ނޫސްވެރިކަމުގެ އެވޯޑް ލިބޭ ފަރާތްތަކަށް، އެވޯޑް ދޭން މިރޭ ބާއްވާ ޖަލްސާ ހުއްޓުވުމުގެ ވަގުތީ އަމުރެއް ނެރެދިނުމަށް އެދި 20 ނޫސްވެރިން ފަރާތުން ސިވިލް ކޯޓަށް ހުށަހަޅާފައިވާ މައްސަލަ ހުށަހެޅިފައިވާ ސެކްޝަންގައި ކުރިއަށް ނުގެންދެވޭނެ ކަމަށް މޯލްޑިވްސް މީޑިއާ ކައުންސިލް (އެމްއެމްސީ) އިން ބުނެފި އެވެ.
މިއަދު ހެނދުނު ސިވިލް ކޯޓުގައި ބޭއްވި އަޑުއެހުމުގައި މީޑިއާ ކައުންސިލް ތަމްސީލު ކުރާ، އެ ކައުންސިލްގެ ލީގަލް ކޮމިޓީގެ ޗެއާ، އިބްރާއިމް ފައުޒީ ވިދާޅުވީ 20 ނޫސްވެރިން އިސްވެ، އެ މައްސަލަ ހުށަހަޅާފައި ވަނީ ސިވިލް ކޯޓުގެ ނުބައި ސެކްޝަނަކަށް ކަމަށެވެ. އަދި އެ ސެކްޝަނުގައި އެ މައްސަލަ ކުރިއަށް ގެންދެވޭނެ އެއްވެސް ހަމައެއް ގާނޫނުގައި ނެތްކަން އޭނާ ފާހަގަކުރެއްވި އެވެ.
ފައުޒީ ރިޔާއަތް ކުރެއްވީ ސުޕްރިމް ކޯޓުން 2015 ވަނަ އަހަރު ނެރިފައިވާ ސާކިއުލާއަކަށެވެ. އޭގައި ވަނީ ސިވިލް ކޯޓުގެ ހިންގުން ހަރުދަނާ ކުރުމަށްޓަކައި ފަަސް ޑިވިޝަނެއް ކަނޑައަޅާފައިވާ ކަމަށެވެ. އެގޮތުން އެ ޑިވިޝަންތަކުގެ ތެރެއިން މި މައްސަލަ ބެލޭނީ އިދާރީ މައްސަލަތައް ބަލާ ޑިވިޝަނުން ކަމަށް ފައުޒީ ގަބޫލުކުރެ އެވެ.
މައްސަލަ ހުށަހެޅިފައި އޮތީ މުދަލާއި ފައިސާއާ ބެހޭ ކުދި މައްސަލަތަކާ އަވަސް ނިޔާގެ މައްސަލަތައް ހުށަހަޅާ ސެކްޝަނަށެވެ.
މިއަދުގެ އަޑުއެހުމުގައި ގާޒީ ވެސް ސުވާލު އުފެއްދި އެއް ކަމަކީ އެއީ އެވެ.
އިއްޔެ ހުށަހެޅި މި މައްސަލާގައި އެމްއެމްސީއާ ދެކޮޅަށް ދައުވާ ކުރި 20 ނޫސްވެރިން ތަމްސީލު ކުރެއްވީ ވަކީލް މަރިޔަމް ޝުނާނާ އެވެ.
ގާޒީ ސުވާލު އުފެއްދެވި ކަންކަން ސާފުކޮށްދެއްވަމުން ޝުނާނާ ވިދާޅުވީ އެ މައްސަލަ ކުރިއަށް ގެންދެވޭނެ އެހެން ސެކްޝަނެއް ސިވިލް ކޯޓުގައި ނެތް ކަމަށެވެ. އަދި އަވަސް ނިޔާގެ މައްސަލަތައް ހުށަހަޅާ ސެކްޝަނަށް އެ މައްސަލަ ހުށަހެޅީ މިރޭ ނޫސްވެރިންނަށް އިނާމް ދޭ ޖަލްސާ ބާއްވަން ތާވަލްކޮށްފައިވާތީ، އުސޫލުގެ ބޭރުން އެވޯޑް ދީފައިވާ ކަމަށް ބުނާ މައްސަލަ ބެލުމަށްޓަކައި އެ ޖަލްސާ ފަސްކޮށްދިނުމުގެ އަމުރެއް ނެރެދިނުމަށް ކަމަށެވެ.
އެގޮތުން މިއަހަރު ތެރޭގައި ވަގުތީ އަމުރެއް ނެރެދިނުމަށް އެދި އެ ސެކްޝަނަށް ހުށަހަޅާފައިވާ ތިން މައްސަލަކަށް ޝުނާނާ ހަވާލާދެއްވި އެވެ. އަދި އިދާރީ މައްސަލަތައް ބަލާ ޑިވިޝަނަށް އެ މައްސަލަ ހުށަނޭޅުއްވީ މައްސަލައިގެ މުއާލާތް ކެނޑުމުގެ ކުރިން ގޮތެއް ކަނޑައަޅާ ދިނުމަށް އެދުމަށް ކަމަށް ވިދާޅުވި އެވެ.
ޝުނާނާ ފާހަގަކުރެއްވި ގޮތުގައި މިރޭ އިނާމު ދިނުމުގެ ޖަލްސާ ބާއްވައިފިނަމަ, އެތައް ނޫސްވެރިއެއްގެ ހައްގު ގެއްލިގެން ދާނެ އެވެ. އެހެންނަމަވެސް, އެމްއެމްސީން ބުނީ އެ ހަފްލާ ކުރިއަށް ގެންދަން ގިނަ ހަރަދުތަކެއް ކޮށްފައިވާ ކަމަށާއި، ސަރުކާރުގެ އިސްވެރިންގެ އިތުރުން ރައީސް އިބްރާހިމް މުހައްމަދު ސޯލިހަށް ވެސް ދައުވަތު އަރުވާފައިވާ ކަމަށެވެ. އަދި މިރޭ ޖަލްސާ ނުބޭއްވި ލަސްވެއްޖެނަމަ އިއާދަނުކުރެވޭ ބޮޑު ގެއްލުމެއް ދައުލަތަށް ލިބިގެން ދާނެ ކަމަށެވެ.
ދެ ފަރާތުގެ ވާހަކަތައް އަޑުއެއްސެވުމަށްފަހު ގާޒީ ވިދާޅުވީ މި މައްސަލަ ދިރާސާ ކުރުމަށްފަހު ވީ އެންމެ އަވަހަކަށް ގޮތެއް ނިންމާނެ ކަމަށެވެ. އަދި ފާހަގަކޮށްފައިވާ އިޖުރާއީ ކަންކަމަށް ބެލުމަށްފަހު ވަގުތީ އަމުރެއް ނެރުމުގައި ގޮތެއް ނިންމުން އޮންނާނީ މިއަދު މެންދުރު 1:30 އާއި 2:00 ދެމެދުގައި ކަމަށް ވިދާޅުވި އެވެ.
