މިދިޔަ ދެ މަސް ދުވަހުގެ ތެރޭ މާސްކު ނާޅާ އާއްމު ތަންތަނަށް ނުކުމެ އުޅުނު 3000 އަށްވުރެ ގިނަ މީހުން ޖޫރިމަނާކުރި ކަމަށް ފުލުހުން ބުނެފި އެވެ.
މާލެ ސަރަހައްދުގައި ދިރިއުޅޭ މީހުން، ކޮވިޑާ ގުޅިގެން އާންމު ތަންތަނަށް ނުކުމެ އުޅޭ އިރު މާސްކު އަޅަން ސަރުކާރުން މަޖުބޫރުކުރީ މިދިޔަ އަހަރު ސެޕްޓެމްބަރު މަހުގެ 30 ވަނަ ދުވަހެވެ. މާސްކު ނާޅާ ނުކުމެ އުޅޭ ނަމަ 1،000 ރުފިޔާއިން އިން ޖޫރިމަނާ ކުރެ އެވެ.
ފުލުހުންގެ މީޑިއާއިން "އަދަދު" އަށް ބުނީ މާސްކް ނާޅާ އުޅޭ މީހުންނާ މެދު މިހާރުވެސް ފިޔަވަޅު އަޅަމުންދާ ކަމަށެވެ.
"ފުލުހުން ޕެޓްރޯލް ކުރަމުންދާއިރު މާސްކް ނާޅާ އުޅޭ މީހުން ހުއްޓުވާ ފިޔަވަޅު އަޅަމުންދޭ،"
މިދިޔަ ދެ މަސް ތެރޭ މާސްކް ނާޅާ ބޭރުގައި އުޅެގެން ޖުމްލަ 3،142 މީހަކު ޖޫރިމަނާ ކޮށްފައިވާ ކަމަށް ފުލުހުން ބުނެ އެވެ. އެގޮތުން ސެޕްޓެމްބަރު މަހު 1،609 މީހަކު ޖޫރިމަނާ ކޮށްފައި ވާއިރު އޮކްޓޫބަރު މަހު ވަނީ 1533 މީހަކު ޖޫރިމަނާ ކޮށްފަ އެވެ.
މިހާރު ލުއި ދީފައިވާ ނަމަވެސް ރާއްޖޭން ކޮންމެ ދުވަހަކު ފެންނަ ޕޮޒިޓިވް ކޭސްތަކުގެ އަދަދު ހުންނަނީ 100 އިން މަތީގަ އެވެ. ޖުމްލަ އަދަދު ވަނީ 89،126 އަށް އަރާފަ އެވެ. ބަލިން މިހާތަނަށް 86،767 މީހުން ރަނގަޅު ވެފައި ވާއިރު އެކްޓިވް ކޭސް ގޮތުގައި 2080 މީހުން އެބަ ތިއްބެވެ.
12 މީހުން ހޮސްޕިޓަލުގައި އެޑްމިޓްކޮށް ފަރުވާ ދެމުންދާއިރު، 246 މީހަކު ވަނީ ރާއްޖެއިން މި ބަލީގައި މަރުވެފަ އެވެ.
