ހަކަތަ އުފައްދާ ސިސްޓަމްތައް ފަރުމާކުރުމާއި ކަރަންޓު ޖެނަރޭޓަރުތަކާ ގުޅޭ މަސައްކަތްތަކާއި ހިދުމަތްތައް ފޯރުކޮށްދޭ ވާކްޝޮޕެއް ސްޓެލްކޯއިން މިއަދު ހުޅުވައިފި އެވެ.
ސްޓެވޯގެ ނަމުގައި ސްޓެލްކޯއިން ހުޅުވި މި ވާކްޝޮޕަކީ ޕަވާ ޖެނަރޭޝަން ހިދުމަތްތަކުން ފެށިގެން ގޮސް ޕަވާ ސިސްޓަމް ޑިޒައިނިން އެންޑް ކޮމިޝަނިން އަދި ޖެނަރޭޓަރު އެސެމްބްލީ އާއި ސާވިސިން އާ ގުޅޭ ހުރިހާ ހިދުމަތެއް އެއް ފުރާޅެއްގެ ދަށުން ލިބޭ ތަނެކެވެ.
މި މަސައްކަތްތަކަކީ ޔުޓިލިޓީ ކުންފުންޏަކަށް ވެފައި އެ ކުންފުނިން ހިންގާ ޕްރޮޖެކްޓުތަކާއި ފޯރުކޮށްދޭ ހިދުމަތްތަކުގެ ތެރެއިން ކުރާ ކަންކަމެވެ. އެކަމަކު ވިޔަފާރި އުސޫލުން މި ހިދުމަތްތައް ސްޓެލްކޯއިން ދޭން މިފެށީ އަލަށެވެ.
ސްޓެވޯ ވާކްޝޮޕާ އިފްތިތާހުކުރަން ބޭއްވި ހަފުލާގައި ސްޓެލްކޯގެ މެނޭޖިން ޑިރެކްޓަރު ހަސަން މުގުނީ ވިދާޅުވީ، މިއީ އެ ކުންފުންޏަށް ލިބިފައިވާ ތަޖުރިބާ އާއި ފަންނީ ގާބިލިއްޔަތުގެ ބޭނުންކޮށްގެން އެންމެނަށް ސްޓެލްކޯގެ ހިދުމަތްތައް ފޯރުކޮށްދޭން ފެށި ތަނެއް ކަމަށެވެ.
އަދި މިތަނުން ފޯރުކޮށްދޭ ހިދުމަތްތަކުގެ ބޭނުން އާންމު ރައްޔިތުންނަށާއި، ވިޔަފާރިތަކަށް ކުރާނެ ކަމުގެ އުއްމީދު އެބައޮތް ކަމަށް ވިދާޅުވި އެވެ.
ސްޓެވޯއިން ފޯރުކޮށްދޭ ހިދުމަތްތައް
- ޕަވާ ޖެނަރޭޝަން ސާވިސަސް އަދި ޖެނަރޭޓާ އެސެމްބްލީ
- ޖެނަރޭޓާ ސާވިސަސް
- އޯލްޓަނޭޓާ އެންޑް މޮޓޯ ސާވިސަސް
- ޕަވާ ސިސްޓަމްސް ޑިޒައިނިން އެންޑް ކޮމިޝަނިން
- ޕެނަލް ސާވިސަސް
- އާރްއޯ ޕްލާންޓް އެސެމްބްލީ
- އަލްޓްރާސޮނިކް ކްލީނިން
މުގުނީ ވިދާޅުވި ގޮތުގައި ސްޓެވޯގެ ހިދުމަތްތަކަކީ އެ ކުންފުނީގެ 70 އަހަރުގެ ތަޖުރިބާގެ އަލީގައި ދޭ ފެންވަރު ރަނގަޅު ހިދުމަތްތަކަކަށް ވާނެ އެވެ.
އެގޮތުން ސްޓެވޯއިން ކުރާ މަސައްކަތްތަކާއި އުފައްދާ ޕްރޮޑަކްޓުތަކުގައި ވޮރެންޓީ އާއި އާފްޓަ ސޭލްސް އެކުލެވޭ އަދި ބައިނަލްއަގުވާމީ ފެންވަރުގެ ޓެސްޓިން އާއި ސެޓިފިކޭޝަން ހިމެނޭ ކަމަށް އޭނާ ވިދާޅުވި އެވެ.
މި ހަފުލާ ޝަރަފުވެރިކޮށްދެއްވި އިކޮނޮމިކް މިނިސްޓަރު ފައްޔާޒު އިސްމާއިލް ވަނީ ސްޓެލްކޯއިން ފެށި މި މަސައްކަތަށް މަރުހަބާ ވިދާޅުވެފަ އެވެ. އަދި ވިދާޅުވީ މީގެ ސަބަބުން އިގުތިސޯދަށް އޭގެ މަންފާކުރާނެ ކަމަށާއި، ހާއްސަކޮށް އިގުތިސޯދު ސިންދަފާތުކޮށް ތަފާތު އެކި ދާއިރާތަކަށް އިގުތިސޯދު ފުޅާވުމުގެ މަގުފަހިވާނެ ކަމަށެވެ.
މި ހަފުލާގައި ސްޓެލްކޯއިން ވަނީ އެ ކުންފުނިން އެންމެ ފުރަތަމަ އެސެމްބްލް ކުރި ޖެނަރޭޓަރު ދައްކާލާފަ އެވެ. އަދި މި މަސައްކަތުގައި ހަރަކާތްތެރިވި މުވައްޒަފުންގެ އަގުވަޒަންކޮށް އެ މުވައްޒަފުންނަށް ހަނދާނީ ލިޔުން އެރުވި އެވެ.
