ކ. ކާށިދޫ ކައިރިން ދަތުރުކުރަމުންދިޔަ ބޯޓަކުން މީހަކު ކަނޑަށް ވެއްޓި ގެއްލިގެން ހޯދަން ފަށައިފި އެވެ.
ފުލުހުން ބުނީ ގެއްލިގެން ހޯދަމުން ދަނީ 22 އަހަރުގެ ފިރިހެނެއް ކަމަށެވެ. އަދި އެ މީހާ ދަތުރުކުރަމުން ދިޔައީ ބ. އަތޮޅަށް ދަތުރުކުރަމުންދިޔަ ބޯޓަކުންކަމަށް ވެސް ފުލުހުން ބުނެ އެވެ.
އެމީހާ ގެއްލުނުއިރު ބޯޓު ދަތުރުކުރަމުންދިޔައީ ކާށިދޫއާ ހަ ނޯޓިކަލް މޭލު ބޭރުން ކާށިދޫ ކަނޑުން ބ. އަތޮޅާ ދިމާލަށެވެ.
އެމީހާ އެންމެ ފަހުން ފެނުނީ ކަޅު ކުލައިގެ ޓީޝާޓަކާއި ޓްރެކްސޫޓެއް ލައިގެން ހުއްޓާކަމަށް ކޯސްޓްގާޑުން ބުނެ އެވެ.
އެމީހާ ހޯދުމުގެ މަސައްކަތް މިހާރު ކޯސްޓްގާޑުން ވަނީ ފަށައިފަ އެވެ.
ކާށިދޫ ކަނޑަކީ ރާއްޖޭގައި ވެސް އެންމެ ގަދަ އަދި ބޮޑު އެއް ކަނޑެވެ. އަދި މޫސުން ގޯސްވެފައިވާ މިދަނޑިވަޅުގައި ކަމާބެހޭ ފަރާތްތަކުން ދަނީ ކެނޑިނޭޅި ކަނޑުދަތުރުފަހަރު ނުކުރުމަށް އިލްތިމާސް ކުރަމުންނެވެ.
އެހެންނަމަވެސް މިހާލަތުގައި ބައެއް ފަރާތްތަކުން ދަތުރުކުރަމުންދާތީ، ކަނޑުމަތިން ކުރިމަތިވާ އެކި ކަހަލަ ހާދިސާތައް ދަނީ އިތުރު ވަމުންނެވެ. އެގޮތުން މިއަދު ވެސް މާލެ ކައިރިން ބޯވަ ނަގަން ނިކުމެ އުޅުނު މީހަކު ކަނޑަށް ދަމައިގަނެގެން އޮޔާ ދަނިކޮށް ވަނީ ސަލާމަތްކޮށްފަ އެވެ.
އަދި މިދިޔަ ހޮނިހިރު ދުވަހުގެ ހަވީރުގެ ވަގުތެއްގައި މާލެއިން ފުރައިގެން ވ. އަތޮޅަށް ދަތުރުކުރި ލޯންޗަކަށް ރާޅެއް ޖަހައި، އެ ބޯޓުގައި ދަތުރުކުރި އަންހެނެއް ވަނީ މަރުވެފަ އެވެ. އެ ހާދިސާގައި އެ އަންހެން މީހާގެ ދަރިފުޅު ގެއްލިފައިވާއިރު، އަދި ވެސް އެ ކުއްޖާ ފެނިފައެއް ނުވެ އެވެ.
