ކުރީގެ ހޯމް މިނިސްޓަރު އަބްދުﷲ ކަމާލުއްދީން އިސްވެ ހުންނަވައި އުފައްދަވާ ޕާޓީ އަށް މެމްބަރުން ހަމަކޮށް އަންނަ ނޮވެމްބަރު 4 ވަނަ ދުވަހު ރަޖިސްޓްރީކުރަން އިލެކްޝަންސް ކޮމިޝަނަށް ހުށަހަޅުއްވާނެ ކަމަށް އޭނާ ވިދާޅުވެއްޖެ އެވެ.
ސިޔާސީ ޕާޓީތަކުގެ ގާނޫނުގައި ބަޔާންކޮށްފައި އޮންނަ ގޮތުން ޕާޓީއެއް އުފެއްދޭނީ މަދުވެގެން 3،000 މެންބަރުންގެ ސޮއި އިލެކްޝަންސް އަށް ހުށަހަޅައިގެންނެވެ. އެއާ އެކު ޕާޓީ ރަޖިސްޓްރީ ކުރުމުގެ ޖަލްސާ ބާއްވަން އެ ކޮމިޝަނުން ހުއްދަ ދޭނެއެވެ. އެ ޖަލްސާގައި މަދުވެގެން 300 މެންބަރުން ބައިވެރިވާން ޖެހޭނެ އެވެ.
"ގައުމީ އެއްބައިވަންތަކަމުގެ ޕާޓީ" ގެ ނަމުގައި ޕާޓީއެއް އުފެއްދެވުމަށް ކުރަންޖެހޭ މަސައްކަތްތައް ކުރުމުގެ ހުއްދަ ކަމާލުއްދީނަށް އިލެކްޝަންސް އިން ދީފައި ވަނީ މި އަހަރުގެ އޮގަސްޓް 2 ވަނަ ދުވަހު އެވެ.
"އަދަދު" އާ ވާހަކަދައްކަވަމުން ކަމާލުއްދީން ވިދާޅުވީ ނޮވެމްބަރުމަހާ ހަމައަށް 3000 މީހުންގެ ސޮއި ހަމަވާނެ ކަމަށާއި މާލޭންނާއި އަތޮޅުތެރެއިން އެ ޕާޓީއަށް މެމްބަރުން ސޮއިކުރަމުންދާ ކަމަށެވެ. އެކަމަކު މިހާތަނަށް ސޮއިކޮށްފައިވާ މީހުންގެ އަދަދު ހާމަކުރަން އޭނާ އުޒުރުވެރިވި އެވެ.
ކަމާލުއްދީން ވިދާޅުވީ ރައްޔިތުން މަޖިލީހަށް ނިސްބަތްވާ އެއްވެސް މެމްބަރަކު އެ ޕާޓީއާ ގުޅިފައި ނުވާ ކަމަށާއި އަދި ސިޔާސީ މައިދާނުގައި މަޝްހޫރު އެއްވެސް މީހަކުވެސް ޕާޓީއަށް ސޮއިނުކުރާ ކަމަށެވެ. އެކަމަކު ސަރުކާރުގެ ޒިންމާދާރު މަގާމުތައް ފުރުއްވަމުންދާ ބައެއް މީހުންނާއި، ޕްރައިވެޓް ސެކްޓަރުގެ އިސް މަގާމުތައް ފުރުއްވަމުންދާ ބައެއް މީހުން އެ ޕާޓީއާ ގުޅިފައިވާ ކަމަށް އޭނާ ވިދާޅުވި އެވެ.
"އަންނަ ރިޔާސީ އިންތިހާބަށް ކެންޑިޑޭޓަކު ނެރޭނަން. އެކަމަކު އޭގެ ކުރިން ޕްރައިމަރީއެއް އޮންނާނެ،" ކަމާލުއްދީން ވިދާޅުވި އެވެ.
ކަމާލުއްދީން ވަނީ ރައީސް މައުމޫން އަބްދުލްގައްޔޫމުގެ ވެރިކަމުގައި ހޯމް މިނިސްޓަރުކަމުގެ އިތުރުން ޕަބްލިކް ވޯކްސް އެންޑް ލޭބާ މިނިސްޓަރުކަމާއި ފިޝަރީޒް މިނިސްޓަރުކަން ކުރައްވައިފަ އެވެ. އޭނާ އެންމެ ފުރަތަމަ އުޅުއްވީ ޑީއާރްޕީގަ އެވެ. އޭގެ ފަހުން ޖުމްހޫރީ ޕާޓީގައި އުޅުއްވުމަށް ފަހު ދެން ގުޅިވަޑައިގަތީ މައުމޫނުގެ ރިފޯމް މޫވްމަންޓާ އެވެ.
