އދ. ދަނގެތީގެ ފަޅު ގެޔެއްގެ ތެރޭ ހުރި ވަޅެއްގެ ތެރެއިން އަނިޔާވެރިކޮށް މަރާލާފައި އޮއްވާ ފެނުނު އެ ރަށުގެ ވިޔަފާރިވެރިޔާ މަހުމޫދު އަބޫބަކުރުގެ މައްސަލައިގައި ހައްޔަރުކޮށްފައިވާ ބިދޭސީ މީހާގެ އިތުރުން އެހެން މީހަކަށް ތުހުމަތެއް މިހާތަނަށް ނެތް ކަމަށް ފުލުހުން ބުނެފި އެވެ.
އެ ރަށުގައި އުމުރުން ދުވަސްވީ މީހަކު ބަލަން ހަވާލުވެގެން އުޅޭ ބަންގްލަދޭޝްއަށް ނިސްބަތްވާ ޝާ އޮލަމް މިއާ ހައްޔަރުކުރީ މަހުމޫދު މަރާލިތާ ދެވަނަ ދުވަހު އެވެ. އޭނާ ބަންދުގެ މުއްދަތު އިތުރުކުރަން އެ ރަށު މެޖިސްޓްރޭޓް ކޯޓަށް ގެންދިޔުމުން، 15 ދުވަސް ވަނީ ދީފަ އެވެ.
ފުލުހުން މިރޭ ނެރުނު ބަޔާނެއްގައި ބުނި ގޮތުގައި ޝާ އޮލަމް މިއާ ދަނގެތީގައި ދިރިއުޅެމުން ދިޔަ ގެ ބަލާ ފާސްކުރުމުގެ ތެރޭ މައްސަލައާ ގުޅުން ހުރި ކަމަށް ތުހުމަތު ކުރެވޭ ގިނަ އަދަދެއްގެ ތަކެތި ވަޅުލާފައިވަނިކޮށް ފެނިފައިވެ އެވެ. އޭގެ ތެރޭގައި މަހުމޫދުގެ ފޯނާއި އައިޑީކާޑުގެ އިތުރުން ވެސް ބައެއް ތަކެތި ހިމެނޭ ކަމަށެވެ.
މަހުމޫދު މަރާލުމުގައި ޝާ އޮލަމް މިއާގެ އިތުރުން އެހެން ބައެއްގެ ބައިވެރިވުން އޮތް ކަމަކަށް މިހާތަނަށް ތަހުގީގަށް ފާހަގަ ކުރެވިފައިނުވާ ކަމަށް ވެސް ފުލުހުން މިރޭ ބުންޏެވެ. ނަމަވެސް, މައްސަލާގެ ތަހުގީގު އަދިވެސް ސީރިއަސް މައްސަލައެއްގެ ގޮތުގައި ތަހުގީގު ކުރަމުންދާ ކަމަށް ފުލުހުންގެ ބަޔާނުގައިވެ އެވެ.
ތަހުގީގުގެ ތީރު ސާލިމަށް އަމާޒުވީ އަވައްޓެރިއެއްގެ ރިޕޯޓަކުން
މަހުމޫދު މަރާލުމަށް ފަހު ދަނގެތީގެ ފަޅުގެއްގެ ވަޅަކަށް އެއްލާލާފައި އޮއްވާ މަހުމޫދުގެ ހަށިގަނޑު ފެނުނީ އޭނާ ގެއްލިގެން ހޯދަމުން ދަނިކޮށެވެ.
ހަށިގަނޑު ފުރަތަމަ ފެނުނު މީހުން ބުނާ ގޮތުގައި, މަހުމޫދުގެ ފަޔާއި ބޮލުގައި ގޯނިތަކެއް އައްސާފައި ހުއްޓެވެ. އަދި ވަޅިއަކުން ހަމަލާދީ ވަރަށް އަނިޔާކޮށްފައި ވެސް ހުއްޓެވެ.
އެ ސަރަހައްދުގައި އެ ވަޅި އާއި ދަގަނޑު ބުރިއެއް ވެސް އޮތެވެ.
މަރުގެ ފަހަތުގައި ތިބީ އެ ރަށުގައި މަސްތުވާތަކެތީގެ މައްސަލަތަކެއްގައި ހިމެނޭ ބަޔަކު ކަމަށް ރައްޔިތުން ތުހުމަތުކޮށް އެމީހުން ފުލުހުންނާ ހަވާލުކޮށްފައިވަނިކޮށް މުޅި މައްސަލަ އެނބުރިގެން ދިޔައީ ޝާ އޮލަމް މިއާއާ ދިމާއަށެވެ.
ފުލުހުން އޭނާގެ މައްޗަށް ތުހުމަތު އަމާޒުކުތީ އަވައްޓެރިއެއްގެ ފަރާތުން ލިބުނު ރިޕޯޓަކާ ގުޅިގެންނެވެ.
އެ އަވައްޓެރިޔާ ބުނާ ގޮތުން، މަހުމޫދު އެންމެ ފަހުން ފެނުނު ރޭ ނެދުންގެ ތެރެއިން މީހެއްގެ ހަޅޭކުގެ އަޑު އިވުނެވެ.
އެ ވަގުތު އޭނާ ފާރުމަތިން ބޯދިއްކޮށްލިއިރު، އެ ގޭގައި އުޅޭ ބިދޭސީ ކޮންމެވެސް އެއްޗެއް ދަމާފައި ދިޔަހެން އޭނާއަށް ހީވީކަމަށް މި މަންޒަރު ފެނުނު މީހާއާ ހަވާލާދީ އެ ތަނުގައި ތިބި މީހުންގެ ފަރާތުން މައުލޫމާތު ލިބުނެވެ.
