އެންވަޔަރަންމެންޓް ޕްރޮޓެކްޝަން އެޖެންސީ (އީޕީއޭ) މިނިވަން މުއައްސަސާއަކަށް ހެދުމުގެ ސިޔާސަތު ތަންފީޒުނުކުރާ މައްސަލަ ބަލަން ރައްޔިތުންގެ މަޖިލީހުގެ އެންވަޔަރަންމެންޓް އެންޑް ކްލައިމެޓް ޗޭންޖް ކޮމިޓީން ފާސްކޮށްފި އެވެ.
ކޮމިޓީގެ މެމްބަރުންގެ އަގުލަބިއްޔަތާއެކު ބަލަން ފާސްކުރި އެ މައްސަލަ މަޖިލީހުގެ ކޮމިޓީއަށް ހުށަހެޅީ މަޖިލީހުގެ އުނގޫފާރު ދާއިރާގެ މެމްބަރު މުހައްމަދު ވަހީދު (ފައިނު ވައްޑެ) އެވެ. އެ މައްސަލައާ ގުޅޭ ގޮތުން މެމްބަރު ވަހީދު ވިދާޅުވީ، އީޕީއޭ މިނިވަންކުރުމަކީ ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހުގެ ވައުދެއް ކަމަށެވެ. އަދި އެ ވައުދު ފުއްދުމަކީ އޭނާ ގަބޫލުކުރާ ގޮތުގައި އެއަށް އެއްވެސް ބަދަލެއް ނުގެނެސް ކުރަން ޖެހޭނެ ކަމެއް ކަމަށް އޭނާ ވިދާޅުވި އެވެ.
"އެކަމުގައި މިނިސްޓަރު ޝައުނާ ދަނީ ވަރަށް ގިނަ ބަހަނާތައް ދައްކަވަމުން އެކަން ނުކުރައްވަން. އެކަމަކު އަޅުގަނޑު ގަބޫލުކުރާ ގޮތުގައި އެއީ ރިޔާސީ ވައުދެއް، އެހެންވީމަ އެކަން ކުރެވެން ޖެހޭނެ. އަދި އެ ކަންކަން ބަދަލެއް ވެސް ނުކުރެވޭނެ، ހަމަ ހުރެ ބަހައްޓާފަ ރައީސް ވެސް އެހެން ވިދާޅެއްނުވާނެ ނޫންްތޯ، އަދި ވަކިން މިނިސްޓަރަކަށް ކިހިނެތް އެކަން ބަދަލުކުރާނީ؟،" މެމްބަރު ވަހީދު ވިދާޅުވި އެވެ.
މެމްބަރު ވަހީދު މިހެން ވިދާޅުވީ މިނިސްޓަރު ޝައުނާ ދާދި ފަހުން "ދައުރު" ނޫހަށް ދެއްވި އިންޓަވިއުއެއްގައި އީޕީއޭގައި މިނިވަން ޓެގް އެޅުވުމަށްވުރެ އީޕީއޭއަށް ޓެކްނިކަލް މުވައްޒަފުންނާއި ކެޕޭސިޓީ ބޭނުންވާކަމަށާއި އަދި ޑޭޓާ ޑްރިވެން ޕޮލިސީއާއި ނިންމުން ނިންމޭ ތަނަކަށް އެތަން ހެދުން މާ މުހިންމުކަމަށް ވިދާޅުވި ވިދާޅުވުމަށް އިޝާރާތް ކުރައްވަމުންނެވެ.
"އެއީ ރައީސްގެ ވައުދެއް، ދެން އޭގެ އިތުރުން ސަރުކާރުގެ ސްޓްރޭޓީޖިކް އެކްޝަން ޕްލޭންގައި ވެސް އެބަ އޮވޭ މުހުލަތެއް ދީފަ. އެހެންވީމަ އަޅުގަނޑެއް ގަބޫލެއް ނުކުރަން ހަގީގަތުގަ އެ ވައުދު ރޫޅާލެވޭނެކަމަށް. އެއީ ތިމާވެއްޓާއި ގުޅޭ ކަންކަން އެބަ ޖެހޭ ދެމެހެއްޓެނިވި ނިޒާމަކަށް ލަންބަން،" މެމްބަރު ވަހީދު ވިދާޅުވި އެވެ.
އީޕީއޭ މިނިވަން ތަނަކަށް ވުމުން، ސިޔާސީ ގިނަ ފަރާތްތަކަކަށް އެތަން ސިފަވެގެންދަނީ ތަރައްގީގެ މަޝްރޫއުތަކަށް ހުރަސްއަޅާނޭ ތަނެއްގެ ގޮތުގައި ކަމަށް މެމްބަރު ވަހީދު ވިދާޅުވި އެވެ. އެހެންނަމަވެސް އެއީ އެކަން އޮންނަ ގޮތް ނޫންކަމަށާއި އަދި އޮންނަން ޖެހޭނެ ގޮތެއް ނޫންކަމަށް ވެސް އޭނާ ވިދާޅުވި އެވެ.
"އަޅުގަނޑުމެން ކުރިޔަށް ގެންދާ ތަރައްގީގެ މަޝްރޫއުތައް އެބަ ޖެހޭ ތިމާވެއްޓާ އެއްގޮތަށް ކުރިޔަށް ގެންދަން ދެމެހެއްޓެނިވިކޮށް، ތިމާވެއްޓެއް ނޫން ތަރައްގީގެ މަޝްރޫއުތަކަށް ލަންބަންވީ، ތިމާވެއްޓަށް ކުރާ އަސަރު ދަށްކުރަންވީ،" މެމްބަރު ވަހީދު ވިދާޅުވި އެވެ.
އެގޮތަށް ކަންކަންކުރަން އީޕީއޭ މިނިވަން ތަނެއްގެ ގޮތުގައި އޮތުމަކީ ވަރަށް މުހިންމު ކަމެއް އޭނާ ވިދާޅުވި އެވެ.
ކޮމިޓީން މިހާރު އެ މައްސަލަ ބަލައިގަނެފައިވީނަމަވެސް، އަދި އެ މައްސަލައިގެ މަސައްކަތްތައް ފަށާފައިނުވާކަމަށް މެމްބަރު ވަހީދު ވިދާޅުވި އެވެ.
އީޕީއޭ މިހާރު އޮންނަ ގޮތުންނަމަ، އެއީ މިނިސްޓްރީ އޮފް އެންވަޔަރަމަންޓް، ކްލައިމެޓް ޗޭންޖް އެންޑް ޓެކްނޮލޮޖީގެ ދަށުން ހިންގާ މުއައްސަސާއެކެވެ. އެގޮތުން އީޕީއޭއާ ގުޅެ ގަވާއިދުތައް އެކުލަވާލަނީ މިނިސްޓްރީންނެވެ. އަދި އީޕީއޭގެ ބައެއް ނިންމުންތައް މިނިސްޓަރަށް އިސްތިއުނާފް ކުރުމުގެ ބާރުވެ ލިބިފައި ވެ އެވެ.
އެގޮތުން އެންމެ ފަހުގެ ފާހަގަކޮށްލެވޭ އެފަދަ އެއް ކަމަކީ، ކ. ރަސްފަރީ ފަރަށް އެރި އާގުބޯޓުގެ މައްސަލަ އެވެ. އެ މައްސަލައިގައި އިހުމާލު އޮވެގެން، އީޕީއޭއިން ކުރި ދިރާސާތަކުގެ އަލީގައި ތިމާވެއްޓަށް ލިބުނު ގެއްލުމުގެ ބަދަލު އަދި އިހުމާލުގެ ޖޫރިމަނާއާއެކު އެބޯޓުގެ ވެރިންނަށް ވަނީ 800 މިލިއަން ރުފިޔާގެ އަދަދެއް ދައްކައި ހަލާސްކުރުމަށް އަންގާފަ އެވެ.
އެހެންނަމަވެސް އެ ނިންމުން ގަވާއިދުގެ ދަށުން އީޕީއޭއިން ވަނީ މިނިސްޓަރުގެ އަރިހުގައި އިސްތިއުނާފްކުރަން ހުށަހަޅާފަ އެވެ.
އޭގެ އިތުރުން ވެސް އީޕީއޭއިން ހަދާ އެންވަޔަރަންމެންޓް އިމްޕެކްޓް އެސެސްމެންޓްތައް ވެސް އިސްތިއުނާފްކުރުމުގެ ބާރު މިނިސްޓަރަށް ލިބިގެންވެ އެވެ. އީޕީއޭ މިނިވަންކުރުމަށް ގޮވާލާ ގިނަ ބަޔަކު ދަނީ މިފަދަ ކަންކަން ފާހަގަކޮށް އީޕީއޭ އޮންނަނީ މިނިސްޓްރީގެ ބާރުގެ ދަށުގައި ސިޔާސީ ވެރިޔެއްގެ ދަށުގައިކަމަށް ބުނެ ފާޑުކިޔައި، އެކަން ބަދަލުކުރުމަށް ގޮވާލާފަ އެވެ.
