ކޮވިޑުގެ ސަބަބުން ހިދުމަތް ނުދީ ބަންދުކޮށްފައި ހުރި ދާރުލްއާސާރާއި ނެޝަނަލް ލައިބްރަރީ މާދަމާ ހުޅުވަން މިނިސްޓްރީ އޮފް އާޓްސް، ކަލްޗާ އެންޑް ހެރިޓޭޖުން ނިންމައިފި އެވެ.
"މާދަމާ ދާރުލްއާސާރާއި ލައިބްރަރީ ހުޅުވާނެ. ދާރުލްއާސާރުގައި ކަރަންޓުގެ މައްސަލަތައް ހައްލުކޮށް. ލައިޓްތައްވެސް ރަނގަޅުކޮށްފައި ވަނީ،" މިނިސްޓްރީގެ ކޮމިއުނިކޭޝަންސް ޑިރެކްޓަރު އިސްމާއިލް ނާއިލް ރަޝީދު ވިދާޅުވި އެވެ.
"ސްޓޮކްގައި ހުރި ބައެއް އެއްޗެހި ވެސް ނެރެ ޑިސްޕްލޭ ކޮށްފައިވާނީ."
ސަލްޓާން ޕާކުގެ ފުރަގަހަށް ވާގޮތަށް ޗާންދަނީ މަގުގައި ހުންނަ ދާރުލް އާސާރު ބަންދުކުރީ މިދިޔަ އަހަރުގެ މާޗް މަހުގެ ތެރޭގަ އެވެ. އެއީ ރާއްޖެ އަށް ޒިޔާރާތްކުރި ޓޫރިސްޓަކު ކޮވިޑަށް ޕޮޒިޓިވްވުމާ އެކު ސަރުކާރުން އެންމެ ފުރަތަމަ އެޅި ސަލާމަތީ ފިޔަވަޅުތަކުގެ ތެރެއިން އެވެ.
ލައިބްރަރީ އޭރު ބަންދުކުރުމަށް ފަހު އަލުން ހުޅުވި އެވެ. އެކަމަކު ހާލަތު ގޯސްވުމުން އެތަން ބަންދުކުރީ އެވެ. ރާއްޖޭގެ އެންމެ ބޮޑު އާކައިވް ބަންދުކޮށްފައި ހުރުމުގެ ސަބަބުން ދަރިވަރުންނާއި ދިރާސާކުރާ މީހުންނަށް އަދި އާއްމު ކިޔުންތެރިންނަށް ދަތިތަކާ ކުރިމަތިލާން ޖެހުނެވެ.
ހެރިޓޭޖް މިނިސްޓްރީން ބުނީ މާދަމާއިން ފެށިގެން ކޮންމެ ދުވަހެއްގެ ވެސް ހެނދުނު 10:00 ފެށިގެން ހަވީރު 16:00 އަށް ދާރުލްއާސާރު ހުޅުވާފައި ހުންނާނެ ކަމަށެވެ. އެތަނަކީ ދިވެހިންނަށް ވުރެ ބޮޑަށް މާލެ އަންނަ ޓޫރިސްޓުންގެ ޝައުގުު ހުއްޓޭ ތަނެކެވެ.
