ދިވެހި ޕްރިމިއާ ލީގުގެ ޑިރެކްޓާ އޮފް އެޑްމިނިސްޓްރޭޓަރެއްގެ މަގާމަށް އެފްއޭއެމްގެ ކުރީގެ ޖެނެރަލް ސެކްރެޓަރީ އަދި ރާއްޖޭގައި އުފެދުނު އެންމެ މޮޅު އެއް ފޯވާޑް ޝާހު އިސްމާއިލް (ސާޔާ) ހަމަޖައްސައިފި އެވެ.
މީގެ ކުރިން އެފްއޭއެމްގެ ޑެޕިއުޓީ ޖެނެރަލް ސެކްރެޓަރީގެ މަގާއި ޖެނެރަލް ސެކްރެޓަރީގެ މަގާމު އަދާކުރި ޝާހު އަކީ އެފްއޭއެމް އިންތިހާބީ ލީޑަޝިޕެއްގެ ދަށުން ހިނގައިގަންނަން ފެށިއިރު، އެ އެސޯސިއޭޝަންގެ ހިންގުމުގެ އަސާސީ ގަވާއިދުގެ ކަންކަމާއި އެހެނިހެން އިދާރީ ކަންތައްތައް އޮނިގަނޑެއްގެ ތެރެއިން ގެންދިއުމަށް ފެށި މަސައްކަތުގެ އެއް ހިއްސާދާރެވެ.
ޝާހު އަލުން އެފްއޭއެމަށް ފުޓްބޯޅައިގެ މަސައްކަތެއް ކުރަން ރަސްމީކޮށް މި އެނބުރި އައީ އަށް ވަރަކަށް އަހަރުގެ މެދުކެނޑުމަކަށް ފަހު އެވެ.
އެފްއޭއެމުން ވަނީ ކޮމިޓީއެއް އެކުލަވާލައި 2023/2024 ވަނަ އަހަރުގެ ދިވެހި ޕްރިމިއާ ލީގު މުޅި ރާއްޖެ އަށް ހުޅުވާލައިގެން ކުރިއަށް ގެންދަން މިހާރު ފޯމެޓެއް އެކުލަވާލައިފަ އެވެ. އާ ފޯމެޓާ އެއްގޮތަށް ލީގު މިހާރުން ފެށިގެން ކުރިއަށް ގެންދިއުމުގެ މަސައްކަތުގައި ޝާހު ހަރަކާތްތެރިވާނީ އިސް އެޑްމިނިސްޓްރޭޓަރެއްގެ ރޯލުގަ އެވެ.
ޝާހު އޭނާގެ ރަސްމީ ފޭސްބުކް އެކައުންޓްގައި ލިޔެފައިވަނީ ރާއްޖޭގެ ފުޓްބޯޅަ އަށް ހިދުމަތްކުރަން ލިބޭ މި ފަދަ ފުރުސަތުތައް އުފަލައި ބަލައިގަންނަ ކަމަށެވެ.
ތަޖުރިބާކާރު ކޯޗު މުހައްމަދު އާދަމްގެ ބެލުމުގެ ދަށުން ގިނަ ބަޔަކާ މަޝްވަރާ ކުރެވިގެން އެފްއޭއެމުން 2023/2024 ވަަނަ އަަހަރު މުޅި ރާއްޖެ އަށް ފުޅާކޮށްގެން ކުރިއަށްގެންދާ ލީގު ބެހިފައިވަނީ ހަތަރު ޒޯނަކަށެވެ. އެ ފޯމެޓަށް ލީގު ފެށޭތޯ ކުރިއަށް އޮތް ސީޒަނުން ފެށިގެން ގިނަ ކަންތައްތަކެއް ކުރަން ޖެހޭއިރު، ބައެއް ޒޯންތަކުގެ މެޗުތައް ވެސް ކުޅެން ޖެހޭނެ އެވެ.
ލީގުގެ އެޑްމިނިސްޓްރޭޓިވް މަސައްކަތާ ހަވާލުވި ޝާހު ވަނީ އެފްއޭއެމް ފައުންޑޭޝަންގެ އެމްބަސަޑަރަކަށް ވެސް މިދިޔަ އަހަރު ހަމަޖައްސައިފަ އެވެ. ދާދި ފަހުން ގައުމީ ފުޓްބޯޅަ ޓީމަށް ބޭއްވި ބައްދަލުވުމެއްގައި ވެސް ޝާހު ވަނީ ބައިވެރިވެފަ އެވެ.
ފުޓްބޯޅައިން 2003 ވަނަ އަހަރު ރިޓަޔާކުރި ނަމަވެސް ޝާހު ވަނީ އެފްއޭއެމްގެ މަގާމުތަކުގެ އިތުރުން ޔޫތު މިނިސްޓްރީގެ ޑެޕިއުޓީގެ މަގާމު ވެސް ފުރުއްވައިފަ އެވެ. ރާއްޖޭން 2000 ވަނަ އަހަރުގެ ގޯލްޑަން ޖުބިލީ މުބާރާތާއި 2003 ވަނަ އަހަރުގެ ސާފް ޗެމްޕިއަންޝިޕުގެ ދެ ވަނަ ހޯދި ޓީމަށް ކުޅުނު ޝާހު ވަނީ ސީޒަނުގައި އެންމެ ގިނަ ލަނޑު ޖަހައިގެން 1998 އާއި 1999 ވަނަ އަހަރު ރަން ބޫޓު ހޯދައިފަ އެވެ.
