ވަޒީފާގެ މާހައުލުގައި މުވައްޒަފުންގެ ރައްކާތެރިކަން ކަށަވަރުކުރުމާ ގުޅޭ އޮކިއުޕޭޝަނަލް ހެލްތް އެންޑް ސޭފްޓީ ބިލު ޑްރާފްޓުކޮށް ނިންމާ އެޓާނީ ޖެނެރަލް އޮފީހުގެ ލަފަޔަށް ފޮނުވާފައިވާ ކަމަށް އިކޮނޮމިކް މިނިސްޓަރު ފައްޔާޒު އިސްމާއިލް މިއަދު ވިދާޅުވެއްޖެ އެވެ.
އެންމެ ކުޑަ އުޖޫރަ ކަނޑައަޅަން ބޭއްވި ރަސްމިއްޔާތުގައި, ބައެއް ވަޒީފާގެ މާހައުލުތަކުގައި ވަރަށް ހިތާމަވެރި ހާދިސާތަކެއް ހިނގާފައިވާ ކަން ފާހަގަކުރައްވަމުން ފައްޔާޒު ވިދާޅުވީ މި ވަގުތު ވަޒީފާގެ މާހައުލުގެ ރައްކާތެރިކަމާ ގުޅޭ ބައެއް ކަންކަމަށް އަމަލުކުރަމުން ދިޔަ ނަމަވެސް އެކަން ތަންފީޒުކުރަން އެކަށީގެންވާ ގާނޫނާއި ގަވާއިދުތަކެއް ނެތް ކަމަށެވެ.
އަޅުގަނޑުމެންނަށް އެބަ ފެނޭ ވަރަށް ހިތާމަވެރި ހާދިސާތައް ބައެއް މަސައްކަތުގެ މާހައުލުގައި ހިނގަމުންދާ ކަން. އަޅުގަނޑުމެން އެކަން ގަވަން ކުރާނެ ގަވާއިދުތަކެއް ގާނޫނުތަކެއް މި ވަގުތަކު ނެތް. ކޮންމެވެސް ވަރެއްގެ ޕްރޮސީޖާސްތަކެއް އެބަހުރި. އެހެން ނަމަވެސް އެހާ ފުރިހަމައަކަށް ނޫން އެކަން ހުރީ." ފައްޔާޒު ވިދާޅުވި އެވެ.
އެޓާނީ ޖެނެރަލް އޮފީހުގެ ލަފާ ލިބުމުން މި ބިލަށް އާންމުންގެ ހިޔާލު ހޯދަން ހުޅުވާލާނެ ކަމަށް ފައްޔާޒު ވިދާޅުވި އެވެ. އަދި އެ މަސައްކަތް ނިންމާ މި އަހަރުގެ ތެރޭގައި މަޖިލިހުގެ ތަޅުމަށް މި ބިލު ފޮނުވާނެ ކަމަށް ވިދާޅުވި އެވެ.
ވަޒީފާގެ މާހައުލުގެ ރައްކާތެރިކަމާ ގުޅޭ ބިލުގެ އިތުރުން މަސައްކަތްތެރިންގެ ޔޫނިއަންތަކަށް ގާނޫނީ ހައިސިއްޔަތު ދޭން ބޭނުންވާ އިންޑަސްޓްރިއަލް ރިލޭޝަންސް ބިލުގެ މަސައްކަތް ވެސް ކުރަމުން އަންނަ ކަަމަށާއި އެ ބިލު ވެސް އޭޖީގެ ލަފަޔަށް ވަރަށް އަވަހަށް ފޮނުވާނެ ކަމަށް ފައްޔާޒު ވިދާޅުވި އެވެ. އަދި އުއްމީދަކީ އަންނަ އަހަރުގެ ކުރީކޮޅު މި ދެ ބިލު ގާނޫނަކަށް ވެގެން ދިޔުން ކަމަށް އޭނާ ވިދާޅުވި އެވެ.
އޮކިއުޕޭޝަނަލް ހެލްތް އެންޑް ސޭފްޓީ ގާނޫނަކީ ކޮބާ؟
އޮކިއުޕޭޝަނަލް ހެލްތް އެންޑް ސޭފްޓީ ގާނޫނަކުން ވަޒީފާގެ މާހައުލުގައި މުވައްޒަފުންނަށް ރައްކާތެރިކަން ހޯދައިދޭން ވަޒީފާދޭ ފަރާތުގެ މައްޗަށް ލާޒިމުކުރާނެ އެވެ. މިފަދަ ގާނޫނެއްގެ ސަބަބުން މަސައްކަތް ކުރާ ތަނުގެ ރައްކާތެރިކަމުގެ މިންގަނޑުތައް ކަނޑައެޅޭނެ އެވެ.
އޭގެ އިތުރުން ނުރައްކާތެރި ހާދިސާއަކުން މުވައްޒަފުންނާއި ހިދުމަތް ލިބިގަންނަން އަންނަ މީހުންނަށް ރައްކާތެރިކަން ނުދޭ ވަޒީފާދޭ ފަރާތްތަކަށް ފިޔަވަޅު އަޅާނެ މަގުފަހު ވާނެ އެވެ. އަދި ނުރައްކާތެރި މާހައުލުތަކުގައި މަސައްކަތްކުރަން އިންކާރުކުރާ މުވައްޒަފުންނަށް ވަޒީފާގެ ރައްކާތެރިކަން ލިބިގެން ދާނެ އެވެ.
ރާއްޖޭގައި މިފަދަ ގާނޫނެއް ނެތުމުގެ ކަންބޮޑުން މަސައްކަތްތެރިންގެ ޖަމިއްޔާތަކާއި މުވައްޒަފުންގެ ރައްކާތެރިކަމަށް ވަކާލާތުކުރާ ފަރާތްތަކުން މީގެ ކުރިން ވެސް ވަނީ އުފުލާފަ އެވެ.
ހާއްސަކޮށް އިމާރާތްކުރުމުގެ ތެރޭގައި ހިނގި ނުރައްކާތެރި ހާދިސާތަކާއި، ވިޔަފާރި ބަނދަރުގައި ހިނގި ނުރައްކާތެރި ހާދިސާތަކާއި ގުޅިގެން މިފަދަ ގާނޫނެއް ކޮންމެހެން ބޭނުން ކަމަށް ބުނާ އަޑުތައް ގަދަވި އެވެ.
މީގެ ބައެއް ހާދިސާތަކުގައި މީހުންގެ ފުރާނަ ގެއްލިފައި ވެ އެވެ. އަދި އެހެން ބައެއް ހާދިސާތަކުގައި މީހުންނަށް ބޮޑެތި އަނިޔާތަކެއް ލިބި، ދާއިމީ ނުކުޅެދުންތެރިކަމާ ވެސް ކުރިމަތިލާން ޖެހިފައި އެބަހުއްޓެވެ.
