ރާއްޖޭގެ ޖަލުތަކުގައި މަރުވާ މީހުންގެ މައްސަލަތަކާއި އަނިޔާގެ މައްސަލަތައް އިންސާފުވެރިކޮށް ތަހުގީގުކުރުމަށް އެމްނެސްޓީ އިންޓަނޭޝަނަލް އިން ގޮވާލައިފި އެވެ.
ރާއްޖޭގެ ޖަލުތަކުގެ ހާލަތާމެދު ކަންބޮޑުވުން ފާޅުކޮށް އެމްނެސްޓީން ބަޔާނެއް ނެރެފައިވަނީ މި ފަހުން ޖަލުތަކުގައި ހިނގި ބައެއް ހާދިސާތަކާ ގުޅިގެންނެވެ.
އެގޮތުން، ހުޅުމާލޭ ޖަލުގައި ހުރި ގދ. ވާދޫ، އަސްލަމް، 40، މަރުވި ސަބަބު އަދިވެސް އެނގިފައިނުވާ ކަން އެމްނެސްޓީން ފާހަގަކުރި އެވެ.
އޭނާ ތިން އަހަރަށް ޖަލަށް ލާފައި ހުރީ މަސްތުވާތަކެތީގެ މައްސަލައެއް ހުކުމުގަ އެވެ.
ކަރެކްޝަނާ ހަވާލާދީ އެމްނެސްޓީން ބުނީ އެ ގައިދީ ވެއްޓުމުން ހޮސްޕިޓަލަށް ގެންދެވުނު ކަމަށާއި އޭނާ މަރުވެފައިވާ ކަން އަންގާފައިވީ ނަމަވެސް އަސްލަމް ހޮސްޕިޓަލަށް ގެންދިޔަކަން އާއިލާއަށް އެނގުނީ އާންމު މީހެއްގެ ފަރާތުން ކަމަށާއި، އަދި އޭނާގެ ހާލަތު އޮޅުން ފިލުވުމަށް މަސައްކަތް ކުރި ކަމަށް އެމްއެސްޓީން ބުނެ އެވެ.
މީގެ އިތުރުން ވައްކަމުގެ މައްސަލައަކާ ގުޅިގެން މިދިޔަ އަހަރު ހައްޔަރުކުރި އަހުމަދު ސިރާޖު އަށް ފުލުހުން އަނިޔާކޮށްފައިވާ ކަމަށް އެމްނެސްޓީން ބުންޏެވެ. އެގޮތުން ފުލުހުން އޭނާ ކޮޓަރިއަކަށް ވެއްދުމަށް ފަހު ކުށަށް އިއުތިރާފުވުމަށް އަންގައި އަނިޔާކުރި ކަމަށް ބުންޏެވެ.
"ގައިދީއެއްގެ މަރުގެ ހާދިސާގައި މަރުގެ ސަބަބު އެނގެން ނެތުމަކީ އެކަމުގައި ޖަލުތަކުގައި ތިބޭ ގައިދީންގެ އިންސާނީ ހައްގުތައް ކަށަވަރުވާކަމާމެދު ކަންބޮޑުވުންތަކެއް އުފެދޭ ކަމެއް،" އެމްނެސްޓީ ބަޔާނުގައި ވެ އެވެ.
އަސްލަމްގެ މަރުގެ މައްސަލައާއި ސިރާޖަށް އަނިޔާކުރި މައްސަލަ ވަކިން ތަހުގީގުކޮށް އިހުމާލުވި މީހުން އެއް ފަރާތްކޮށްގެން މައްސަލަ ބެލުމަށް ވަނީ ގޮވާލާފަ އެވެ. އަދި މާފުށީ ޖަލުގައި ދެ ގައިދީއެއްގެ ދެމެދުގައި ހިނގި ހަމަނުޖެހުމެއްގައި ހޫނު ފެން އުކި މައްސަލައެއް ވެސް ފާހަގަކޮށްފައި ވެ އެވެ.
ހަމައެއާއެކު އެމްނެސްޓީން ބުނީ ރާއްޖޭގެ ޖަލުތަކަކީ ޓޯޗާކުރުމުގެ ސަގާފަތަކާއި އެކަމުގެ ތާރީހެއް އޮތް ތަނެއްކަމަށެވެ. އަދި އެހެންކަމުން އެކަންކަން ތަހުގީގުކުރުމަށް އެމްނެސްޓީން ވަނީ ދައުލަތުގެ ކަމާބެހޭ އިދާރާތަކަށް އިލްތިމާސްކޮށްފަ އެވެ.
