ސުވާލު އުފެދޭ ފަދަ ގޮތަކަށް މަރުވެފައި އޮއްވާ ފެނުނު އައިޖީއެމްއެޗުގެ ފިލިޕީންސް ނަރުސް މޭރީ ގްރޭސް ޕިނޭޑާ މަރުވެފައި ވަނީ ލިބުނު ޒަހަމްތަކުގެ ސަބަބުން ކަމަށް އޭނާގެ ހަށިގަނޑުގެ ޕޯސްޓްމޯޓަމް ރިޕޯޓުން ދައްކާ ކަމަށް ފުލުހުން ބުނެފި އެވެ.
އިންޑިއާއިން ގްރޭސްގެ ހަށިގަނޑު ޕޯސްޓްމޯޓަމް ހެދުމަށްފަހު، ރޭގެ ވަގުތެއްގައި ހަށިގަނޑު ވަނީ މާލެ ގެނެސްފަ އެވެ. އޭނާގެ ހަށިގަނޑު އަދިވެސް ފުލުހުންގެ ބެލުމުގެ ދަށުގައި އޮތް އިރު، އާއިލާއާ ހަށިގަނޑު ހަވާލުކުރުމުގެ މަސައްކަތް ކުރަމުން އަންނަ ކަމަށް ފުލުހުން ބުނެ އެވެ.
"އަދަދު"އަށް މައުލޫމާތު ދެމުން ފުލުހުންގެ އޮފިޝަލަކު ވިދާޅުވީ ގްރޭސްގެ ޕޯސްޓްމޯޓަމް ރިޕޯޓުން ދައްކާ ގޮތުން އޭނާ މަރުވެފައި ވަނީ ދަންޖެހިގެން ކަމަށް ނުބެލެވޭ ކަމަށެވެ.
ހީމޯޑަޔަލެސިސް ނަރުހެއްގެ ގޮތުގައި މަސައްކަތް ކުރި ގްރޭސްގެ މަރުގެ މައްސަލައިގައި އޭނާގެ ފިރިމީހާ ވަނީ ހައްޔަރުކޮށްފަ އެވެ.
ގްރޭސްގެ ފިރިމީހާ އަކީވެސް ފިލިޕީންސަށް ނިސްބަތްވާ މީހެކެވެ. އޭނާ އަކީ އައިޖީއެމްއެޗުގެ އީއާރުގައި މަސައްކަތް ކުރާ ނަރުހެކެވެ.
ގްރޭސްގެ މަރާ ގުޅިގެން އޭނާގެ ފިރިމީހާ ހައްޔަރުކޮށްފައި ވަނީ އޭނާގެ މަރުގައި "ބަލަންޖެހޭ އިތުރު ކަންކަން ހުރި ކަމަށް ފާހަގަ" ކުރެވޭތީ ކަމަށް ފުލުހުން ބުނެ އެވެ.
އެނގިފައިވާ ގޮތުގައި ގްރޭސްއަށް އަނިޔާތަކެއް ލިބިފައިވާކަމުގެ ނިޝާންތަކެއް ހަށިގަނޑުން ވަނީ ފެނިފަ އެވެ.
ގްރޭސް އޭނާގެ ފިރިމީހާއާ ކައިވެނިކޮށްފައި ވަނީ މީގެ ފަސް އަހަރު ކުރިން 2016 ވަނަ އަހަރުގެ މެއި މަހުގެ ތެރޭގަ އެވެ.
