަ ފޮތްތައް ހިމެނެ އެވެ.
މީގެ ނުވަ އަހަރު ކުރިން 2011 އިން ފެށިގެން ސުޕްރީމް ކޯޓުގެ ފަނޑިޔާރުކަށްވެވަޑައިގެންނެވުމާ ހަމައަށް ސުއޫދު ވަނީ މޯލްޑިވްސް ލޯ އިންސްޓިޓިއުޝަންގެ ރައީސްކަން ވެސް ކުރައްވާފަ އެވެ. ސުއޫދު ސުޕްރީމް ކޯޓުގެ ބެންޗަށް އައްޔަނު ކުރި ހިސާބުން ފެށިގެން އެޖަމިއްޔާގެ ރައީސްކަން ކުރައްވަމުން ގެންދަވަނީ މުހައްމަދު ޝަހްދީ އަންވަރެވެ. ޕްރޮސެކިއުޓާ ޖެނެރަލްކަމުގެ މަގާމު އަދާކުރެއްވި އަހުމަދު މުއިއްޒު ވެސް މި ޖަމިއްޔާގައި ހިމެނިވަޑައިގަންނަވަ އެވެ.
