ދިވެހިވަންތަ ނަމަކަށްނުވާ ކަމަށް ބުނެ "ކަރިޝްމާ ޕާޓީ މޯލްޑިވްސް" ގެ ނަމުގައި ސިޔާސީ ޕާޓީއެއް އުފައްދަން ހުއްދަ ނުދިނުމުން އެ ނަން "އިހްލާސްތެރި މޯލްޑިވްސް ޕާޓީ" އަށް ބަދަލުކޮށް, ސިޔާސީ ޕާޓީ އުފައްދަން ބޭނުންވާ މީހުންގެ ސޮއި އެއްކުރުމުގެ ހުއްދަ މިއަދު ހޯދައިފި އެވެ.
"ކަރިޝްމާ ޕާޓީ މޯލްޑިވްސް" ގެ ނަމުގައި ސިޔާސީ ޕާޓީއެއް އުފައްދަން މ. ކެލަން, މުހައްމަދު އިސްމާއިލް ހުށަހެޅުމުން އެކަމަށް ހުއްދަ ނުދޭން ކޮމިޝަނުން ނިންމާފައި ވަނީ ޕާޓީއަށް ކިޔާ ނަން ދިވެހިވަންތަ ނޫން ކަމަށް ބުނެ އެވެ. އަދި އެ ނަމަކީ ސިޔާސީ ޕާޓީއަކަށް ކިޔަން އެކަށީގެންވާ ނަމެއް ނޫން ކަމަށް ވެސް އިލެކްޝަންސް ކޮމިޝަނުން ބުނެފައިވެ އެވެ.
"ކަރިޝްމާ ޕާޓީ" ގެ ނަން "އިހްލާސްތެރި މޯލްޑިވްސް ޕާޓީ"ގެ ނަމަށް ބަދަލުކޮށް، އެ ޕާޓީ އުފެއްދުމުގެ ހުއްދަ މިއަދު ދީފައިވާ ކަމަށް އީސީގެ ނައިބު ރައީސް އިސްމާއިލް ހަބީބް މިއަދު ވިދާޅުވި އެވެ.
ކަރިޝްމާ ޕާޓީގެ ނަމުގައި ސިޔާސީ ޕާޓީއެއް އުފެއްދުމަށް މީގެ ކުރިން ޖެނުއަރީ 6، 2019 ގައި ވެސް މުހައްމަދު އިސްމާއިލް ހުށަހަޅާފައިވެ އެވެ. އެއިރު ވެސް އެ ނަމަށް ހުއްދަ ނުދިނީ އެއީ ކިޔަން އެކަށީގެންނުވާ ނަމެއް ކަމަށް ބުނެ އެވެ.
ކަރިޝްމާ ޕާޓީ ކިޔަން ހުއްދަ ނުދޭން ނިންމެވުމަށްފަހު ކޮމިޝަނުގެ ރައީސް ފުއާދު ތައުފީގް އެކަމާ ގުޅޭ ގޮތުން ވިދާޅުވެފައިވަނީ އެ ޕާޓީއަށް ކިޔަން ހުށަހެޅި ނަމަކީ ހިންދީ ނަމެއް ކަމަށާއި އެއީ ދިވެހި މުޖްތަމައުއާ ގުޅޭ ނަމެއް ނޫން ކަމަށެވެ.
"އެއްކަމަކީ ދިވެހި މުޖުތަމައާ ގުޅޭ ނަމެއް ނޫން. ދިވެހި ވަންތަކަމެއް ނެތް ނަމެއް. ކަރިޝްމާ އަކީ ހިންދީ ނަމެއް. އޭގެ މާނައަށް ބަލާއިރުގައި ވެސް ސިޔާސީ ޕާޓީއަކަށް ކިޔަން އެކަށީގެންވާ ނަމެއް ނޫން ކަމަށް ކޮމިޝަނުން މިފަހަރު ވެސް ނިންމީ،" ދާދި ފަހުން ރައީސްކަމާ ހަވާލުވެވަޑައިގެންނެވި ފުއާދު ވިދާޅުވެފައިވެ އެވެ.
މިހާރު ރާއްޖޭގެ ގިނަ ޕާޓީތަކަށް ދީފައިވަނީ އިނގިރޭސި ނަންތަކެއް ކަމަށްވީ ނަމަވެސް އީސީން އެ ޕާޓީތަކުގެ ނަންތައް ގަބޫލުކުރަނީ އެއީ ޑިމޮކްރެސީއާ ތަރައްގީއާ ގުޅުން ހުރި ނަންތަކަކަށް ވާތީ ކަމަށް ފުއާދު ވިދާޅުވި އެވެ.
"ކަރިޝްމާ" މި ނަން ދިވެހިންގެ ތެރޭގައި މަޝްހޫރުވެފައިވަނީ ހިންދީ ފިލްމީ ތަރި ކަރިޝްމާ ކަޕޫރުގެ ނަމާ ގުޅިގެންނެވެ. އެހެންވެ އެ ނަމުގައި ޕާޓީއެއް ރަޖިސްޓްރީކުރަން ހުށަހެޅުމުން އެކަމަށް ސޯޝަލް މީޑިއާގައި ބައެއް އާއްމުން ވަނީ ހަޖޫޖަހައިފަ އެވެ.
ރާއްޖޭގެ މައި ޕާޓީތަކަކީ މޯލްޑިވިއަން ޑިމޮކްރަޓިކް ޕާޓީ (އެމްޑީޕީ) އާއި ޕްރޮގްރެސިވް ޕާޓީ އޮފް މޯލްޑިވްސް (ޕީޕީއެމް) އާއި ޕީޕަލްސް ނޭޝަނަލް އެލަޔަންސް (ޕީއެންސީ) އާއި ޖުމްހޫރީ ޕާޓީ އާއި އަދާލަތު ޕާޓީ އަދި މޯލްޑިވްސް ރިފޯމް މޫވްމަންޓް (އެމްއާރްއެމް) އެވެ.
އޭގެ ކުރިން ދިވެހި ރައްޔިތުންގެ ޕާޓީ (ޑީއާރްޕީ) އާއި އިސްލާމިކް ޑިމޮކްރަޓިޕް ޕާޓީ (އައިޑީޕީ) އާއި މޯލްޑިވްސް ސޯޝަލް ލިބަރަލް ޕާޓީ (އެސްއެލްޕީ) އާއި ޕީޕަލްސް އެލަޔަންސް (ޕީއޭ) ފަގީރުކަންނައްތާލާ ޕާޓީ ވެސް ހިންގި އެވެ.
ރާއްޖެ އަށް ރަސްމީކޮށް ޕާޓީ ނިޒާމު އައުމުގެ ކުރިން, 1940ގެ އަހަރުތަކުގެ ފަހުކޮޅު ރައްޔިތުންގެ މުތަގައްދިމް ޕާޓީގެ ނަމުގައި ޕާޓީއެއް ހިންގި އެވެ.
