ޕަބްލިކް ސެކްޓަރ އިންވެސްޓްމެންޓް ޕްރޮޖެކްޓްސް (ޕީއެސްއައިޕީ) އަށް މިއަހަރުގެ މިހާތަނަށް ސަރުކާރުން ކޮށްފައިވާ ހަރަދު މިދިޔަ އަހަރުގެ މި މުއްދަތުގައި ކުރި ހަރަދަށްވުރެ މަދުކަމަށް ފިނޭންސް މިނިސްޓްރީން ހާމަކޮށްފި އެވެ. އަދި މި މުއްދަތުގައި އެންމެ ބިޑު ހޭދައެއް ކޮށްފައި ވަނީ ރަށްރަށުގެ ބަދަރުތައް ހެދުމަށާއި މަރާމާތުކުރުމަށް ކަމަށްވެސް ފިނޭންސް މިނިސްޓްރީން އާންމުކޮށްފައި މައުލޫމާތުތަކުން ހާމަވާން އޮވެ އެވެ.
މިމަހުގެ 19 ވަނަ ދުވަހު ފިނޭންސް މިނިސްޓްރީން އާންމުކޮށްފައިވާ ތަފާސްހިސާބުތައް ދައްކާގޮތުން އޮކްޓޯބަރު 14 ވަނަ ދުވަހުގެ ނިޔަލަށް ޕީއެސްއައިޕީއަށް ސަރުކާރުން ހަރަދުކޮށްފައި ވަނީ 2.5 ބިލިއަން ރުފިޔާ އެވެ. މިދިޔަ އަހަރުގެ މި މުއްދަތުގައި ސަރުކާރުން ވަނީ ޕީއެސްއައިޕީއަށް 3.9 ބިލިއަން ރުފިޔާ ހަރަދުކޮށްފަ އެވެ.
މިއަހަރު ސަރުކާރުން ޕީއެސްއައިޕީއަށް ކުރި ހަރަދު މިދިޔަ އަހަރާ އަޅާބަލާއިރު 1.4 ބިލިއަން ރުފިޔާ މަދެވެ.
މިއަހަރުގެ މިހާތަނަށް ސަރުކާރުން އެންމެ ބޮޑު ހޭދައެއް ކޮށްފައިވަނީ ރަށްރަށުގެ ބަނދަރު ހެދުމާއި މަރާމާތު ކުރުމުގެ މަޝްރޫއުތަކަށެވެ. މިދިޔަ އަހަރު އެންމެ ބޮޑު ހޭދައެއް ކޮށްފައި ވަނީ ބިން ހިއްކުމުގެ މަޝްރޫއުތަކަށެވެ.
ބަނދަރުގެ އެކި މަޝްރޫއުތަކަށް މި އަހަރު ސަރުކާރުން ވަނީ 452.5 މިލިއަން ރުފިޔާ ހަރަދުކޮށްފަ އެވެ. މިދިޔަ އަހަރު މިފަދަ މަޝްރޫއުތަކަށް ހަރަދުކޮށްފައި ވަނީ 396.2 މިލިއަން ރުފިޔާ އެވެ.
މިދިޔަ އަހަރު ބިން ހިއްކުމަށް 753.3 މިލިއަން ރުފިޔާ ހަރަދުކުރި އިރު މިއަހަރުގެ މިހާތަނަށް ހަރަދުކޮށްފައި ވަނީ 100 މިލިއަން ރުފިޔާ އެވެ.
ފެނާއި ނަރުދަމާގެ މަޝްރޫއުތަކަށް ޕީއެސްއައިޕީ ބަޖެޓުން 444.6 މިލިއަން ރުފިޔާ ހަރަދުކޮށްފައިވާ އިރު، ސިއްހީ އަދި އިޖުތިމާއީ އެކި ކަންކަމަށް 440.3 މިލިއަން ރުފިޔާ ހަރަދުކޮށްފައި ވެއެވެ.
މި އަހަރުގެ ޕީއެސްއައިޕީ ބަޖެޓުން މަގު ހެދުމުގެ މަޝްރޫއުތަކަށް ހަރަދުކޮށްފައި ވަނީ 245.5 މިލިއަން ރުފިޔާ އެވެ.
މީގެ އިތުރުން މަސްވެރިކަމާ ދަނޑުވެރިކަން އަދި ތިމާވެށި ރައްކާތެރިކުރުމުގެ ތަފާތު މަޝްރޫއުތަކަށް ޕީއެސްއައިޕީ ބަޖެޓުން ހަރަދުކޮށްފައިވެ އެވެ.
މިއަހަރުގެ ބަޖެޓުގައި ޕީއެސްއައިޕީއަށް ކަނޑައަޅާފައި ވަނީ 8.4 ބިލިއަން ރުފިޔާ އެވެ.
އަހަރުގެ މިހާތަނަށް ސަރުކާރުން 22.9 ބިލިއަން ރުފިޔާ ހަރަދުކޮށްފައިވާ އިރު އާމްދަނީގެ ގޮތުގައި ސަރުކާރަށް ލިބިފައި ވަނީ 15.2 ބިލިއަން ރުފިޔާ އެވެ.
