ގަންނާނެ ބަޔަކު ނުވެގެން މިދިޔަ އަހަރު އަގުތައް ވެއްޓިގެން ދިޔަ ތެލަށް ޑިމާންޑު އިތުރުވެ، ދުނިޔޭގެ ބާޒާރުގައި ވިއްކާ ތެލުގެ އަގުތައް އުފުލެން ފަށައިފި އެވެ.
ވޭތުވެ ދިޔަ ދެ މަހުގެ ތެރޭގައި އެކަނިވެސް ސާފުނުކުރާ ތެޔޮ ފީފާއެއް ވިއްކާ އަގު ވަނީ 20 ޕަސެންޓު އުފުލިފަ އެވެ. އަދި ޖެނުއަރީން ފެށިގެން މިއަދާ ހަމައަށް ބަލާއިރު، ތެޔޮ ފީފާއެއްގެ އަގު ހުރީ 58 ޕަސެންޓު އުފުލިފަ އެވެ.
މިހާރު ތެޔޮ ފީފާއެއްގެ އަގު ހުރީ 80 ޑޮލަރުގަ އެވެ. މިއީ ވޭތުވެދިޔަ ހަތް އަހަރު ދުވަހުގެ ތެރޭގައި ނުދާހާ މައްޗަށް ގޮސްފަ އެވެ.
ޑިމާންޑު އުފުލުނަސް ސަޕްލައި ހިފެހެއްޓިފައި
ތެލަށް އޮތް ޑިމާންޑު އުފުލެމުން ދާ މައިގަނޑު ސަބަބަކީ ކޮވިޑުގެ ހާލަތުން އަރައިގަންނަމުންދާ ގައުމުތަކުގެ އިގުތިސޯދުތައް އަލުން ހިނގައިގަތުމެވެ. މީގެ ސަބަބުން ތެލާއި ގޭސް އަދި ހަކަތަ އުފައްދަން ބޭނުންކުރާ އެހެން ބާވަތްތަކަށް އޮތް ޑިމާންޑު ވަނީ މުޅި ދުނިޔޭގައި ވެސް އިތުރުވެފަ އެވެ.
ހާއްސަކޮށް ޔޫރަޕުގެ ގައުމުތަކަށް ބޭނުންވާ ވަރަށް ހަކަތަ ނުލިބިގެން މި ވަގުތު އެ ގައުމުތައް އޮތީ "އެނާޖީ ކްރައިސިސް" އެއްގެ ތެރޭގަ އެވެ. މިއީ ޔޫރަޕުގެ ގައުމުތަކުން އިޔާދަކުރަނިވި ހަކަތައަށް ބަރޯސާވާ މިންވަރު އިތުރުކުރި ނަމަވެސް، ޑިމާންޑާ އެއްވަރަށް މި ބާވަތްތަކުގެ ހަކަތަ އުފައްދަން ދިމާވެފައިވާ ހުރަސްތަކުގެ ސަބަބުން ދިމާވި މައްސަލައެކެވެ.
އެގޮތުން އިނގިރޭސިވިލާތުގައި ބޭނުންކުރާ ހަކަތައިގެ 25 ޕަސެންޓު ވައިން އުފެއްދި ނަމަވެސް، ވައި ޖެހޭ މިންވަރު މަދުވުމުގެ ސަބަބުން ވައިން އުފައްދާ ހަކަތައިގެ މިންވަރު ވަނީ އަށް ޕަސެންޓު ދަށަށް ގޮސްފަ އެވެ. އަދި ޔޫރަޕުގެ ދެބައިކުޅަ އެއްބަޔަށް ގޭސް ފޯރުކޮށްދޭ ރަޝިއާ އާއި ނޯވޭއިން އެ ގައުމުތަކަށް ގޭސް ބޭނުންވާ މިންވަރަށް އެކްސްޕޯޓް ނުކުރެވުމުގެ މައްސަލަ ބޮޑެވެ.
ކުރިޔަށް މިއޮތް ފިނި މޫސުމަކީ ޔޫރަޕުގެ ހަކަތައަށް އޮތް ޑިމާންޑު އެންމެ އުފުލޭނެ ދުވަސްވަރެވެ. އަދި މީގެ ސަބަބުން ކަރަންޓަށް ކުރާ ހޭދަ އިތުރުވާނެ ކަމަށް މާހިރުން ލަފާކުރެ އެވެ.
ޑިމާންޑު އުފުލެމުން ދިޔަ ނަމަވެސް، ތެޔޮ އުފައްދާ ގައުމުތަކުގެ ޖަމިއްޔާ އޯޕެކުން ވަނީ ތެލުގެ ސަޕްލައި އިތުރު ނުކުރުމަށް ނިންމާފަ އެވެ. ދުނިޔޭގެ ބާޒާރުގައި ތެލުގެ އަގުތައް ކަނޑައެޅުމުގެ އެންމެ ނުފޫޒުގަދަ މި ޖަމިއްޔާއިން ވަނީ އަގުތައް އުފުލުނު ނަމަވެސް ތެޔޮ އުފައްދާ މިންވަރު އިތުރު ނުކުރަން ނިންމާފަ އެވެ.
ދުވަހުންދުވަހަށް ބާޒާރުގައި ސާފުނުކުރާ ތެޔޮ ފީފާގެ އަގުތައް އުފުލުމުގެ ފަހަތުގައި އެންމެ ބޮޑު ރޯލެއް އަދާކުރަނީ އޯޕެކުގެ ނިންމުމުގެ ސަބަބުން ސަޕްލަޔިއަށް އައިސްފައިވާ ތާށި ކަމެވެ.
ތަޖުރިބާކާރުން ލަފާކުރަނީ ތެޔޮ ފީފާއެއްގެ އަގު ދާދި އަވަހަށް 100 ޑޮލަރަށް އުފުލިގެން ދާނެ ކަމަށެވެ. އެންމެ ފަހުން ފީފާއެއް މި އަގަށް ވިއްކީ އޮގަސްޓު، 2014 ގައެވެ.
ތެލުގެ އަގު އުފުލުން ރާއްޖެއަށް ނުރައްކާ
ރާއްޖޭގައި ބޭނުންކުރާ ހަކަތައިގެ 96 ޕަސެންޓު އުފައްދަނީ ތެލުންނެވެ. އެހެންކަމުން ތެލުގެ އަގުތައް އުފުލުމަކީ އޭގެ ސަބަބުން ސީދާ ގޮތުން ރާއްޖޭގެ އިގުތިސޯދަށް ނޭދެވޭ އަސަރު ކުރާނެ ކަމެކެވެ.
އެސްޓީއޯއިން ވަނީ މި އަހަރުގެ ތެރޭގައި ވެސް ދުނިިޔޭގެ ބާޒާރުގައި ތެލުގެ އަގުތައް އުފުލެމުން ދާތީ އެ ކުންފުނިން ވިއްކާ ޕެޓްރޯލާއި ޑީސަލުގެ އަގު ބޮޑުކޮށްފަ އެވެ.
