އޭއެފްސީ ޕްރޯ ލައިސަންސް ކޯޗު މުހައްމަދު ޝިޔާޒް (މޯހަން)އާ އެކު ސުޕަ ޔުނައިޓެޑް ސްޕޯޓްސް (ސަސް) އިން ހަދާފައިވާ އެއްބަސްވުން އުވާލައިފި އެވެ.
ސަސް އާއި މޯހަން ވެސް ވަނީ ދެ ފަރާތް އެއްބަސްވެގެން ކޮންޓްރެކްޓް އުވާލާފައިވާކަން މި ނޫހަށް ކަށަވަރުކޮށްދީފަ އެެވެ.
ފުރަތަމަ ޑިވިޝަނުގައި ސަސް އަށް މިހާތަނަށް ކޯޗުކޮށްދިން ދެ ކޯޗުންގެ ކޮންޓްރެކްޓް ވެސް އުވާލީ އެވެ. ފުރަތަމަ ޑިވިޝަނުގައި ސަސް އަށް ފުރަތަމަ ކޯޗުކޮށްދިން އަހުމަދު ނާޝިދު (ނާދު)ގެ ކޮންޓްރެކްޓް އުވާލީ ހަ މެޗަށް ފަހު އެވެ. މޯހަން ތިން އަހަރުގެ ކޮންޓްރެކްޓެއްގައި ގެނައުމަށް ފަހު އެއްބަސްވުން އުވާލީ ނުވަ މަހަށް ފަހު އެވެ.
މޯހަން ކޮށްދީފައިވާ ހިދުމަތަށް ސަސް އިން ވަނީ ޝުކުރު އަދާކޮށްފަ އެވެ.
ސަސްގެ ކޯޗުކަމަށް ގެނައުމުގެ ކުރިން މޯހަން ހުރީ ކްލަބް އީގަލްސްއާ ހަވާލުވެ އެވެ. އީގަލްސް އިން މޯހަންއާ އެކު ހަދާފައިވާ ކޮންޓްރެކްޓް އުވާލީ ޖެނުއަރީ 16 ވަނަ ދުވަހު އެވެ. އޭގެ ތިން ދުވަސް ފަހުން އޭނާ ވަނީ ސަސް އަށް ބަދަލުވެފަ އެވެ.
ސަސް އަކީ ފުރަތަމަ ޑިވިޝަނުގައި މޯހަން ކޯޗުކޮށްދިން ފަސް ވަނަ ޓީމެވެ. މީގެ ކުރިން އޭނާ ވަނީ އީގަލްސްގެ އިތުރުން ނިއު ރޭޑިއަންޓާއި ވެލެންސިއާ، ދ. ކުޑަހުވަދޫ ފުޓްބޯޅަ ޓީމުގެ އިތުރުން މަހިބަދޫ ސްޕޯޓްސް ކްލަބަށް ފުރަތަމަ ޑިވިޝަނުގައި ކޯޗުކޮށްދީފަ އެވެ.
ދިވެހި ޕްރިމިއާ ލީގަށް ރިބްރޭންޑްކުރި ފަހުން މޯހަން ފެނުނީ އީގަލްސްގެ އިތުރުން ދ. ކުޑަހުވަދޫ ބެންޗުންނެވެ. ކުޑަހުވަދޫ ފުރަތަަމަ ޑިވިޝަނުގައި ވާދަކުރީ މޯހަންގެ ކޯޗުކަމުގައި މިނިވަން ޗެމްޕިއަންޝިޕް ކާމިޔާބު ކުރުމަށް ފަހު އެވެ. މޯހަން އަކީ ފުރަތަމަ ޑިވިޝަނުގައި ދެ ރަށެއް ގޮވައިގެން ރަނގަޅު ނަތީޖާތަކެއް ނެރުނު ކޯޗެކެވެ.
ގައުމީ ފުޓުބޯޅަ ޓީމުގެ އެސިސްޓެންޓް ކޯޗެއްގެ ގޮތުގައި ކޯޗިން ދާއިރާއަށް ވަން މޯހަން ވަނީ ފުޓުބޯޅަ އެސޯސިއޭޝަންގެ ޓެކްނިކަލް ޑިރެކްޓަރެއްގެ ގޮތުގައި ވެސް މަސައްކަތް ކޮށްފަ އެވެ. ކޯޗިންގައި މޯހަންގެ ކާމިޔާބީ އަށް ބަލާއިރު އޭނާ ވަނީ ނިއު ރޭޑިއަންޓާ ހަވާލުވެހުރިއިރު، އެ ޓީމަށް 2012 ވަނަ އަހަރުގެ ދިވެހި ލީގާއި ޕްރެޒިޑެންޓްސް ކަޕް ކާމިޔާބުކޮށްދީފަ އެވެ. އަދި އީގަލްސް ގޮވައިގެން ލީގަށް ވާދަކޮށް އެ ޓީމު އޭއެފްސީ ކަޕަށް ކޮލިފައި ކޮށްދިނެވެ.
ފުރަތަމަ ޑިވިޝަނުގައި މި ވަގުތު ކޯޗެއް ނެތި އޮތް ބޮޑު ޓީމަކީ މާޒިޔާ އެވެ. ސަސް އިން މޯހަންގެ ކޮންޓްރެކްޓް އުވާލިއިރު، އޭނާ މާޒިޔާއާ ގުޅެން އުޅޭ ކަމަށް ވަނީ އަޑުފެތުރިފަ އެވެ. އެނގިފައިވާ ގޮތުގައި ކުރިއަށް އޮތް ސީޒަނަށް އާ ކޯޗެއް ހަމަޖެއްސުމުގެ މަސައްކަތް މާޒިޔާ އިން އަންނަނީ ކުރަމުންނެވެ.
މާޒިޔާ އަށް މިދިޔަ ސީޒަންގެ ފަހު ކޮޅުގައި ކޯޗުކޮށްދިން ސާބިއާގެ ރިސްޓޯ ވިޑަކޮވިޗް ވަނީ އެ ޓީމާ އެކު ހަދާފައިވާ ކޮންޓްރެކްޓް ފުރިހަމަކޮށް އިންޑޮނީޝިއާގެ ކްލަބް ބޯނިއޯއާ ގުޅިފަ އެވެ. މިދިޔަ ދެ ސީޒަނުގައި ރާއްޖޭގެ ޗެމްޕިއަނުންނަކީ މާޒިޔާ އެވެ.
