ރާއްޖޭގެ އިގުތިސޯދު މަޑުމަޑުން ކުރިއަރަމުންދާ ކަމަށާއި ކޮވިޑުގެ ކުރިން އިގުތިސޯދު ހުރި ވަރަށް އިޔާދަ ވާނީ 2023 ވަނަ އަހަރު ކަމަށް ވޯލްޑް ބޭންކުން ބުނެފި އެވެ.
ވޯލްޑް ބޭންކުން އެންމެ ފަހުން އާންމު ކުރި ސަރަހައްދީ އިގްތިސޯދީ އަޕްޑޭޓް ރިޕޯޓުގައިވާ ގޮތުން ރާއްޖޭގެ އިގްތިސާދު އަނބުރާ އިޔާދަވުން އަދި އޮތީ ނާޒުކު ފައްތަރެއްގައެވެ.
ރާއްޖޭގެ އިގުތިސޯދީ ކުރިއެރުން އެއްވަރެއްގައި ހިފެހެއްޓިފައެއް ނުވެ އެވެ.
އެގޮތުން، ކޮވިޑުގެ ބަލިމަޑުކަމުގެ ކުރިން ރާއްޖޭގެ އިގްތިސޯދު އޮތް މިންވަރަށް ވާސިލްވުމަށް އަދި ދިގު ދަތުރެއް ކުރަންޖެހެ އެވެ.
ނަމަވެސް، ރާއްޖޭގެ ފަތުރުވެރިކަން ކުރިއަރަމުންދިއުމާއި، ކޮވިޑުން ރައްކާތެރިވުމަށް ވަކިވަކި ދާއިރާތަކަށް އަމާޒުކޮށްގެން އެޅި ފިޔަވަޅުތަކުގެ ސަބަބުން ރާއްޖޭގެ އިގުތިސޯދު ކުރިން އޮތްވަރަށް އިޔާދަވުމުގެ ފުރުސަތު ބޮޑުކަމަށް ވާލްޑް ބޭންކުން ފާހަގަކުރެ އެވެ.
މާލިއްޔަތު ބެލެހެއްޓުން ހަރުދަނާކޮށް ދަރަނީގެ ގޮންޖެހުންތައް ކުޑަކުރަން ޖެހޭ
ވާލްޑް ބޭންކުން އަންދާޒާކުރާ ގޮތުގައި މި އަހަރު ރާއްޖޭގެ އިގުތިސޯދު 22.3 ޕަސަންޓު ކުރި އަރާނެ އެވެ.
އެގޮތުން، މިއަހަރު ރާއްޖެއަށް 1.1 މިލިއަން ފަތުރުވެރިން އައިސްފި ނަމަ އެ އަދަދަށް ވާސިލުވާން ވަރަށް ފަސޭހަ ވާނެ ކަމަށް ބޭންކުން ބުނެ އެވެ.
ރިޕޯޓުގައި ވަނީ އަންނަ އަހަރު ރާއްޖޭގެ އިގުތިސޯދު 11 ޕަސަންޓު ކުރިއަރާނެ ކަމަށް ލަފާކޮށްފަ އެވެ.
ދުނިޔޭގެ އެކި ކަންކޮޅުތަކުގައި މީހުން ދަތުރުކުރުން މިހާރު ވަނީ އާންމު ހާލަތަކަށް ރުޖޫއަވާން ފަށައިފަ އެވެ.
ދަތުރުފަތުރުކުރުން ފަސޭހަވާ ވަރަކަށް ރާއްޖެ އަންނަ ފަތުރުވެރިންގެ އަދަދު އެއްވަރެއްގައި ކުރިއަރައިގެންދާނެ އެވެ.
އެހެންވެއްޖެ ނަމަ 2023 ގައި ކޮވިޑުގެ ކުރިން ރާއްޖޭގެ އިގުތިސޯދު ހުރި މިންވަރަށް އިޔާދަވާނެ ކަމަށް ބެލެވޭ ކަމަށް ވޯލްޑް ބޭންކުން ބުނެ އެވެ.
ވާލްޑް ބޭންކުން ރާއްޖެ އާއި ސްރީ ލަންކާ އަދި ނޭޕާލް އަށް ކަނޑައަޅާފައި ހުންނަވާ ކަންޓްރީ ޑިރެކްޓަރު ފާރިސް އެޗް ހަދާދު-ޒާވޮސް ވަނީ އިގުތިސާދު އަލުން ކޮޅަށް ޖަހާ އިރު، މާލިއްޔަތު ބެލެހެއްޓުން ހަރުދަނާކޮށް ދަރަނީގެ ގޮންޖެހުންތައް ކުޑަކުރަން ޖެހޭ ކަމަށް ވިދާޅުވެފަ އެވެ.
އޭގެ އިތުރުން އިންސާނީ ވަސީލަތްތައް ތަރައްގީކުރުމަށް އިސްކަންދޭން ޖެހޭކަމަށް ވެސް އޭނާ ވަނީ ވިދާޅުވެފަ އެވެ.
"މީގެ ކުރިން ކުރިމަތި ނުވާ ވަރުގެ މި ބޮޑު އިގްތިސާދީ ކާރިސާ އިން އަރައިގަންނައިރު ކުރިއަށް ވުރެ ރަނގަޅަށް އަދި ކާރިސާތަކަށް ކުރިއަށް ވުރެ ބޮޑަށް ތައްޔާރުވެފައިވާކަން ކަށަވަރުކުރުމަށްޓަކައި މާލިއްޔަތު ބެލެހެއްޓުން ހަރުދަނާކުރުމުގެ ތެރެއިން ދަރަނީގެ ގޮންޖެހުންތައް ކުޑަކުރުމަށާއި އިގްތިސޯދު ފުޅާކުރުމަށާއި އަދި އިންސާނީ ވަސީލަތްތައް ތަރައްގީކުރުމަށް އިސްކަންދޭން ޖެހޭ،" ފާރިސް ވިދާޅުވި އެވެ.
އުފެއްދުންތެރިކަން އިތުރުކޮށް ހިދުމަތްތައް އެކްސްޕޯޓުކޮށްގެން ކުރި ހޯދުމުގެ ފުރުސަތު އެބައޮތް
ވާލްޑް ބޭންކުން ފާހަގަކުރާ ގޮތުގައި، ހުނަރު ތަރައްގީކުރަން އިންވެސްޓުކުރުމުން ހިދުމަތްތަކަށް ބިނާވެފައިވާ އިގްތިސޯދީ ކުރިއެރުމަށް ފުރުސަތު އޮންނާނެ އެވެ.
ވާލްޑް ބޭންކުން ދެކުނު އޭޝިއާއަށް ކަނޑައަޅާފައި ހުންނަވާ ޗީފް އިކޮނޮމިސްޓް ހޭންސް ޓިމާ ވަނީ ދެކުނު އޭޝިއާގެ ގައުމުތަކުން ތަކެތި އުފެއްދުމާ ގުޅުންހުރި ސިނާއަތްތަކަށް ވަންނަން ގޮންޖެހުންތައް ހުރިކަން ފާހަގަކުރައްވައިފަ އެވެ.
މި ގައުމުތަކުން ތަކެތި އުފައްދާ އެކްސްޕޯޓްކުރުމުގެ މަސައްކަތް ކާމިޔާބުކަމާއެކު ކޮށްފި ނަމަ އެހެން ސަރަހައްދުތަކުގެ ގައުމުތަކަށް ވުރެ ކުރިހޯދުމުގެ ފުރުސަތު ބޮޑުކަމަށް އޭނާ ވިދާޅުވި އެވެ.
"ހާއްސަކޮށް ފަތުރުވެރިކަމާއި ވިޔަފާރި ހިންގުމާ ގުޅުންހުރި ހިދުމަތްތައް އެކްސްޕޯޓުކޮށްގެން، އެހެން ސަރަހައްދުތަކުގެ ގައުމުތަކަށް ވުރެ މި ދާއިރާގައި ކުރި ހޯދުމުގެ ފުރުސަތު ބޮޑު،" ޓިމާ ވިދާޅުވި އެވެ.
މީގެ އިތުރުން ހިދުމަތްތަކުގެ މައްޗަށް ބިނާވެފައިވާ އިގްތިސޯދީ ކުރިއެރުމުގެ ފައިދާ އެންމެ އެކަށޭނެ ގޮތުގައި ނެގުމަށް، ގައުމުތަކުގެ ގާނޫނީ އޮނިގަނޑު މުރާޖައާކުރަން ޖެހޭކަމަށްވެެސް ވިދާޅުވި އެވެ.
އަދި އުފެއްދުންތެރި ހިޔާލުތަކާއި ވާދަވެރިކަން ކުރިއަރުވާނެ މުއައްސަސާތައް ގާއިމުކުރަން ޖެހޭކަމަށް ޓީމާ ވަނީ ވިދާޅުވެފަ އެވެ.
ވާލްޑް ބޭންކުގެ ރިޕޯޓުގައިވާ ގޮތުން މި އަހަރު ރާއްޖޭގެ ފަގީރުންގެ ނިސްބަތް ވަނީ 9.1 ޕަސަންޓަށް ދަށަށް ގޮސްފަ އެވެ.
ބޭންކުން ވަނީ އަންނަ އަހަރު އެ ނިސްބަތް 4.3 ޕަސަންޓަށް ވެއްޓޭނެ ކަމަށް ލަފާކޮށްފަ އެވެ.
