ކޮވިޑު ތެރޭގައި ދުނިޔޭގެ އިގުތިސޯދަށް އައި ލޮޅުމުގެ ތެރޭގައި ރާއްޖެއަށް ލިބުނު ފޮރިން ޑައިރެކްޓް އިންވެސްޓްމަންޓުތައް މަދުވެ 348 މިލިއަން ޑޮލަރަށް ވެއްޓިއްޖެ އެވެ.
ވޯލްޑް ބޭންކުން އާންމުކުރި ގައުމުތަކުގެ ދަރަނީގެ ތަފާސްހިސާބުތައް ދައްކާ ގޮތުގައި މިދިޔަ އަހަރު ރާއްޖެއަށް ލިބުނު ބޭރު އިންވެސްޓްމަންޓުތަކަކީ އޭގެ ކުރީ އަހަރަށް ވުރެ 607 މިލިއަން ޑޮލަރު މަދު އަދަދެކެވެ. އޭގެ ކުރީ އަހަރު ރާއްޖެއަށް ބޭރު އިންވެސްޓުމަންޓުގެ ފައިސާގެ ގޮތުގައި 956 މިލިއަން ޑޮލަރު ލިބުނެވެ.
ރާއްޖެއަށް ވަން ބޭރު އިންވެސްޓުމަންޓުތައް ދަށަށް ދިޔަ ސަބަބުތަކުގެ ތެރޭގައި ކޮވިޑު ބަލިމަޑުކަމާ ގުޅިގެން ގިނަ ރިސޯޓު އަދި ހޮޓެލް ޕްރޮޖެކްޓުތައް ފަސްކުރަން ޖެހުން ވޯލްޑް ބޭންކުން ފާހަގަކުރި އެވެ. މި ގައުމުގެ ބޭރު އިންވެސްޓުމަންޓުތަކުގެ ބޮޑު ހިއްސާއަކީ ޓޫރިޒަމް ސިނާއަތުގެ އިންވެސްޓްމަންޓުތަކެވެ.
މުޅި ދުނިޔެއަށް ބަލާލި ނަމަވެސް ކޮވިޑާ ގުޅިގެން އެންމެ ބޮޑަށް އަސަރުކުރި ސިނާއަތްތަކުގެ ތެރޭގައި ޓޫރިޒަމް ސިނާއަތް ހިމެނެ އެވެ.
ވޯލްޑް ބޭންކުން ބުނި ގޮތުގައި މުޅި ދުނިޔެއަށް ބަލާލި ނަމަވެސް ފޮރިން ޑައިރެކްޓް އިންވެސްޓްމަންޓުތަށް ވަނީ ދަށަށް ގޮސްފަ އެވެ. އަދި މަދު ގައުމުތަކެއް ފިޔަވައި، އެހެން ހުރިހާ ގައުމަކަށް ލިބުނު ބޭރު އިންވެސްޓުމަންޓުތައް މަދެވެ.
އެކަމަކު ރާއްޖެ ނިސްބަތްވާ ދެކުނު އޭޝިއާއަކީ އޭގެ ކުރީ އަހަރަށް ވުރެ މިދިޔަ އަހަރު އިންވެސްޓުމަންޓުތައް ގިނަވީ ދެ ސަރަހައްދުގެ ތެރެއިން އެއް ސަރަހައްދެވެ. ސަބަބަކަށްވީ އިންޑިއާއަށް އެތެރެވީ ބޭރު އިންވެސްޓުމަންޓުތައް އިތުރުވުމެވެ. ސަރަހައްދީ އެހެން ހުރިހާ ގައުމަކަށް ލިބުނު އިންވެސްޓުމަންޓުތައް މަދެވެ.
