ގައުމީ އެއާލައިން މޯލްޑިވިއަންއިން އިންޑިއާގެ ވެރިރަށް ނިއު ދިއްލީއަށް ސީދާ ދަތުރުތައް ކުރަން ފަށައިފި އެވެ.
މިއަދު ފެށި އެ ދަތުރުތަކުގައި، މޯލްޑިވިއަން އިން ހަފްތާއަކު ތިން ދަތުރު މާލެއާއި ނިއު ދިއްލީއާ ދެމެދު ކުރާނެ އެވެ. މޯލްޑިވިއަންގެ ޕީއާރު އެންޑް ކޮމިއުނިކޭޝަންސް މެނޭޖަރު މޫސާ ވަސީމް ވިދާޅުވީ އެ ދަތުރުތަކަށް ޓިކެޓްގެ އަގު ފަށާނީ 150 ޑޮލަރުން ކަމަށެވެ.
އެހެންނަމަވެސް, ސީޓުތަކަށް ބަލައި އަގުތަކަށް ބަދަލެއް އައުން ވެސް އެކަށީގެންވާކަމަށް މޫސަ ވިދާޅުވި އެވެ. އަދި ކުރިޔަށް އޮތްތަނުގައި މޯލްޑިވިއަންއިން ދިއްލީއަށް އޮޕަރޭޓްކުރަމުންދާނެ ކަމަށް ވެސް އޭނާ ވިދާޅުވި އެވެ.
"ދެން އަޅުގަނޑުމެން މިދަނީ މާފަރުން ނިއު ދިއްލީއަށް ކުރަން ރާވާފައިވާ ދަތުރުތަކުގެ މަސައްކަތް ވެސް ޕްރޮމޯޓް ކުރަމުން. އޭގެ އިތުރުން މިހާރު އިންނާނެ މޯލްޑިވިއަން އިން ސްޓާފް ފެއާއެއް ވެސް ހުޅުވާލާފަ، އެއީ ސްޓާފުންގެ އާއިލާއާ އެކުވެރިންނަށް ދަތުރުކުރެވޭ ފެއާއެއް،" މޫސަ ވިދާޅުވި އެވެ.
މޯލްޑިވިއަން އިން ވަނީ މާފަރާއި ނިއު ދިއްލީއާ ދެމެދުގައި ސީދާ ދަތުރުތައް ފަށަން ނިންމާފައިވާކަން މީގެ ދެ މަސް ކުރިން އިއުލާންކޮށްފަ އެވެ. އެހެންނަމަވެސް އެ ދަތުރުތައް ފެށުމުގައި އަދި ލަސްކަމެއް އުޅޭ ކަމަށް މޫސަ ވިދާޅުވި އެވެ. އަދި ކުރިޔަށް އޮތްތަނުގައި އެ ދަތުރުތައް ވެސް ފަށާނެ ކަމަށް އޭނާ ވިދާޅުވި އެވެ.
"ސީދާ ތާރީހެއް އަދި ދަންނަވާކަށް ނޭނގެ، އެކަމަކު އަދި މިވަގުތު މާލެއިން އެކަނި އޮޕަރޭޓްކުރާނީ ނިއު ދިއްލީއަށް،" އޭނާ ވިދާޅުވި އެވެ.
މޯލްޑިވިއަނުން އަންނަނީ މިހާރު ވެސް އިންޑިއާގެ ހަތަރު މަންޒިލަކަށް ދަތުރު ކުރަމުންނެވެ. އެއީ ޗެންނާއި، ޓްރިވެންޑްރަމް، ކޮޗީ އަދި މުމްބާއީ އެވެ. ނިއު ދިއްލީ ދަތުރުތައް މިއަދު ފެށުމާއެކު މިހާރު މޯލްޑިވިއަން އިން އިންޑިއާގެ ޖުމްލަ ފަސް މަންޒިލަކަށް އޮޕަރޭޓްކުރެ އެވެ. އޭގެ އިތުރުން ބަންގްލަދޭޝްގެ ވެރިރަށް ޑާކާ އަދި ތައިލެންޑުގެ ވެރިރަށް ބެންކޮކަށްވެސް މޯލްޑިވިއަނުން ދަތުރު ކުރެ އެވެ.
