ރާއްޖޭގައި ދެވޭނެ އެންމެ ކުޑަ މުސާރަ ނުވަތަ މިނިމަމް ވޭޖް ކަޑައަޅައި، އެކަން އިއުލާނުކުރަން ހާއްސަ ރަސްމިއްޔާތެއް މާދަމާ ބާއްވާން ހަމަޖައްސައިފި އެވެ.
އިކޮނޮމިކް މިނިސްޓްރީން ބުނީ މިނިމަމް ވޭޖު ކަނޑައެޅުމަށް ހާއްސަ ރަސްމިއްޔާތެއް މާދަމާ ހެނދުނު 9.30 ގައި އޮންނާނެ ކަމަށެވެ.
އެ ރަސްމިއްޔާތުގައި މިނިމަމް ވޭޖު ކަނޑައެޅުމުގެ ގަރާރުގައި ސޮއި ކުރުމުގެ އިތުރުން، އެކަމާ ގުޅޭ ހާއްސަ ޕްރެޒެންޓޭޝަނެއް ދޭނެ ކަމަށް ބުންޏެވެ.
އަދި އެކަމުގެ އިތުރު މައުލޫމާތު ހިއްސާކުރަން، މާދަމާ ހެނދުނު 11:00 ގައި ނޫސްވެރިންގެ ބައްދަލުވުމެއް ވެސް މިނިސްޓްރީން ވަނީ ތާވަލުކޮށްފަ އެވެ.
އެންމެ ކުޑަމިނުން ދޭންޖެހޭނެ އުޖޫރައާ ގުޅޭގޮތުން މިނިމަމް ވޭޖު ބޯޑުން މައިގަނޑު ފަސް ބައެއްގެ މައްޗަށް ވަނީ ލަފާދީފަ އެވެ.
އެގޮތުން، ޕްރައިވެޓް ސެކްޓާގައި ކުދި ފަންތީގެ ވިޔަފާރިތަކަށް ގަޑިއިރަކަށް ގަޑި އިރަކަށް 24.04ރ. ގެ މަގުން، ވަޒީފާއާ ބެހޭ ގާނޫނުގައި އެންމެ ގިނަވެގެން ހަފްތާއަކަށް މަސައްކަތް ކުރެވޭނެ 48 ގަޑިއިރުގެ ނިސްބަތުން މަހަކު 5،000ރ. ކަނޑައަޅަން ލަފާދީފައި ވެއެވެ.
ޕްރައިވެޓް ސެކްޓާގައި މެދު ފަންތީގެ ވިޔަފާރިތަކަށް އެންމެ ކުޑަ އުޖޫރައިގެ ގޮތުގައި ކަނޑައަޅަން ލަފާދީފައިވަނީ ގަޑި އިރަކަށް 33.65ރ. ގެ މަގުންނެވެ. އެއީ މަހެއްގެ މައްޗަށް ބަލާއިރު 7،000ރ. އެވެ.
އޭގެ އިތުރުން ޕްރައިވެޓް ސެކްޓާގައި ކުދި އަދި މެދު ފަންތީގެ ވިޔަފާރިތަކުގެ ތެރޭގައި ނުހިމެނޭ ބޮޑެތި ވިޔަފާރިތަކަށް ކަނޑައަޅާފައި ވަނީ ގަޑި އިރަކަށް 42.79ރ. އެވެ. އެއީ ހަފްތާއަކު އެންމެ ގިނަވެގެން މަސައްކަތް ކުރެވޭ 48 ގަޑިއިރުގެ ނިސްބަތުން މަހަކު 8،900ރ. އެވެ.
ޕަބްލިކް ސެކްޓާގައި ހަ ގަޑިއިރު މަސައްކަތް ކުރާ މުވައްޒަފުންނަށް މަހަކު 7،000ރ. ނުވަތަ ހަ ގަޑިއިރަށް ވުރެ މަދުން މަސައްކަތް ކުރާ މުވައްޒަފުންނަށް ގަޑިއިރަކަށް 33.65ރ. ކަނޑައަޅަން ބޯޑުން ވަނީ ލަފާދީފައި އެވެ.
އޭގެ އިތުރުން، ރާއްޖޭގައި މަސައްކަތްކުރާ ބިދޭސީންނަށް މިނިމަމް ވޭޖް ކަނޑައެޅުމުގައި މިހާރު އިއުލާނުކޮށްފައިވާ މޮރޮޓޯރިއަމް ފަސް އަހަރުގެ މުއްދަތަކަށް ދިގު ދައްމާލުމަށް ބޯޑުން ވަނީ ލަފާދީފަ އެވެ.
މި މުއްދަތުގައި މިކަމާ ގުޅޭ އިތުރު ދިރާސާތައް ކުރުމަށް ވަނީ ނިންމާފަ އެވެ.
