ކ. ހިންމަފުށީ އައްސޭރި ޖަލުގައި ގާއިމްކޮށްފައިވާ ކުޑަކުދިންގެ ޖަލަކީ އެކި ކުށްތަކުގައި ބަންދުކޮށްފައިވާ ކުދިންނަށް ލިބެންޖެހޭ ރައްކާތެރިކަން ކަށަވަރު ކުރެވޭނެ ތަނެއް ނޫން ކަމަށް ހިއުމަން ރައިޓްސް ކޮމިޝަން (އެޗްއާރްސީއެމް) އިން ކަނޑައަޅައިފިއެވެ.
އެޗްއާރްސީއެމް އިން މިއަދު ނެރުނު ބަޔާނެއްގައި ބުނެފައިވާ ގޮތުގައި އެ ޖަލަކީ ކުޑަކުދިންގެ ގާނޫނުން އެކުދިންނަށް ލިބޭ ހައްގުތަކަށް އުނިކަން އަންނާނެ ތަނެއްކަން އެ ކޮމިޝަނުން ކުރި ތަހުގީގުން ވަނީ ފާހަގަކުރެވިފަ އެވެ. އަދި އެކަން ދެނެގަނެވުމާއި އެކު މިހާރު އެ ޖަލުތަކުގައި ތިބި ކުދިންގެ ހައްގުތައް ކަށަވަރުކުރުމަށްޓަކައި އެހެން ޖަލަކަށް ބަދަލުކުރުމަށް ކަރެކްޝަނަށް އަންގާފައިވާ ކަމަށް ކޮމިޝަނުން ބުނެ އެވެ.
މިދިޔަ އަހަރު ކޮމިޝަނުން ހިންމަފުށީ އައްސޭރި ޖަލަށް ކުރި ޒިޔާރާތުގެ ތެރެއިން އެ ޖަލުގައި ހަދާ ކުޑަކުދިން ބަންދުކުރާ އިމާރާތުގެ މަސައްކަތް ތިން މަސް ދުވަހުގެ ތެރޭގައި ނިމޭނެކަމަށް ކަރެކްޝަން އިން މައުލޫމާތު ދިން ނަމަވެސް މިހާތަނަށް އެ މަސައްކަތް ނިމިފައި ނުވާ ކަމަށް އެޗްއާރްސީއެމުން ބުނެ އެވެ. އެކަމާއި ކަންބޮޑުވުން ފާޅުކޮށް، މިއަދު ނެރުނު ބަޔާނުގައި، އެކޮމިޝަނަށް ލިބޭ ބާރުގެ ދަށުން ކުޑަކުދިން އެ ޖަލުގައި ބަންދުނުކުރަން ވަނީ އަންގާފަ އެވެ.
އެޗްއާރްސީއެމް އިން ބުނި ގޮތުގައި އެ ޖަލަކީ ގާނޫނުއަސާސީ އާއި ކުޑަކުދިންގެ ހައްގުތައް ރައްކާތެރިކުރުމުގެ ގާނޫނާއި ކުޑަކުދިންގެ އަދުލުގެ ގާނޫނާއި ކޮންވެންޝަން އޮން ދަ ރައިޓްސް އޮފް ދަ ޗައިލްޑް (ސީއާރްސީ) އާއި ޔުނައިޓެޑް ނޭޝަންސް ސްޓެންޑާޑް މިނިމަމް ރޫލްސް ފޯ ދަ އެޑްމިނިސްޓްރޭޝަން އޮފް ޖުވެނައިލް ޖަސްޓިސް އާއި ކުޑަކުދިންގެ އަދުލުގެ ނިޒާމުގައި ކުޑަކުދިންގެ ހައްގުތައް ގައި ބަޔާންކޮށްފައިވާ ހައްގުތަކާއި ރައްކާތެރިކަން އެކުދިންނަށް ލިބިދޭ ތަނެއް ނޫން ކަމަށެވެ.
އަދި އެތަނަކީ ދަ ނެލްސަން މަންޑޭލާ ރޫލްސް އަށް ރިއާޔަތްކުރާއިރު، މިނިވަންކަން ގެއްލޭގޮތަށް ބަންދުގައި މީހުން ބޭތިއްބުމަށް އެކަށީގެންވާ ތަނެއް ނޫންކަމަށް ތަހްގީގަށް ފާހަގަކުރެވިފައިވާ ކަމަށް ވެސް ބުނެފައިވެ އެވެ.
އެ ކޮމިޝަނުން ވަނީ އެ ޖަލުތަކުގައި ތިބި ކުދިން ރައްކާތެރި މާހައުލަކަށް ބަދަލުކުރުމަށް ކަރެކްޝަންސް އިން ކަނޑައަޅާ ޕްލޭން މިމަހުގެ 24 ވަނަ ދުވަހުގެ ކުރިން ހުށަހެޅުމަށް އެދިފަ އެވެ.
އެޗްއާރްސީއެމްގެ މެމްބަރު މުއުމިނާ ވަހީދު "އަދަދު" އަށް ވިދާޅުވި ގޮތުގައި މި މައްސަލައަކީ އާންމު ފަރުދެއް މިދިޔަ އަހަރު އޮކްޓޯބަރު ބަހުގެ ތެރޭގައި އެ ކޮމިޝަނަށް ހުށަހެޅި މައްސަލައެކެވެ. އެ މައްސަލަ ތަހުގީގު ކުރިއިރު، މިހާރު ކުޑަކުދިން ބަންދުކޮށްފައިވާ އިމާރާތް ބާވެ، އިމާރާތާއި ގުޅުންހުރި ގިނަ މައްސަލަތައް ފެނިފައިވާ ކަމަށް ވިދާޅުވި އެވެ.
