ފުލުހުންނަށް ބޭނުންވާ ވެހިކަލާއި އައިއީޑީ ޑެޓެކްޓާސް ފަދަ ގިނަ އަދަދެއްގެ ސާމާނު އިންޑިއާ ސަރުކާރުން ހަދިޔާ ކުރުމަށް ނިންމައިފި އެވެ.
މިއަދު ފުލުހުން އާންމު ކުރި އިއުލާނެއްގައި ފުލުހުންނަށް ބޭނުންވާ ސާމާނު ހޯދުމަށް ދިވެހިރާއްޖޭގައި ހުންނަ އިންޑިއާ ހައި ކޮމިޝަނުން ކޮށްފައިވާ އިއުލާނު ވަނީ އާންމުކޮށްފަ އެވެ. އެ އިއުލާނުގައި 36 ވެހިކަލާއި 20 ބާވަތެއްގެ އެހެނިހެން ސާމާނު ހޯދުމަށް އޮތީ އިއުލާނުކޮށްފަ އެވެ.
އިންޑިއާ ހައި ކޮމިޝަނުގެ އިއުލާނުގައި ހޯދުމަށް އެދިފައި ވަނީ ސިޑާންގެ ދެ ވައްތަރެއްގެ 15 ކާރާއި ހަތަރު އެސްޔޫވީ އާއި ޕިކަޕު ވައްތަރުގެ ފަސް އުޅަނދު ހިމެނެ އެވެ. އަދި ހޯދަން އެދުނު އެހެނިހެން ސާމާނުތަކުގެ ތެރޭގައި ޝީލްޑާއި ރަޔަޓް ހެލްމެޓާއި ތާމަލް ދުރުމި އާއި ނައިޓް ވިޝަން ދުރުމި އާއި އައިއީޑީ ޑެޓެކްޓާސް އާއި މުގުރާއި މެޓަލް ޑިޓެކްޓާސް އާއި މަގުމަތީ ބަހައްޓާ ކޯނާއި ބެރިކޭޑު ވެސް ހިމެނެ އެވެ.
ހައި ކޮމިޝަނުގެ އިއުލާނުގައި އެދިފައި ވަނީ ފުލުހުންނަށް ބޭނުންވާ ސާމާނު 60 ދުވަހުގެ ތެރޭގައި ފޯރުކޮށްދިނުމަށެވެ. އަދި ގެންނައިރު، ވެހިކަލް ފަދަ ބައެއް ތަކެތީގައި އިންޑިއާ އާއި ރާއްޖެއާދެމެދު އޮތް ގުޅުން ރަމްޒުކޮށްދޭ ލޯގޯއެއް ޖަހަންވާނެ ކަމަށް ވެސް އިއުލާނުގައި ބުނެފައިވެ އެވެ.
ދިވެހި ރައްޔިތުންނަށް ރަނގަޅު އަދި ފުރިހަމަ ހިދުމަތެއް ފޯރުކޮށްދިނުމުގައި އެހީތެރިވެދޭނީ ފުލުހުން ވަނީ އިންޑިއާ ސަރުކާރަށް ޝުކުރު އަދާކޮށްފަ އެވެ.
ދިވެހި ފުލުހުންނަށް ބޭނުންވާ ބައެއް ތަކެތި އިންޑިއާ ސަރުކާރުން ހަދިޔާކުރާއިރު އެ ގައުމުގެ ސަރުކާރުގެ އެހީގައި 37 މިލިއަން ރުފިޔާގެ ޕްރޮޖެކްޓުތަކެއް ހިންގުމަށް މިދިޔަ އޮކްޓޯބަރު މަހު ވަނީ ސޮއިކޮށްފަ އެވެ. އެ ޕްރޮޖެކްޓުގެ ދަށުން ކުރަން ހަމަޖެހިފައިވާ މަސައްކަތްތަކުގެ ތެރޭގައި ރަށްރަށަށް އެމްބިއުލޭންސް ހޯދުމާއި އޮލިމްޕަސް ތިއޭޓަރު މަރާމާތު ކުރުން ހިމެނެ އެވެ.
