އިގުތިސޯދުގެ މުސްތަގުބަލު އޮތީ ރާއްޖޭން ބޭރުގައި ވިޔަފާރިކޮށްގެން ކަމަށް ވިދާޅުވެ ރާއްޖެއިން ބޭރަށް ވިޔަފާރި ފުޅާކުރަން ސަރުކާރު ކުންފުނިތަކަށާއި ބޮޑެތި އަމިއްލި ކުންފުނިތަކަށް އިކޮނޮމިކް މިނިސްޓަރު ފައްޔާޒު އިސްމާއިލް ގޮވާލައްވައިފި އެވެ.
ސެޓެލްކޯގެ "ސްޓެވޯ" ވާކްޝޮޕް އިފްތިތާހުކުރަން ރޭ ބޭއްވި ހަފުލާގައި ވާހަކަ ދައްކަވަމުން ފައްޔާޒު ވިދާޅުވީ ބޭރުގެ ގައުމުތަކުން ދިވެހި ކުންފުނިތަކަށް ރަނގަޅު ނަފާ ލިބޭނެ ކަންކަން އެބަހުރި ކަމަށެވެ. އަދި ރާއްޖޭން ބޭރަށް ވިޔަފާރި ފުޅާކުރަން ބޮޑެތި ވިޔަފާރިތަކުގެ ވިސްނަން ޖެހޭ ކަމަށް އޭނާ ވިދާޅުވި އެވެ.
"މިފުރުސަތުގައި ދިވެހިރާއްޖޭގެ ހާއްސަކޮށް ސަރުކާރުގެ ބޮޑެތި ކުންފުނިތަކާއި ޕްރައިވެޓް ސެކްޓާގެ ބޮޑެތި ކުންފުނިތައް ދިވެހިރާއްޖޭގެ ޓެރިޓަރީން ބޭރަށް ވިސްނުން ބައްޓަން ކުރުމަށް އަޅުގަނޑު އެދެން،" ފައްޔާޒު ވިދާޅުވި އެވެ.
ފައްޔާޒު އިތުރަށް ވިދާޅުވީ އިގުތިސޯދުގެ މުސްތަގުބަލު އޮތީ ރާއްޖޭން ބޭރުގައި ވިޔަފާރި ކޮށްގެން އޭގެ ނަފާ އިގުތިސޯދަށް ވައްދައިގެން ކަމަށެވެ.
އަދި މިއީ ޓޫރިޒަމަށް ބިނާވެފައި އޮތް އިގުތިސޯދު ބަދަލުކުރަން މުހިންމު ކަމަކަށް ވާތީ، އެގޮތަށް ވިޔަފާރިތަކުގެ ވިސްނުން ބައްޓަން ކުރުމަށް އޭނާ އެދިވަޑައިގެންނެވި އެވެ.
ބޭރުގައި ދިވެހި ކުންފުނިތަކުން ވިޔަފާރި ކުރޭތަ؟
މިހާރު ވެސް ދިވެހި ބައެއް ކުންފުނިތަކުން ބޭރު ގައުމުތަކުގައި ވިޔަފާރިތައް ރަޖިސްޓްރީކޮށްގެން ހިންގަ އެވެ.
މިސާލަކަށް ސަރުކާރު ކުންފުނިތަކުގެ ތެރެއިން އެސްޓީއޯ އާއި ޕްރައިވެޓް ވިޔަފާރިތަކުގެ ތެރެއިން ޓޫރިޒަމާއި މަސް އެކްސްޕޯޓާއި ލޮޖިސްޓިކްސް ސިނާއަތުގެ ވިޔަފާރިތަކުން އެކި ގައުމުތަކުގައި އޮފީސް ހިންގަ އެވެ. އެކަމަކު އެއީ އެ ވިޔަފާރިތަކުން ރާއްޖޭގައި ކުރާ ވިޔަފާރީގެ ބޭނުންތަކަށް ފަހިކުރުމުގެ ބޭނުމުގައި ހިންގާ ތަންތަނެވެ.
ރާއްޖޭގެ ކުންފުނިތަކުން ބޭރުގައި ވިޔަފާރި ނުކުރި ނަމަވެސް، މިގޮތަށް ވިޔަފާރި ފުޅާކުރަން ބައެއް ކުންފުނިތަކުން މަސައްކަތްކޮށްފައި ވެ އެވެ.
އެގޮތުން ބީއެމްއެލްއިން ރާއްޖެއިން ބޭރުގައި އެ ބޭންކުގެ ބްރާންޗެއް ހުޅުވާނެ ކަން އިއުލާނުކުރި އެވެ. އަދި އެމްޓީސީސީން އެ ކުންފުނީގެ މަހާޖައްރާފުގެ ހިދުމަތްތައް ރާއްޖެއިން ބޭރަށް ފުޅާކުރުމުގެ ވާހަކަތަކެއް ވެސް ދެއްކި އެވެ.
ނަމަވެސް، މިހާތަނަށް އެ ވިސްނުންތަކަށް އަމަލީ ސިފައެއް އައިސްފައި ނުވެ އެވެ.
